బ్రిటన్‌కు చెందిన ఎఫ్-35బీ స్టెల్త్ యుద్ధ విమానం తిరువనంతపురం అంతర్జాతీయ విమానాశ్రయంలో అత్యవసరంగా ల్యాండ్
national | Suryaa Desk | Published : Sun, Jun 15, 2025, 08:12 PM
బ్రిటన్‌కు చెందిన అత్యాధునిక ఎఫ్-35బీ స్టెల్త్ యుద్ధ విమానం శనివారం రాత్రి కేరళలోని తిరువనంతపురం అంతర్జాతీయ విమానాశ్రయంలో అత్యవసరంగా ల్యాండ్ అయింది. విమానంలో ఇంధనం తగ్గిపోవడం, హిందూ మహాసముద్రంలో వాతావరణం అనుకూలించకపోవడమే ఇందుకు ప్రధాన కారణాలుగా తెలుస్తోంది. ఈ ఘటనతో విమానాశ్రయ వర్గాలు, భారత వాయుసేన వెంటనే అప్రమత్తమయ్యాయి.బ్రిటన్‌కు చెందిన విమాన వాహక నౌక నుంచి భారత తీరానికి సుమారు 100 నాటికల్ మైళ్ల దూరంలో గగనతలంలో ఉండగా ఈ ఎఫ్-35బీ యుద్ధ విమానంలో సాంకేతిక సమస్య తలెత్తినట్లు సమాచారం. దీంతో పైలట్ శనివారం రాత్రి సుమారు 9:30 గంటల సమయంలో తిరువనంతపురం విమానాశ్రయ అధికారులను అత్యవసర ల్యాండింగ్ కోసం అనుమతి కోరారు. విమానాశ్రయంలో వెంటనే ఎమర్జెన్సీ ప్రకటించి, విమానం సురక్షితంగా ల్యాండ్ అయ్యేందుకు అన్ని ఏర్పాట్లు చేశారు.ఈ ఘటనపై భారత వాయుసేన ప్రతినిధి స్పందిస్తూ, "ఎఫ్-35 వంటి యుద్ధవిమానాలు దారి మళ్లడం సాధారణంగా జరిగేదే. విమాన భద్రతా కారణాల దృష్ట్యా ఐఏఎఫ్‌కు ఈ విషయం పూర్తిగా తెలుసు... అందుకే ల్యాండింగ్‌కు అవసరమైన సౌకర్యాలు కల్పించాం" అని పీటీఐ వార్తా సంస్థకు తెలిపారు. "అన్ని రకాల సహాయ సహకారాలు అందిస్తున్నాం. సంబంధిత ఏజెన్సీలతో సమన్వయం చేసుకుంటున్నాం" అని ఆయన వివరించారు.విమానాశ్రయానికి చెందిన ఒక అధికారి స్పందిస్తూ, "విమానం ప్రస్తుతం విమానాశ్రయంలోనే ఉంది. ఇంధనం నింపడం పూర్తయింది. భారత అధికారుల నుంచి అవసరమైన అనుమతులు లభించిన తర్వాత బయలుదేరేందుకు అనుమతిస్తాం" అని తెలిపారు. ఈ అత్యవసర ల్యాండింగ్‌పై బ్రిటన్ రక్షణ మంత్రిత్వ శాఖ నుంచి ఇప్పటివరకు ఎలాంటి అధికారిక ప్రకటన వెలువడలేదు.ఈ ఎఫ్-35బీ యుద్ధ విమానం, బ్రిటన్ కు చెందిన ‘హెచ్‌ఎమ్‌ఎస్ ప్రిన్స్ ఆఫ్ వేల్స్’ క్యారియర్ స్ట్రైక్ గ్రూప్‌లో భాగం. ప్రస్తుతం ఈ దళం ఇండో-పసిఫిక్ ప్రాంతంలో విధుల్లో ఉంది. ఇటీవలే భారత నౌకాదళంతో కలిసి సంయుక్త విన్యాసాల్లో కూడా పాల్గొంది. ఐదో తరానికి చెందిన ఈ స్టెల్త్ ఫైటర్ జెట్‌ను అమెరికాకు చెందిన లాక్‌హీడ్ మార్టిన్ సంస్థ అభివృద్ధి చేసింది. దీనికున్న అత్యాధునిక స్టెల్త్ సామర్థ్యాలు, ఎలక్ట్రానిక్ వార్‌ఫేర్ వ్యవస్థలు, డేటా షేరింగ్ సదుపాయాల వల్ల అమెరికా, యూకే, ఇజ్రాయెల్, నాటో దళాల్లో ఇది అత్యంత కీలకమైనదిగా మారింది. షార్ట్ టేకాఫ్ లేదా వర్టికల్ ల్యాండింగ్ చేసే సామర్థ్యం దీని ప్రత్యేకత
|
|