పేస్ బౌలింగ్ వేస్తుండగా పవర్ కట్

డే అండ్ నైట్ మ్యాచ్‌లలో పవర్ కట్ అయితే.. అదీ గంటకు 140 కిలోమీటర్ల వేగంతో విసిరే పేస్ బౌలర్ దాంట్లో అయితే.. ఊహించగలమా! కానీ న్యూజిలాండ్-పాకిస్తాన్ మ్యాచ్‌లో అదే జరిగింది. రేర్ ఇన్సిడెంట్.. మ్యాచ్ చూసే ప్రతి ఒక్కరూ వణికిపోయారు. కరెంట్ వచ్చే వరకూ టెన్షనే. బే ఒవెల్ వేదికగా జరిగిన న్యూజిలాండ్-పాకిస్తాన్ మ్యాచ్‌ కాస్తంత టెన్షన్ పుట్టించింది.

పాకిస్తాన్ ఇన్నింగ్స్ 39వ ఓవర్‌లో జాకబ్ డప్ఫీ బౌలింగ్ వేస్తుండగా సడెన్‌గా ఫ్లడ్ లైట్స్ ఆఫ్ అయ్యాయి. స్ట్రయికింగ్‌లో ఉన్న తయ్యబ్ తాహీర్ వెంటనే పక్కకొచ్చాడు. దాంతో ఎవరికీ ఎలాంటి ఇబ్బంది జరగలేదు. ఒకవేళ తాహీర్‌ వికెట్ల వద్దే నిల్చుంటే బాల్ అతన్ని తాకే అవకాశం ఉండేది. పాకిస్తాన్ ఇన్నింగ్స్ ఆరంభంలోనే కివీస్ ఫీల్డర్ దెబ్బకు ఇమామ్ ఉల్ హక్ రిటైర్డ్ హర్ట్ అయ్యాడు. సింగిల్ తీసేందుకు వెళ్తున్న ఇమామ్‌ వైపు బంతి వేగంగా విసరడంతో అది నేరుగా అతని హెల్మెట్‌లో దూరింది. దాంతో ఇమామ్ దవడ భాగానికి గాయమైంది.

న్యూజిలాండ్‌-పాకిస్తాన్ వన్డే సిరీస్ ఆఖరి మ్యాచ్ బే ఓవెల్ వేదికగా సాగింది. ఈ మ్యాచ్‌లో టాస్ గెలిచిన పాకిస్తాన్ న్యూజిలాండ్‌ను బ్యాటింగ్‌కి ఆహ్వానించింది. వర్షం కారణంగా మ్యాచ్‌ని 42 ఓవర్లకు కుదించడంతో న్యూజిలాండ్ జట్టు నిర్ణీత ఓవర్లలో 8 వికెట్ల నష్టానికి 264 పరుగులు చేసింది. భారీ లక్ష్యంతో బరిలోకి దిగిన పాకిస్తాన్ జట్టు 40 ఓవర్లలో 221 పరుగులకు ఆలౌట్ అయింది. దాంతో న్యూజిలాండ్ 43 పరుగుల తేడాతో విజయం సాధించింది.

మూడు వన్డేల సిరీస్‌ను ఆతిథ్య న్యూజిలాండ్ జట్టు 3-0తో సొంతం చేసుకుంది. న్యూజిలాండ్‌పై టీ20 సిరీస్‌ను 1-4తో ఓడిపోయిన పాక్.. వన్డే సిరీస్‌లో వైట్ వాష్‌కు గురైంది. న్యూజిలాండ్ జట్టుపై పాకిస్తాన్‌కు ఇది వరుసగా పదమూడో ఓటమి. పాకిస్తాన్‌లో కానీ, ఇతర అంతర్జాతీయ వేదికలపైన, న్యూజిలాండ్‌లో ఇలా అన్నీ వేదికలపై న్యూజిలాండ్‌పై పాకిస్తాన్ వరుసగా పదమూడు వన్డే మ్యాచ్‌లు ఓడిపోయింది.