తెలంగాణ 1టెన్త్‌ క్లాస్‌ విద్యార్థులకు .. జూన్‌ 3 నుంచి సప్లిమెంటరీ పరీక్షలు

 తెలంగాణ 10వ తగరతి విద్యార్థులు ఎంతగానో ఎదురుచూస్తున్న టీఎస్‌ 10th క్లాస్‌ ఫలితాలు తాజాగా విడుదలయ్యాయి. ముఖ్యమంత్రి రేవంత్‌ రెడ్డి, పలువురు మంత్రులు, అధికారులతో కలిసి టీఎస్‌ ఎస్‌ఎస్‌సీ ఫలితాలు విడుదల చేశారు. ఈ ఫలితాల్లో ఈసారి 92.78 శాతం ఉత్తీర్ణత సాధించారు. గతేడాది కంటే 1.47 శాతం అధికంగా నమోదైనట్లు అధికారులు వెల్లడించారు. అయితే.. ఈసారి కూడా బాలికలే పైచేయి సాధించారు.

ఈ ఏడాది మొత్తం 5,07,107 మంది విద్యార్ధులు పదో తరగతి పరీక్షలు రాయగా.. అందులో 4,60,519 మంది (92.78 శాతం) పరీక్షల్లో ఉత్తీర్ణత సాధించారు. మొత్తం ఉత్తీర్ణతలో.. 94.26 శాతం బాలికలు ఉత్తీర్ణత సాధించగా.. 91.32 శాతం మంది బాలురు ఉత్తీర్ణత సాధించారు. అలాగే.. ప్రైవేటు పాఠశాలల్లో 94.21 శాతం విద్యార్థులు ఉత్తీర్ణులయ్యారు. గురుకుల పాఠశాలల్లో 98.7 శాతం ఉత్తీర్ణత నమోదైంది. ఈ ఏడాది ఫలితాల్లో మహబూబాబాద్‌ జిల్లాలో అత్యధికంగా 99.29 శాతం ఉత్తీర్ణత సాధించి ప్రథమ స్థానంలో నిలిచింది.

వికారాబాద్‌ జిల్లాలో అతి తక్కువగా 73.97శాతం ఉత్తీర్ణత నమోదై చివరి స్థానంలో నిలిచింది. కాగా రాష్ట్రంలో మార్చి 21వ తేదీ నుంచి ఏప్రిల్‌ 4 వరకు పదో తరగతి వార్షిక పరీక్షలను జరిగిన విషయం తెలిసిందే. అయితే.. ఈసారి సీజీపీఏ విధానాన్ని తొలగించడంతో విద్యార్ధులకు సబ్జెక్టుల వారీగా మార్కులు, గ్రేడింగ్స్ ఇచ్చారు. రాష్ట్రవ్యాప్తంగా 4,629 పాఠశాలలు 100 శాతం ఉత్తీర్ణత సాధించగా.. కేవలం 2 పాఠశాలల్లో మాత్రమే సున్నా ఉత్తీర్ణత శాతం నమోదైంది. ప్రైవేట్, రెగ్యులర్‌కు కలిపి మొత్తం పదో తరగతి ఫలితాల్లో 98.2 శాతం ఉత్తీర్ణత నమోదైంది.

జూన్‌ 3 నుంచి 13 వరకు టెన్త్‌ సప్లిమెంటరీ పరీక్షలు

తెలంగాణ టెన్త్‌ క్లాస్‌ అడ్వాన్స్‌డ్‌ సప్లిమెంటరీ పరీక్షలు జూన్‌ 3వ తేదీ నుంచి 13వ తేదీ వరకు నిర్వహించనున్నారు. ఆయా తేదీల్లో ఉదయం 9.30 గంటల నుంచి మధ్యాహ్నం 12.30 గంటల వరకు జరుగుతాయని తెలంగాణ ఎస్‌ఎస్‌సీ బోర్డు ప్రకటించింది. ఫీజు చెల్లింపునకు తుది గడువు మే 16వ తేదీగా నిర్ణయించారు. అలాగే.. రీకౌంటింగ్‌, రీ వెరిఫికేషన్‌కు మే 15వ తేదీ వరకు అవకాశం కల్పించారు. ఇందుకోసం ఒక్కో సబ్జెక్టుకు రూ.500 చొప్పున చెల్లించి రీకౌంటింగ్‌కు దరఖాస్తు చేసుకోవచ్చు. ఒక్కో సబ్జెక్టుకు రూ.1000 చొప్పున చెల్లించి రీవెరిఫికేషన్‌కు దరఖాస్తుకు అవకాశం కల్పించారు. విద్యార్థులు ఈ అవకాశాన్ని సద్వినియోగం చేసుకోవచ్చు.