నటి కరిష్మా కపూర్ మాజీ భర్త సంజయ్ కపూర్ కన్నుమూశారు

ప్రముఖ బాలీవుడ్ నటి కరిష్మా కపూర్ మాజీ భర్త, దేశంలోని ప్రముఖ పారిశ్రామికవేత్తలలో ఒకరైన సంజయ్ కపూర్ (53) కన్నుమూశారు. ఇంగ్లాండ్‌లో నిన్న‌ పోలో మ్యాచ్ ఆడుతుండగా ఆయనకు గుండెపోటు వచ్చింది. ఈ దురదృష్టకర సంఘటన గార్డ్స్ పోలో క్లబ్‌లో చోటుచేసుకుంది. ఆయన మరణవార్త వ్యాపార, సినీ వర్గాలను తీవ్ర దిగ్భ్రాంతికి గురిచేసింది.విశ్వసనీయ వర్గాల సమాచారం ప్రకారం, పోలో ఆడుతున్న సమయంలో సంజయ్ కపూర్ అకస్మాత్తుగా ఒక తేనెటీగను మింగినట్లు తెలిసింది. దీనివల్ల తీవ్రమైన అలెర్జీ రియాక్షన్ వచ్చి, ఆయనకు ఊపిరాడలేదు. ఈ పరిస్థితి గుండెపోటుకు దారితీసిందని ప్రాథమికంగా నిర్ధారించారు. వెంటనే ఆటను నిలిపివేసి, వైద్య సహాయం అందించే ప్రయత్నం చేసినప్పటికీ, ఫలితం లేకపోయింది. ఆయనను బతికించలేకపోయారు.సంజయ్ కపూర్ భారత ఆటోమోటివ్ రంగంలో కీలకమైన వ్యక్తి. ఆయన సోనా కామ్‌స్టార్  సంస్థకు ఛైర్మన్‌గా వ్యవహరిస్తూ, ఆ కంపెనీని ఆటోమోటివ్ విడిభాగాల తయారీలో, ముఖ్యంగా ఎలక్ట్రిక్ వాహనాలకు అవసరమైన భాగాల ఉత్పత్తిలో ప్రపంచస్థాయికి తీసుకెళ్లడంలో ప్రధాన పాత్ర పోషించారు. అలాగే ఆటోమోటివ్ కాంపోనెంట్ మాన్యుఫ్యాక్చరర్స్ అసోసియేషన్  అధ్యక్షుడిగా కూడా ఆయన తన నాయకత్వ పటిమతో, దార్శనికతతో పరిశ్రమ అభివృద్ధికి విశేష కృషి చేశారు.వ్యాపార రంగంలోనే కాకుండా, సంజయ్ కపూర్‌కు పోలో క్రీడ పట్ల అమితమైన ఆసక్తి ఉండేది. ఆయన దేశీయ, అంతర్జాతీయ పోలో టోర్నమెంట్‌లలో చురుకుగా పాల్గొనేవారు. ఆరియస్  పేరుతో సొంతంగా ఒక పోలో జట్టును కూడా నడిపారు. పోలో క్రీడా వర్గాల్లో ఆయన సుపరిచితులు.ఇక‌, సంజయ్ కపూర్ తన మరణానికి కొన్ని గంటల ముందు అహ్మదాబాద్‌లో జరిగిన ఘోర ఎయిర్ ఇండియా విమాన ప్రమాద బాధితులకు సోషల్ మీడియా ద్వారా సంతాపం తెలిపారు. "అహ్మదాబాద్‌లో జరిగిన ఎయిర్ ఇండియా విమాన ప్రమాద వార్త తీవ్రంగా కలచివేసింది. మృతుల కుటుంబాలకు నా ప్రగాఢ సానుభూతి. ఈ కష్ట సమయంలో వారికి మనోధైర్యం కలగాలని ప్రార్థిస్తున్నాను" అని ఆయన తన పోస్టులో రాసుకొచ్చారు. ఆయన చివరి సందేశం ఇదే కావడం పలువురిని తీవ్రంగా కలిచివేసింది. సంజయ్ కపూర్ గతంలో బాలీవుడ్ నటి కరిష్మా కపూర్‌ను వివాహం చేసుకున్నారు. వీరికి ఇద్దరు పిల్లలు ఉన్నారు. కరిష్మాతో విడిపోయిన తర్వాత ఆయన మోడల్, వ్యాపారవేత్త అయిన ప్రియా సచ్‌దేవ్‌ను వివాహం చేసుకున్నారు. ఆయన ఆకస్మిక మరణం పట్ల పారిశ్రామిక, సినీ రంగాలకు చెందిన ప్రముఖులు తీవ్ర దిగ్భ్రాంతి వ్యక్తం చేస్తూ, నివాళులు అర్పిస్తున్నారు.