కుమారుడి వివాహం పై ఇజ్రాయెల్ ప్రధాని వ్యాఖ్యలు వైరల్
international | Suryaa Desk | Published : Fri, Jun 20, 2025, 05:55 PM
ఇరాన్‌తో కొనసాగుతున్న తీవ్ర ఉద్రిక్తతల నడుమ తన కుమారుడి వివాహం వాయిదా పడటాన్ని వ్యక్తిగత నష్టంగా ఇజ్రాయెల్ ప్రధాని బెంజమిన్ నెతన్యాహు అభివర్ణించడం పెను దుమారం రేపింది. ప్రజలు ప్రాణాలను అరచేతిలో పెట్టుకుని బతుకుతుంటే, ప్రధాని ఇలాంటి వ్యాఖ్యలు చేయడం బాధ్యతారాహిత్యమని, ఆయనకు ప్రజల కష్టాల పట్ల ఏమాత్రం సానుభూతి లేదని సొంత దేశంలోనే తీవ్ర విమర్శలు వెల్లువెత్తుతున్నాయి.ఇటీవల ఇరాన్ క్షిపణి దాడికి గురైన బీర్ షెవాలోని సోరోకా ఆసుపత్రి ముందు నెతన్యాహు మాట్లాడుతూ... ప్రస్తుతం ఇజ్రాయెల్ ఎదుర్కొంటున్న సంక్షోభాన్ని రెండో ప్రపంచ యుద్ధ సమయంలో బ్రిటన్‌పై జరిగిన బాంబు దాడుల (బ్లిట్జ్)తో పోల్చారు. "ఇది నాకు బ్లిట్జ్ సమయంలో బ్రిటిష్ ప్రజలను గుర్తుచేస్తోంది. మనం కూడా ఒక బ్లిట్జ్ గుండా వెళుతున్నాం" అని ఆయన అన్నారు. ఈ క్రమంలో భద్రతా కారణాల దృష్ట్యా తన కుమారుడు అవ్నెర్ వివాహం రెండోసారి వాయిదా పడటాన్ని ఉదాహరణగా చూపుతూ, తమ కుటుంబం కూడా త్యాగాలు చేస్తోందని చెప్పే ప్రయత్నం చేశారు. ఈ వాయిదా తన కుమారుడి కాబోయే భార్యను, తన భార్య సారా నెతన్యాహును కూడా తీవ్రంగా బాధించిందని, నిరాశను తట్టుకున్న సారా ఒక హీరో అని నెతన్యాహు వ్యాఖ్యానించారు."చాలా మంది ప్రాణాలు కోల్పోయారు, కుటుంబాలు ఆప్తులను కోల్పోయి దుఃఖిస్తున్నాయి. దాన్ని నేను నిజంగా అర్థం చేసుకోగలను" అని చెబుతూనే, "మనలో ప్రతి ఒక్కరూ వ్యక్తిగత నష్టాన్ని భరిస్తున్నారు, నా కుటుంబం కూడా దీనికి మినహాయింపు కాదు" అని నెతన్యాహు అన్నారు.
|
|