మహిళా కానిస్టేబుల్ ఇలా.. హెడ్ కానిస్టేబుల్ అలా

తెలంగాణలోని జనగామ, సూర్యాపేట జిల్లాల్లో ఆదివారం (ఏప్రిల్ 13న) రోజున రెండు పోలీస్ కుటుంబాల్లో చీకట్లు అలుముకున్నాయి. జనగామ జిల్లాలో వ్యక్తిగత కారణాలతో ఒక మహిళా కానిస్టేబుల్ ఆత్మహత్యకు పాల్పడగా.. సూర్యాపేట జిల్లాలో విధి నిర్వహణలో ఉన్న ఒక హెడ్ కానిస్టేబుల్ గుండెపోటుతో మృతి చెందారు. ఈ రెండు సంఘటనలు ఆయా కుటుంబాలతో పాటు, పోలీస్ శాఖలోనూ తీవ్ర విషాదాన్ని మిగిల్చాయి.

జనగామ జిల్లా పరిధిలోని కొడకండ్ల మండలం నీలిబండ తండాకు చెందిన నీలిమ.. వరంగల్ పోలీస్ కమిషనరేట్‌లో ఆర్మ్‌డ్ రిజర్వ్ (ఏఆర్) కానిస్టేబుల్‌గా విధులు నిర్వహిస్తున్నారు. క్రమం తప్పకుండా విధులకు హాజరవుతూ.. తోటి ఉద్యోగులతో స్నేహపూర్వకంగా ఉండే నీలిమ.. ఆదివారం రోజు తన నివాసంలో ఆత్మహత్యకు పాల్పడింది. ఈ ఘటన స్థానికంగా తీవ్ర విషాదాన్ని నింపింది. ఈ ఘటనపై కొడకండ్ల పోలీసులు కేసు నమోదు చేసుకుని దర్యాప్తు చేస్తున్నారు. మహిళా కానిస్టేబుల్ ఆత్మహత్యకు గల కచ్చితమైన కారణాలు ఇంకా తెలియాల్సి ఉంది.

మరోవైపు.. సూర్యాపేట జిల్లాలోని తిరుమలగిరి పోలీస్ స్టేషన్‌లో పనిచేస్తున్న హెడ్ కానిస్టేబుల్ దిగావత్ రమేష్ నాయక్ (50) గుండెపోటుతో మృతి చెందారు. తుంగతుర్తి మండల కేంద్రానికి చెందిన రమేష్ నాయక్ గత 3 సంవత్సరాలుగా తిరుమలగిరి పోలీస్ స్టేషన్‌లో హెడ్ కానిస్టేబుల్‌గా విధులు నిర్వర్తిస్తున్నారు. ఆదివారం మధ్యాహ్నం విధి నిర్వహణలో ఉండగా ఆయనకు ఒక్కసారిగా గుండెపోటు రావడంతో అక్కడికక్కడే కుప్పకూలిపోయారు. సహచర సిబ్బంది వెంటనే స్పందించి.. ఆస్పత్రికి తరలించగా.. పరీక్షించిన వైద్యులు ఆయన అప్పటికే మృతి చెందినట్లు తేల్చారు.

రమేష్ నాయక్‌కు భార్య, కుమారుడు, కుమార్తె ఉన్నారు. ఆయన మరణంతో తుంగతుర్తిలో విషాద ఛాయలు అలుముకున్నాయి. తిరుమలగిరి పోలీసులు కేసు నమోదు చేసుకుని రమేష్ నాయక్ మృతదేహాన్ని పోస్టుమార్టం నిమిత్తం తరలించారు. అనంతరం ఆయన స్వగ్రామంలో అంత్యక్రియలు నిర్వహించనున్నారు. ఈ రెండు వేర్వేరు ఘటనలు పోలీస్ శాఖలో పనిచేస్తున్న సిబ్బందిలోనూ, మృతి చెందిన వారి కుటుంబ సభ్యుల్లోనూ తీవ్రమైన విషాదాన్ని నింపాయి. సహచర ఉద్యోగులు వారి మృతికి సంతాపం తెలుపుతున్నారు.