బంగారం ధర ఎప్పుడు తగ్గుతుంది? నిపుణుల మాటేంటి

ఈ కొత్త ఏడాది 2025 ప్రారంభమైనప్పటి నుంచే బంగారం ధరలకు రెక్కలొచ్చాయి. ఏ దశలోనూ వెనుదిరిగి చూడకుండా రయ్ రయ్ మంటూ పరుగుల పెడుతున్నాయి. ఎప్పటికప్పుడు సరికొత్త రికార్డ్ గరిష్ఠాలను నమోదు చేస్తున్నాయి. ఈ ఏడాది 2025లో ఇప్పటి వరకు డొమెస్టిక్ స్పాట్ గోల్డ్ రేటు 23 శాతం మేర పెరిగింది. ఒక్క ఈ ఏప్రిల్ నెలలోనే బంగారం ధర ఏకంగా 5 శాతం పెరగడం గమనార్హం. ఎంసీఎక్స్ గోల్డ్ చివరి ట్రేడింగ్‌లో జూన్ 5 కాంట్రాక్ట్ 10 గ్రాములకు ఆల్ టైం హై స్థాయి రూ.93,940 స్థాయిని తాకింది. ఆ తర్వాత కాస్త తగ్గి 0.15 శాతంతో రూ.93,887 వద్ద ముగిసింది.

అంతర్జాతీయ మార్కెట్లలోనూ బంగారం ధరలు భారీగా పెరుగుతున్నాయి. స్పాట్ గోల్డ్ రేటు ఔన్సుకు చివరి ట్రేడింగ్‌లో రికార్డ్ హై స్థాయి 3263 డాలర్లను తాకి ఆ తర్వాత 2.44 శాతం వృద్ధితో 3254.90 డాలర్ల వద్ద ముగిసింది. ఈ ఏడాది చూస్తే బంగారం ధరలు విపరీతంగా పెరిగింది. అందుకు చాలా కారణాలు ఉన్నాయని బులియన్ మార్కెట్ నిపుణులు చెబుతున్నారు. అందులో ప్రధానంగా ప్రభావం చూపేది వాణిజ్య యుద్ధ భయం. ఓ వైపు ప్రతీకార సుంకాలకు బ్రేకులు వేసిన ట్రంప్ చైనాపై మాత్రం భారీగా పెంచారు. ఏకంగా 125 శాతం సుంకాలు విధిస్తున్నట్లు చెప్పారు. దానికి ప్రతీకారంగా చైనా సైతం 125 శాతం మేర సుంకాలు విధిస్తామని తెలిపింది. దీంతో రెండు అతిపెద్ద ఆర్థిక వ్యవస్థల మధ్య వాణిజ్య యుద్ధం మొదలైనట్లయింది. అది ప్రపంచ ఆర్థిక వ్యవస్థను తీవ్రంగా తెబ్బతీసింది.

ఈ క్రమంలో అత్యంత సురక్షితమైన పెట్టుబడి మార్గం బంగారం వైపు చూస్తున్నారు మదుపరులు. బంగారంలో భారీగా పెట్టుబడులు పెడుతున్నారు. దీంతో ధరలు భారీగా పెరుగుతున్నాయి. మరోవైపు.. ట్రంప్ టారిఫ్‌ల కారణంగా అమెరికా ఆర్థిక మాంద్యంలోకి వెళ్తోందన్న వార్తలూ ఆందోళన కలిగిస్తోంది. ఫెడరల్ రిజర్వ్ వడ్డీ రేట్లను తగ్గించవచ్చు. దీంతో డాలర్ విలువ తగ్గి బంగారానికి డిమాండ్ పెరుగుతుంది. అది ధరలు పెరిగేందుకు మరింత ఆజ్యం పోస్తుంది.

వాణిజ్య యుద్ధ భయాలతో బంగారం ధరల ర్యాలీ ఇంకా కొనసాగవచ్చని, ఇప్పట్లో ధరలు దిగివచ్చే సూచనలు కనిపించడం లేదని బులియన్ మార్కెట్ వర్గాలు చెబుతున్నాయి. అమెరికా డాలర్ విలువ పడిపోవడం, ఫెడ్ వడ్డీ రేట్ల తగ్గింపు అంచనాలు వంటివి బంగారం ధర మరింత పెరిగేందుకు కారణం కావచ్చంటున్నారు. అంతర్జాతీయ మార్కెట్లో స్పాట్ గోల్డ్ రేటు ఔన్సుకు 3,300 నుంచి 3500 డాలర్ల స్థాయికి చేరవచ్చని అంచనా వేస్తున్నారు. దేశీయ బులియన్ మార్కెట్లో చూస్తే స్వచ్ఛమైన బంగారం 10 గ్రాములకు రూ.97 వేల మార్క్ దాటవచ్చని తెలిపారు.