వాస్తవాలు తెలుసుకొంటే... పాత పన్ను విధానమే బెటర్ అనక తప్పదు

ఆర్థిక సంవత్సరం 2024-25 ముగియడంతో.. ఇన్‌కంటాక్స్ రిటర్న్స్ ఫైలింగ్ ప్రాసెస్ ప్రారంభమైంది. ఆదాయపు పన్ను రిటర్న్‌ దాఖలు చేయడానికి చివరి తేదీ జులై 31 కాగా, పన్ను చెల్లింపుదారులకు తమ రిటర్న్స్ ఫైల్ చేసేందుకు దాదాపు మూడు నెలల సమయం ఉంది. ఈ సమయంలో, పన్ను చెల్లింపుదారులు అందుబాటులో ఉన్న రెండు పన్ను విధానాలలో ఒకదాన్ని ఎంచుకోవాల్సి ఉంటుంది. కొందరు కొత్త పన్ను విధానం అందించే తక్కువ పన్ను శ్లాబ్‌లకు ఆకర్షితులవుతుంటే, మరికొందరు పాత పన్ను విధానం అనుమతించే తగ్గింపులు, మినహాయింపుల కోసం దానివైపు మొగ్గుచూపుతున్నారు. కొన్ని సందర్భాల్లో కొత్త పన్ను విధానాన్ని ఎంచుకోవడం కంటే పాత పన్ను విధానాన్ని ఎంచుకోవడం మరింత ప్రయోజనకరంగా ఉంటుంది. దీనికి కారణాల్ని తెలుసుకుందాం.

1. పన్ను రహిత పెట్టుబడులు: పాత పన్ను విధానం సెక్షన్ 80సీ, 80డీ, 80జీ, 80డీడీవంటి వివిధ సెక్షన్ల కింద పెద్ద మొత్తంలో పెట్టుబడులు, ఖర్చులపై ఆదాయపు పన్ను తగ్గింపులను క్లెయిమ్ చేయడానికి పన్ను చెల్లింపుదారులను అనుమతిస్తుంది. ఈ నిబంధనల ప్రకారం అర్హత కలిగిన పెట్టుబడులు లేదా చెల్లింపులు మీరు చేసినట్లయితే, ఎక్కువ పన్ను ఆదా కోసం పాత పన్ను విధానాన్ని ఎంచుకోవడం మంచిది. అయితే, కొత్త పన్ను విధానంలో తగ్గింపులు పరిమితంగానే ఉన్నాయి.

2 హెచ్ఆర్ఏ మినహాయింపు కోసం..: పాత పన్ను విధానంలో, జీతం పొందే వ్యక్తులు సెక్షన్ 10(13ఏ) కింద హౌస్ రెంట్ అలవెన్స్ (హెచ్ఆర్ఏ) మినహాయింపును క్లెయిమ్ చేయవచ్చు, ఇది పన్ను విధించదగిన ఆదాయాన్ని పెద్ద మొత్తంలో తగ్గిస్తుంది. ఈ మినహాయింపు కొత్త పన్ను విధానంలో అందుబాటులో లేదు, కాబట్టి పాత విధానం మంచి ఎంపిక.

3. మీ పన్ను రేటు అత్యధికంగా ఉన్నప్పుడు: పాత పన్ను విధానంలో, ఆదాయం రూ. 10 లక్షలు దాటినప్పుడు గరిష్ట పన్ను రేటు 30 శాతం అమల్లోకి వస్తుంది, అయితే కొత్త పన్ను విధానంలో, గరిష్ట పన్ను రేటు రూ. 15 లక్షల వద్దే అమల్లోకి వస్తుంది. కాబట్టి, అత్యధిక పన్ను బ్రాకెట్‌లో ఉన్న పన్ను చెల్లింపుదారులకు పాత విధానమే బెటర్ అని నిపుణులు అంటున్నారు.

4. టాక్స్ కాలిక్యులేటర్ సూచన..: కనిపించేదంతా నిజం కాకపోవచ్చు. అందువల్ల, ఒక నిర్దిష్ట అంచనా వేయడానికి, రెండు విధానాల కింద పన్ను ఎంతో అంచనా వేసే ఆదాయపు పన్ను కాలిక్యులేటర్‌ను ఉపయోగించడం మంచిది. దేంట్లో తక్కువ పడుతుందో చూస్కొని దాన్ని ఎంచుకోవచ్చు.

కాబట్టి, మీ ఆర్థిక పరిస్థితి, క్లెయిమ్ చేయగల తగ్గింపులు/మినహాయింపులను బట్టి, పాత పన్ను విధానం ఇప్పటికీ చాలా మందికి మరింత ప్రయోజనకరమైన ఎంపికగా ఉండవచ్చు.