సుకన్య సమృద్ధి, పీపీఎఫ్ ఇన్వెస్టర్లకు బ్యాడ్‌న్యూస్.. కేంద్రం కీలక ప్రకటన

పెట్టుబడుల కోసం భారతీయులకు ఎన్నో ఆప్షన్లు ఉన్నప్పటికీ.. చిన్న మొత్తాల పొదుపు పథకాలకు ఫుల్ డిమాండ్ ఉంటుంది. వీటినే పోస్టాఫీస్ పథకాలు అంటారు. వీటిల్లో చిన్న మొత్తాల్లో పెట్టుబడులు పెట్టేందుకు అవకాశం ఉండటం.. గ్యారెంటీ రిటర్న్స్ వస్తుండటం.. కేంద్ర ప్రభుత్వం హామీగా ఉండటం.. అతిపెద్ద బెనిఫిట్స్ అని చెప్పొచ్చు. ఇంకా వీటిల్లో పెట్టుబడులు పెట్టడం ద్వారా పాత పన్ను విధానం కింద టాక్స్ బెనిఫిట్స్ కూడా పొందొచ్చు. కొన్ని పథకాల్లో కాంపౌండింగ్ బెనిఫిట్ ద్వారా దీర్ఘకాలంలో పెద్ద మొత్తంలో సంపాదించుకోవచ్చు. ఇక వీటిల్లో అన్ని వర్గాలకు చెందిన విభిన్న స్కీమ్స్ ఉన్నాయి. వీటిల్లో వడ్డీ రేట్లను కేంద్రం.. ప్రతి 3 నెలలకు ఓసారి అంటే త్రైమాసికానికి ఒకసారి సవరిస్తుంటుంది. ఇప్పుడు మార్చి నెల ముగియడంతో.. ఏప్రిల్- జూన్ త్రైమాసికం వడ్డీ రేట్లు ప్రకటించింది.

చాలా కాలంగా కేంద్రం ఈ పథకాల్లో వడ్డీ రేట్లను కేంద్రం పెంచట్లేదు. ఈ క్రమంలోనే ఈసారి కచ్చితంగా పెంచుతుందన్న వాదన వినిపించినప్పటికీ మరోసారి నిరాశే మిగిల్చింది. వడ్డీ రేట్లను అన్ని పథకాలకు స్థిరంగానే కొనసాగించింది. ముఖ్యంగా ఈ పథకాల్లో అత్యంత ఆదరణ ఉన్నటువంటి పబ్లిక్ ప్రావిడెంట్ ఫండ్ (PPF) వడ్డీ రేటును చాలా కాలంగా దాదాపు ఐదేళ్లుగా స్థిరంగానే ఉంచుతూ వస్తోంది. దీంట్లో ఇంకా వడ్డీ రేటు 7.10 శాతంగానే ఉండగా.. ఎప్పటినుంచో పెంచాల్సి ఉన్నా కేంద్రం పెంచట్లేదు. దీంతో ఇందులో పెట్టుబడులు పెట్టేవారు తీవ్ర నిరాశ చెందారు.

ఇదే సమయంలో ఆడపిల్లల కోసమే ఉద్దేశించి తీసుకొచ్చిన సుకన్య సమృద్ధి పథకం వడ్డీ రేట్లు కూడా స్థిరంగానే ఉన్నాయి. చివరగా 2023-24 చివరి త్రైమాసికంలో (జనవరి- మార్చి) ఈ స్కీమ్ వడ్డీ రేట్లను 8 శాతం నుంచి 8.20 శాతానికి చేర్చగా.. అక్కడి నుంచి మళ్లీ పెంచట్లేదు. పోస్టాఫీస్ పథకాల్లో వీటికే డిమాండ్ ఎక్కువగా ఉంటుంది.

పబ్లిక్ ప్రావిడెంట్ ఫండ్ 

భారత ప్రభుత్వ హామీతో అందించే పొదుపు పథకం ఇది. దీంట్లో పెట్టుబడి పెట్టడం ద్వారా పన్ను రాయితీతో పాటు అధిక రాబడి లభిస్తుంది. ప్రస్తుత వడ్డీ రేటు 7.1 శాతంగా ఉంది. చక్రవడ్డీ వర్తిస్తుంది. కనీసం రూ. 500తో చేరొచ్చు. గరిష్ఠంగా రూ. 1.5 లక్షలు ఇన్వెస్ట్ చేయొచ్చు. కాలపరిమితి 15 ఏళ్లుగా ఉంది. ఐదేళ్ల చొప్పున పొడిగించుకోవచ్చు. సెక్షన్ 80C కింద పూర్తిగా టాక్స్-ఫ్రీ. కాలానుగుణంగా లోన్, పాక్షికంగా విత్‌డ్రా చేసుకునేందుకు అవకాశం ఉంది.

సుకన్య సమృద్ధి యోజన 

సుకన్య సమృద్ధి యోజన  బాలికల భవిష్యత్‌ కోసం ప్రత్యేకంగా రూపొందించిన పొదుపు పథకం. ఇది అధిక వడ్డీ రేటుతో భద్రత కల్పించే ఉత్తమ పెట్టుబడి ఎంపిక. ప్రస్తుతం వడ్డీ రేటు 8.2 శాతంగా ఉంది. చక్రవడ్డీ వర్తిస్తుంది. పాప 10 ఏళ్ల లోపు వయసులోపే ఇందులో చేరాలి.

పొదుపు కనీసం రూ. 250 నుంచి చేయొచ్చు. గరిష్ఠంగా ఏడాదికి రూ. 1.5 లక్షలుగా ఉంది. కాలపరిమితి 21 ఏళ్లుగా ఉంది. వరుసగా 15 ఏళ్లు కట్టాలి. బాలిక 18 ఏళ్లు పూర్తయినా లేదా పదో తరగతి పాసైనా 50 శాతం ఉపసంహరించుకోవచ్చు. సెక్షన్ 80C కింద పూర్తిగా టాక్స్-ఫ్రీ.