మలబద్ధకాన్ని తగ్గించి ఒంట్లోని వేడిని తరిమికొట్టే డ్రింక్

ఎండాకాలం పీక్ స్టేజ్‌కి చేరుకుంది. రోజు రోజుకి ఉష్ణోగ్రతలు పెరిగిపోతున్నాయి. ఎండలు దంచికొడుతున్నాయి. దీనికి తోడు వేసవిలో మలబద్ధక సమస్య ఎక్కువగా ఉంటుంది. ఎండాకాలంలో మలబద్ధకం సమస్య చాలామందికి వస్తుంది. నీరు తక్కువగా తాగడం, తగినంత ఫైబర్ లేకపోవడం, శారీరక శ్రమ తగ్గించడం, వ్యాయామం చేయకపోవడం వంటి రకరకాల కారణాలు ఉన్నాయి. మలబద్ధకాన్ని నివారించడానికి నీరు తాగడం, వ్యాయామం, సరైన ఆహారం తీసుకోవడం చాలా ముఖ్యం.

మలబద్ధక సమస్య ఉంటే ఫ్రీ మోషన్ రాదు. వీళ్లు వారానికి ఒకటి రెండు మాత్రమే మల విసర్జనకి వెళ్తారు. మలం విసర్జించేటప్పుడు వీళ్లు తీవ్ర నొప్పికి గురవుతారు. రోజూ తీసుకునే ఆహారంలో కొన్ని రకాల ఫైబర్ రిచ్ ఆహారాల్ని చేర్చుకుంటే ఈ సమస్య నుంచి రిలీఫ్ లభిస్తుంది. అలాంటి ఓ డ్రింక్ గురించి ఇప్పుడు చెప్పుకుందాం. ఆ డ్రింక్ తాగితే మలబద్ధక సమస్య నుంచి రిలీఫ్ లభించడమే కాకుండా కడుపు అంతా క్లీన్ అవుతుందని నిపుణులు అంటున్నారు. మజ్జిగ ఉంటే చాలు ఈ డ్రింక్ తయారు చేసుకోవచ్చు. ఆ డ్రింక్ ఏంటో తెలుసుకుందాం.

మలబద్దకానికి కారణాలు

​మలబద్ధకం ఎందుకు వస్తుందో, అందుకు కల కారణాల్ని గుర్తించడంలో చాలా కష్టం. సాధారణంగా ఆహారంలో మన చేసే తప్పులు కారణంగా మలబద్ధకం సమస్య తలెత్తుతుంది. జంక్ ఫుడ్ , ప్రాసెస్డ్ ఫుడ్ వంటి ప్యాక్ చేసిన ఆహారాన్ని ఎక్కువగా తీసుకునే వారికి ఈ సమస్య ఎక్కువ ఉంటుంది. బర్గర్, పిజ్జా వంటివి తిన్న మరుసటి రోజే మలబద్ధకం సమస్యను చాలా మంది ఎదుర్కొంటున్నారని నిపుణులు చెబుతున్నారు. పండ్లు, కూరగాయలు, తృణధాన్యాలు వంటి ఫైబర్ అధికంగా ఉండే ఆహారాన్ని తగినంతగా తీసుకోకపోవడం కూడా ఒక కారణం. మలవిసర్జన పోస్ట్ పోన్ చేయడం, కొన్ని మందుల దుష్ప్రభావాలు, తగినంత ద్రవాలు తీసుకోకపోవడం, ఆందోళన లేదా నిరాశ కూడా మలబద్ధకానికి ప్రధాన కారణాలుగా నిపుణులు చెబుతున్నారు.

మ్యాజిక్ చేసే జీరా మజ్జిగ డ్రింక్

మలబద్దకానికి మజ్జిగ తాగడం మంచిది. ముఖ్యంగా మజ్జిగలో జీలకర్ర పొడి, రాక్ సాల్ట్, కొత్తిమీర కలిపి తగడం మరింత ప్రభావంతంగా పనిచేస్తుంది. మజ్జిగలో జీలకర్ర, రాక్ సాల్ట్ కలిపి తాగడం వల్ల జీర్ణవ్యవస్థ మెరుగుపడుతుంది. ఫైబర్ అధికంగా ఉండే ఆహారాలు మన ప్రేగులను ఆరోగ్యంగా ఉంచడంలో సహాయపడతాయి. మలబద్ధకం సమస్యను అధిగమించడానికి, ఆహారంలో కూరగాయలు, పండ్లు, తృణధాన్యాల్ని ఎక్కువగా చేర్చుకోండి. ఇందుకోసం మజ్జిగను పల్చగా చేసుకుని అందులో ఒక టీ స్పూన్ జీలకర్ర పొడి, కొత్తిమీర, రాక్ సాల్ట్ కలిపి బాగ్ మిక్స్ చేసుకోవాలి. ఇంకేముంది మలబద్ధకం తగ్గించే డ్రింక్ రెడీ అయినట్టే.

మజ్జిగ చేసే మ్యాజిక్

మజ్జిగలో ప్రోబయోటిక్స్ ఉంటాయి. ఇవి కడుపులో బ్యాక్టీరియా సమతుల్యతను కాపాడుకోవడానికి సహాయపడతాయి. మజ్జిగ కడుపుని చల్లబరుస్తుంది. పేగుల్ని ఆరోగ్యంగా ఉంచడంలో సహాయపడుతుంది. జీలకర్రలోని యాంటీ ఇన్‌ఫ్లమేటరీ గుణాలు గ్యాస్, ఎసిడిటీ నుంచి ఉపశమనం కలిగిస్తాయి. ఇది జీర్ణ ఎంజైమ్‌లను క్రమబద్దీకరిస్తుంది.

జీలకర్ర చేసే మేలు

జీలకర్రలో పోషకాలు మెండుగా ఉంటాయి. అంతేకాకుండా యాంటీ ఆక్సిడెంట్స్ ఎక్కువగా ఉంటాయి. ఇవి శరీరాన్ని ఫ్రీ రాడికల్స్ నుంచి రక్షిస్తాయి. గుండెని ఆరోగ్యంగా ఉంచుంది. జీవక్రియను వేగవంతం చేస్తుంది. మెటబాలిజం పెంపొందిస్తుంది. జీర్ణ సమస్యల్ని తొలగించడానికి జీలకర్ర బాగా సహాయపడుతుంది. కడుపు ఉబ్బరం, గ్యాస్ వంటి సమస్యల్ని తగ్గిస్తుంది. ఎసిడిటీతో బాధపడుతున్నట్లుయితే.. జీలకర్రను తీసుకోవడం మంచిదంటున్నారు ఆయుర్వేద నిపుణులు. ఛాతి మంట, ఎసిడీటీ, యాసిడ్ రిఫ్లెక్స్ వంటి సమస్యల్ని జీలకర్ర తగ్గిస్తుంది. జీలకర్రను తీసుకోవడం వల్ల ఇందులో ఉండే పొటాషియం, ఐరన్ ఇమ్యూనిటీ పవర్‌ని పెంచుతుంది.

ఇది ముఖ్యం

ఈ మజ్జిగ డ్రింక్ మలబద్ధకం పనిపడుతుంది. ఇందుకోసం గ్లాసు మజ్జిగలో జీలకర్ర, కొత్తిమీర కలిపి తీసుకోవాలి. రోజూ తాగడం వల్ల గ్యాస్, అజీర్ణం, ఇతర కడుపు సమస్యల నుంచి ఉపశమనం లభిస్తుంది. అయితే, మజ్జిగ పల్చగా ఉండాలి. మజ్జిగను ఉదయం లేదా మధ్యాహ్నం ఆహారం తర్వాత తీసుకుంటే మంచి ఫలితాలుంటాయి. జీలకర్రను పొడి చేసుకుని మజ్జిగలో కలిపి తాగొచ్చు. రుచికి సరిపడా రాక్ సాల్ట్ కూడా కలుపుకోవచ్చు. అంతేకాకుండా ఇది ఒంట్లోని వేడిని కూడా తరిమికొట్టి చలువ చేసేలా చేస్తుంది.