తెలుగు మూలాలున్న ఉషా చిలుకూరిని పెళ్లాడిన అమెరికా ఉపాధ్యక్షడు జేడీ వాన్స్

అమెరికా రాజకీయాలు ప్రస్తుతం ఉత్కంఠభరితంగా సాగుతున్న వేళ, రిపబ్లికన్ పార్టీ ఉపాధ్యక్ష అభ్యర్థి జేడీ వాన్స్ పేరు తరచుగా వినిపిస్తోంది. అయితే, ఆయనతో పాటు ఆయన భార్య, భారతీయ అమెరికన్ అయిన ఉషా వాన్స్ చిలుకూరి కూడా వార్తల్లో ప్రముఖంగా నిలుస్తున్నారు. అధికారిక కార్యక్రమాల్లో, దౌత్యపరమైన పర్యటనల్లో భర్త వెన్నంటే ఉంటూ అందరి దృష్టినీ ఆకర్షిస్తున్న ఉషకు, అంతే ప్రతిభావంతురాలైన ఓ సోదరి ఉన్నారు. ఆమె పేరు శ్రేయ చిలుకూరి. అక్క రాజకీయ జీవితంలో పాలుపంచుకుంటుంటే, చెల్లెలు మాత్రం ప్రపంచంలోని అత్యంత అధునాతన సాంకేతిక రంగాలలో తెరవెనుక కీలక పాత్ర పోషిస్తున్నారు. వీరి కుటుంబ నేపథ్యం, ముఖ్యంగా వారి తెలుగు మూలాలు ఆసక్తిని రేకెత్తిస్తున్నాయి.ఉషా వాన్స్ కాలిఫోర్నియాలోని శాన్ డియాగో శివార్లలో పుట్టి పెరిగారు. ఆమె తల్లిదండ్రులు, రాధాకృష్ణ 'క్రిష్' చిలుకూరి, డాక్టర్ లక్ష్మీ చిలుకూరి, 1970ల చివరలో భారతదేశం నుంచి అమెరికాకు వలస వెళ్లారు. వీరి కుటుంబ మూలాలు ఆంధ్రప్రదేశ్‌లోని వడ్డూరు గ్రామంలో ఉన్నాయి. అయితే, ఉషా తాతగారు రామశాస్త్రి చిలుకూరి ఐఐటీ మద్రాస్‌లో వ్యవస్థాపక ఫిజిక్స్ ప్రొఫెసర్లలో ఒకరిగా పనిచేయడంతో, కుటుంబం తదనంతర కాలంలో చెన్నైకి మారింది. ఉషా తండ్రి క్రిష్ మెకానికల్ ఇంజనీర్, ఆయన శాన్ డియాగో స్టేట్ యూనివర్సిటీలో బోధించారు. తల్లి లక్ష్మి చిలుకూరి ఒక గౌరవనీయ మాలిక్యులర్ బయాలజిస్ట్, ప్రస్తుతం యూసీ శాన్ డియాగోలోని సిక్స్త్ కాలేజీకి ప్రొవోస్ట్‌గా బాధ్యతలు నిర్వహిస్తున్నారు. తాను హిందూ కుటుంబంలో పెరిగానని, అదే తమ తల్లిదండ్రులను మంచి వ్యక్తులుగా, మంచి తల్లిదండ్రులుగా మార్చిందని ఉషా ఒక సందర్భంలో తెలిపారు.ఉషా వాన్స్ ప్రస్తుతం రాజకీయ ప్రాంగణంలో ప్రముఖంగా కనిపిస్తుండగా, ఆమె చెల్లెలు శ్రేయ చిలుకూరి మాత్రం భిన్నమైన మార్గాన్ని ఎంచుకున్నారు. పబ్లిసిటీకి దూరంగా ఉంటూనే ఇంజనీరింగ్, రక్షణ రంగాల్లో తనదైన ముద్ర వేస్తున్నారు. శ్రేయ 2012లో ప్రఖ్యాత డ్యూక్ యూనివర్సిటీ నుంచి మెకానికల్ ఇంజనీరింగ్‌లో పట్టా పొందారు. సాంకేతిక విద్యతో పాటు మానవీయ శాస్త్రాలపై ఆసక్తితో క్లాసికల్ సివిలైజేషన్స్‌ను కూడా అభ్యసించారు.విద్యాభ్యాసం తర్వాత, కార్డిస్ ఇంజనీరింగ్, లూడ్ 32 వంటి సంస్థలలో పనిచేశారు. అక్కడ గోప్రో, ఫిట్‌బిట్ వంటి వినియోగదారుల ఉత్పత్తుల కోసం విడిభాగాలను రూపొందించడంలో సహాయపడ్డారు. అయితే, ఆమె కెరీర్‌లోనే అత్యంత ముఖ్యమైన అధ్యాయం రేథియాన్ మిస్సైల్స్ & డిఫెన్స్‌లో పనిచేసిన ఐదేళ్ల కాలం. అక్కడ, ఆమె క్షిపణి అభివృద్ధి కార్యక్రమాలకు నాయకత్వం వహించడమే కాకుండా, మిలియన్ డాలర్ల విలువైన కాంట్రాక్టు మైలురాళ్లను సాధించారు. అమెరికా నౌకాదళానికి చెందిన ఒక ప్రధాన ప్రాజెక్టుకు డిప్యూటీ హార్డ్‌వేర్ లీడ్‌గా కూడా ఆమె వ్యవహరించారు.2022 నుంచి శ్రేయ చిలుకూరి, ప్రపంచంలోని అత్యంత ప్రముఖ సెమీకండక్టర్ టెక్నాలజీ కంపెనీలలో ఒకటైన ASML లో పనిచేస్తున్నారు. ఈ సంస్థ సెమీకండక్టర్ పరిశ్రమకు అవసరమైన అత్యంత సంక్లిష్టమైన, కీలకమైన యంత్రాలను తయారు చేయడంలో ప్రపంచ అగ్రగామిగా ఉంది. ఇలా, ఒకరు అమెరికా రాజకీయ యవనికపై ప్రముఖంగా కనిపిస్తుంటే, మరొకరు అత్యాధునిక సాంకేతిక రంగంలో నిశ్శబ్దంగా కీలక పాత్ర పోషిస్తూ, వలస వచ్చిన తమ కుటుంబం గర్వపడేలా చిలుకూరి సోదరీమణులు తమ విజయ పరంపరను కొనసాగిస్తున్నారు.