తీరు మార్చుకోని సన్‌రైజర్స్, ఓటముల హ్యాట్రిక్‌

ఇండియన్ ప్రీమియర్ లీగ్ 18వ ఎడిషన్‌లో సన్‌రైజర్స్ హైదరాబాద్ వరుసగా మూడో మ్యాచ్‌లోనూ ఓడిపోయింది. టైటిల్ ఫేవరెట్ జట్లలో ఒకటిగా బరిలోకి దిగిన ఆరెంజ్ ఆర్మీ.. అంచనాలను అందుకోలేకపోతోంది. సమష్టిగా విఫలమై ఓటముల హ్యాట్రిక్ నమోదు చేసింది. గురువారం కోల్‌కతా నైట్ రైడర్స్‌తో జరిగిన మ్యాచ్‌లో.. 80 పరుగుల తేడాతో చిత్తుగా ఓడిపోయింది. దీంతో పాయింట్ల పట్టికలో అట్టడుగు స్థానానికి చేరుకుంది.

ఈ మ్యాచ్‌లో టాస్ గెలిచిన సన్‌రైజర్స్ హైదరాబాద్ కెప్టెన్ ప్యాట్ కమిన్స్.. హోమ్‌ టీమ్‌కు బ్యాటింగ్ అప్పగించాడు. దీంతో ఫస్టు బ్యాటింగ్ చేసిన కోల్‌కతా నైట్ రైడర్స్.. నిర్ణీత 20 ఓవర్లలో 200/6 పరుగులు చేసింది. ఆ జట్టు బ్యాటర్లలో వెంకటేశ్ అయ్యర్.. 29 బంతుల్లో 60 రన్స్ చేసి టాప్ స్కోరర్‌గా నిలిచాడు. కెప్టెన్ అజింక్య రహానే (27 బంతుల్లో 38 రన్స్‌), రఘువంశీ (32 బంతుల్లో 50 రన్స్‌), రింకూ సింగ్ (17 బంతుల్లో 32 రన్స్‌) కూడా రాణించారు. సన్‌రైజర్స్ బౌలర్లలో మహమ్మద్ షమీ, ప్యాట్ కమిన్స్, జీషన్ అన్సారీ, హర్షల్ పటేల్, కామిండు మెండిస్ ఒక్కో వికెట్ చొప్పున తీశారు.

అయితే సన్‌రైజర్స్‌లో ట్రావిస్ హెడ్, అభిషేక్ శర్మ, ఇషాన్ కిషన్, హెన్రిచ్ క్లాసెన్ లాంటి విధ్వంసకర వీరులు ఉండటంతో విజయంపై ఫ్యాన్స్ ఆశలు కోల్పోలేదు. కానీ ఛేజింగ్ ప్రారంభమైన కాసేపటికే ఆశలు అడియాశలు అయ్యాయి. ఎన్నో ఆశలు పెట్టుకున్న టాప్ ఆర్డర్ బ్యాటర్లు ఘోరంగా విఫలమయ్యారు. ట్రావిస్ హెడ్ (4), అభిషేక్ శర్మ (2), ఇషాన్ కిషన్ (2) జట్టు స్కోరు పది రన్స్ కూడా కాకముందే పెవిలియన్ చేరారు.

ఆ తర్వాత నితీశ్ కుమార్ రెడ్డి (19), కామిందు మెండిస్ (27), హెన్రిచ్ క్లాసెన్ (33) కాసేపు నిలబడ్డా.. ఓటమి అంతరాన్ని తగ్గించారే తప్ప గెలిపించలేకపోయారు. చివరకు సన్‌ రైజర్స్.. 16.4 ఓవర్లలో 120 పరుగులకు ఆలౌట్ అయింది. 80 పరుగుల తేడాతో చిత్తుగా ఓడిపోయింది. కోల్‌కతా బౌలర్లలో వైభవ్ అరోరా, వరుణ్ చక్రవర్తి ముడేసి వికెట్లు తీశారు. ఆండ్రీ రసెల్ 2, హర్షిత్ రాణా 1, సునీల్ నరైన్ 1 వికెట్ పడగొట్టారు.