హైదరాబాద్‌లో ఈ ప్రాంతానికి ఫుల్ డిమాండ్.... చదరపు అడుగుకు ఎంతంటే?

హైదరాబాద్ శివారు ప్రాంతాలు ఇప్పుడు రియల్ ఎస్టేట్ రంగంలో మరింత దూసుకెళ్తున్నాయి. ముఖ్యంగా ఉత్తర హైదరాబాద్ హాట్ స్పాట్‌గా మారుతోంది. సొంతింటి కల నెరవేర్చుకోవాలనుకునే వారి చూపు ఇప్పుడు కొంపల్లిని దాటి మేడ్చల్ వైపు పరుగులు తీస్తోంది. వేగంగా అభివృద్ధి చెందుతున్న మౌలిక సదుపాయాలు, మెరుగైన రవాణా సౌకర్యాలు, అందుబాటు ధరలు ఇందుకు ప్రధాన కారణం. ఉత్తర హైదరాబాద్‌కు గేట్‌వేగా చెప్పుకునే కొంపల్లి - మేడ్చల్ మార్గం రియల్ ఎస్టేట్ డెవలపర్లకు, కొనుగోలుదారులకు ఒక ఆకర్షణీయమైన కేంద్రంగా ఎదుగుతోంది. 200 అడుగుల విశాలమైన రహదారి, ట్రాఫిక్ సమస్యలను తగ్గించేందుకు నిర్మిస్తున్న ఫ్లైఓవర్లు ఈ ప్రాంత అభివృద్ధికి ఊతమిస్తున్నాయి. అంతేకాదు, భవిష్యత్తులో రవాణా మరింత సులభతరం చేసేందుకు మెట్రో రైలు విస్తరణ ప్రతిపాదనలు కూడా ఉన్నాయి. సిటీ, ఐటీ కారిడార్‌కు అనుసంధానం మెరుగుపడుతుండటంతో నివాస, వాణిజ్య కేంద్రాలు పెద్ద ఎత్తున విస్తరిస్తున్నాయి.

కొంపల్లి, మేడ్చల్ ప్రాంతాల మధ్య పోలికలు ఉండటం, జాతీయ రహదారికి అనుసంధానం, షాపింగ్ మాల్స్, మల్టీప్లెక్స్‌ల వంటి సదుపాయాలు కొనుగోలుదారులను ఆకర్షిస్తున్నాయి. భవిష్యత్తులో ఈ అభివృద్ధి ఓఆర్‌ఆర్ వరకు విస్తరించే అవకాశం ఉందని నిపుణులు భావిస్తున్నారు. అన్ని వర్గాల వారికి అందుబాటు ధరల్లో గృహాలు ఇక్కడ లభిస్తున్నాయి. సరసమైన గృహాల నుంచి విలాసవంతమైన విల్లాల వరకు అనేక ఎంపికలు ఉన్నాయి. ధరల విషయానికొస్తే, ప్రాంతం, ప్రాజెక్ట్‌ను బట్టి చదరపు అడుగు ధరలు రూ. 5,000 నుంచి రూ. 8 వేల వరకు ఉండగా, విల్లా ప్రాజెక్టుల్లో రూ. 12,000 వరకు ఉన్నాయి.

రవాణా, సామాజిక వసతులు..

కొంపల్లి - మేడ్చల్ ప్రాంతానికి రహదారి, రైలు మార్గాల ద్వారా రవాణా సౌకర్యం ఉంది. సికింద్రాబాద్ నుండి మేడ్చల్ వరకు ప్యాసింజర్, ఎంఎంటీఎస్ రైళ్లు నిత్యం రాకపోకలు సాగిస్తున్నాయి. బొల్లారం, అల్వాల్, గుండ్లపోచంపల్లి వంటి సమీప రైల్వే స్టేషన్లు కూడా అందుబాటులో ఉన్నాయి. భవిష్యత్తులో రవాణా మరింత మెరుగుపడనుంది. జేబీఎస్ నుండి మేడ్చల్ వరకు 24.5 కిలోమీటర్ల మేర మెట్రో రైలు మార్గం ప్రతిపాదిత దశలో ఉంది. దీనికి సంబంధించిన డీపీఆర్ ఇప్పటికే ప్రభుత్వానికి చేరింది. రాష్ట్ర మంత్రి మండలి ఆమోదం తర్వాత దీనిని కేంద్ర ప్రభుత్వానికి పంపనున్నారు. ఈ ప్రాజెక్ట్ కార్యరూపం దాల్చితే ఈ ప్రాంత ప్రజారవాణా వ్యవస్థ పూర్తిగా మారిపోతుంది. ప్రస్తుతం నిర్మాణంలో ఉన్న ఫ్లైఓవర్లు పూర్తయితే ప్రయాణ సమయం కూడా గణనీయంగా తగ్గుతుంది.

నివాసానికి అనుకూలమైన వాతావరణం ఉండాలంటే సామాజిక వసతులు కూడా ముఖ్యమైనవి. ఈ ప్రాంతంలో ఇప్పటికే అనేక పేరున్న విద్యాసంస్థలు ఉన్నాయి. గృహ సముదాయాలు పెరుగుతున్న నేపథ్యంలో మరిన్ని పాఠశాలలు ఏర్పాటు చేయడానికి యాజమాన్యాలు సిద్ధమవుతున్నాయి. ఆసుపత్రులు, వినోద కేంద్రాలు, రెస్టారెంట్లు, కన్వెన్షన్ సెంటర్లు కూడా ఇక్కడ పెద్ద సంఖ్యలో అందుబాటులో ఉన్నాయి. ఇవన్నీ కలిసి ఈ ప్రాంత రియల్ ఎస్టేట్‌ను మరింతగా ఆకర్షిస్తున్నాయి.

మొత్తానికి, ఉత్తర హైదరాబాద్ రియల్ ఎస్టేట్ రంగంలో ఒక కొత్త శక్తిగా ఎదుగుతోంది. కొంపల్లి, మేడ్చల్ వంటి ప్రాంతాలు అభివృద్ధికి చిహ్నంగా మారుతున్నాయి. మెరుగైన రవాణా సౌకర్యాలు, బలమైన సామాజిక వాతావరణంతో సొంతింటి కల నెరవేర్చుకోవాలనుకునే వారికి ఇది ఒక సువర్ణావకాశం!