15 రోజుల్లోనే ఓటర్ ఐడీ కార్డులు, అప్లికేషన్ స్టేటస్ ఇలా తెలుసుకోండి
national | Suryaa Desk | Published : Fri, Jun 20, 2025, 05:54 PM
కేంద్ర ఎన్నికల సంఘం.. కొత్త ఓటర్ ఐడీ కార్డుల విషయంలో కీలక అప్‌డేట్ వెల్లడించింది. ఇకపై ఓటర్లకు కొత్త ఓటరు కార్డులను కేవలం 15 రోజుల్లోగా జారీ చేయనున్నట్లు కేంద్ర ఎన్నికల సంఘం ప్రకటించింది. ఇప్పటివరకు అప్లై చేసుకున్న తర్వాత.. ఎలక్టర్‌ ఫొటో ఐడెంటిటీ కార్డ్‌ (EPIC) ఓటర్లకు చేరేందుకు నెల రోజులకు పైగా సమయం పట్టేది. దీని వల్ల ఓటు హక్కు కోసం దరఖాస్తు చేసుకునేవారు ఎక్కువ రోజులు వేచి ఉండకుండా వారికి త్వరగా ఓటర్ కార్డు.. మంజూరు చేసే ప్రక్రియలో భాగంగా కేంద్ర ఎన్నికల సంఘం ఈ నిర్ణయం తీసుకుంది. ఇకపై కొత్త ఓటర్లతోపాటు.. ఇప్పటికే ఓటరుగా నమోదై వివరాల్లో మార్పులు, చేర్పులు చేసుకున్న ఓటర్లకు కూడా కొత్త ఓటరు కార్డులను 15 రోజుల్లోగా అందించనున్నారు. దీనికోసం కొత్త సిస్టమ్ ఆఫ్ ఆపరేషన్స్‌ను తీసుకువచ్చినట్లు ఈసీ తెలిపింది.
ఈ క్రమంలోనే ఓటర్ కార్డు, సవరణల కోసం దరఖాస్తు చేసుకున్నప్పటి నుంచి.. కార్జు అందేవరకు అన్ని వివరాలను ఎప్పటికప్పుడు మనం ట్రాక్ చేసుకునే అవకాశాన్ని కూడా కల్పించినట్లు వెల్లడించింది. ఎలక్షన్ ఆఫీసర్ ఎపిక్‌ జనరేట్‌ చేసినప్పటినుంచి పోస్ట్ ద్వారా దరఖాస్తుదారుడికి కార్డు డెలివరీ అయ్యేవరకు ప్రతి దశలోనూ రిజిస్టర్డ్ మొబైల్ నంబర్‌కు ఎస్ఎమ్ఎస్‌ ద్వారా సమాచారాన్ని ఎప్పటికప్పుడు అందించనున్నారు. ఓటర్ ఐడీ కార్డులను సజావుగా డెలివరీ చేసేందుకు వీలుగా ఎన్నికల సంఘం ఈసీఐనెట్ ప్లాట్‌ఫామ్‌లో ప్రత్యేక ఐటీ మాడ్యూల్‌ను ఏర్పాటు చేసినట్లు తెలిపారు. ఇది పోస్టల్‌ విభాగం ఏపీఐతో అనుసంధానమై పనిచేస్తుందని ఎన్నికల సంఘం స్పష్టం చేసింది.
కొత్త ఓటర్ ఐడీ కార్డు అప్లై చేసుకునే విధానం
ఎన్‌వీఎస్‌పీ వెబ్‌సైట్‌ (https://voters.eci.gov.in/)లోకి వెళ్లి.. ఫోన్‌ నంబర్, ఈ-మెయిల్‌ ఐడీతో సైన్‌అప్‌ కావాలి.
క్రియేట్‌ అకౌంట్‌పై క్లిక్‌ చేసి పేరు, పాస్‌వర్డ్‌ ఎంటర్ చేసి.. పాస్‌వర్డ్‌ను నిర్ధారించుకోవాలి.
ఆ తర్వాత మెయిల్‌ ఐడీకి ఓటీపీ వస్తుంది. ఆ ఓటీపీని ఎంటర్ చేసి వివరాలను ధృవీకరించుకోవాలి.
అనంతరం మొబైల్ నంబర్, పాస్‌వర్డ్‌, క్యాప్చా కోడ్ ఎంటర్ చేసి ఓటీపీతో లాగిన్‌ కావాలి.
కొత్తగా నమోదు చేసుకునేవారు ఫారం-6 వ్యక్తిగత వివరాలు, చిరునామా వంటివి నమోదు చేయాలి.
అడిగిన పత్రాలను అప్‌లోడ్‌ చేసి మరోసారి వివరాలను సరిచూసుకుని సబ్మిట్‌ చేయాలి.
అప్లికేషన్ స్టేటస్ తెలుసుకునే విధానం
ఎన్‌వీఎస్‌పీ పోర్టల్‌ (https://voters.eci.gov.in/)లో మొబైల్ నంబర్, పాస్‌వర్డ్‌, క్యాప్చా నమోదు చేసి ఓటీపీతో లాగిన్‌ కావాలి.
ట్రాక్ అప్లికేషన్ స్టేటస్‌పై క్లిక్‌ చేసి.. అప్లై చేసినపుడు ఎస్ఎమ్ఎస్‌లో వచ్చిన రిఫరెన్స్‌ నంబర్‌ను ఎంటర్ చేయాలి.
ఆ తర్వాత రాష్ట్రం ఎంపిక చేసుకుని సబ్మిట్‌ చేసిన తర్వాత అప్లికేషన్ స్టేటస్ తెలుసుకోవచ్చు.
|
|