నీట్ యూజీ ఫలితాల్లో భారీ మోసం.. రూ.90 లక్షలు వసూలు

మహారాష్ట్ర రాజధాని ముంబైలో నీట్ స్కామ్ బయటికి వచ్చింది. నీట్ పరీక్షలకు సంబంధించిన భారీ స్కోర్ బాగోతం వెలుగు చూసింది. నీట్ స్కోర్లను తారుమారు చేస్తామంటూ నీట్ పరీక్షలు రాసిన అభ్యర్థుల తల్లిదండ్రుల నుంచి భారీగా డబ్బులు వసూలు చేస్తున్న ఇద్దరు నిందితులను సీబీఐ అరెస్ట్ చేసింది. ఈ ఘటనపై కేసు నమోదు చేసి సీబీఐ అధికారులు దర్యాప్తు చేపట్టారు. అరెస్ట్ అయిన నిందితులు సోలాపూర్‌కు చెందిన సందీప్ షా, నవీ ముంబైకి చెందిన సలీం పాటిల్ అని గుర్తించారు. నేషనల్ టెస్టింగ్ ఏజెన్సీ (ఎన్‌టీఏ)లో తమకు అధికారులతో సంబంధాలు ఉన్నాయని చెప్పి నీట్ అభ్యర్థులను, వారి తల్లిదండ్రులను నిందితులు ఇద్దరూ మోసం చేసినట్లు ఆరోపణలు రావడంతో సీబీఐ అధికారులు రంగంలోకి దిగి.. పక్కా ప్లాన్ వేసి నిందితులను పట్టుకున్నారు.

ముఖ్యంగా నీట్ యూజీ 2025 పరీక్షలో తక్కువ స్కోర్ వచ్చిన అభ్యర్థుల మార్కులను తారుమారు చేసి.. ఎక్కువ మార్కులు వేస్తామని చెప్పి వారికి హామీ ఇచ్చి డబ్బులు వసూలు చేసినట్లు గుర్తించారు. ఈ క్రమంలోనే ఈ ఇద్దరు తల్లిదండ్రుల నుంచి రూ. 90 లక్షలు వసూలు చేసినట్లు సీబీఐ అధికారుల ప్రాథమిక దర్యాప్తులో తేలింది. సీబీఐ అధికారులు వెల్లడించిన సమాచారం ప్రకారం.. ఈ స్కామ్‌ను ఛేదించడానికి అధికారులు ప్రత్యేక వ్యూహాన్ని అనుసరించారు. నీట్ అభ్యర్థుల తల్లిదండ్రులుగా నటిస్తూ సీబీఐ అధికారులు నిందితుడు సందీప్ షాను ముంబైలోని లోయర్ పరేల్‌లో ఉన్న ఒక ఫైవ్ స్టార్ హోటల్‌లో కలిశారు. ఈ భేటీలో సందీప్ షా పలువురి తల్లిదండ్రుల నుంచి రూ.90 లక్షలు డిమాండ్ చేశాడు. బేరసారాల తర్వాత.. ఒక్కో అభ్యర్థికి రూ.87.5 లక్షలకు డీల్‌ను కుదుర్చుకున్నట్లు వెల్లడించారు.

నీట్ యూజీ పరీక్షలో అర్హత సాధించడానికి అవసరమయ్యే స్కోర్‌లను అభ్యర్థులకు వచ్చేలా చూసేందుకు నేషనల్ టెస్టింగ్ ఏజెన్సీ అధికారుల సహాయంతో తాము ప్రయత్నాలు చేస్తామని.. ఆ అధికారుల్లో తమకు తెలిసిన వారు ఉన్నారని విద్యార్థుల తల్లిదండ్రులను సందీప్ షా నమ్మించాడు. అయితే ఈ భేటీలోనే తల్లిదండ్రుల రూపంలో ఉన్న సీబీఐ అధికారులు సందీప్‌ షాను రెడ్‌హ్యాండెడ్‌గా పట్టుకున్నారు. అనంతరం విచారణ జరపగా.. ఈ మోసంలో సలీం పాటిల్, జావేద్ అలీ పాటిల్ అనే మరో ఇద్దరు వ్యక్తుల ప్రమేయం కూడా ఉన్నట్లు తేలింది. ప్రస్తుతం సలీం పాటిల్, సందీప్ షాలను అరెస్ట్ చేసిన సీబీఐ అధికారులు.. ఈ కేసులో మరింత లోతైన దర్యాప్తును కొనసాగిస్తున్నారు.