ప్రముఖ ఈ-కామర్స్ దిగ్గజం అమెజాన్ తమ కార్పొరేట్ ఉద్యోగులకు ఊహించని షాకిచ్చింది

ప్రముఖ ఈ-కామర్స్ దిగ్గజం అమెజాన్ తమ కార్పొరేట్ ఉద్యోగులకు ఊహించని షాకిచ్చింది. పలువురు ఉద్యోగులను దేశంలోని కీలక నగరాల్లో ఉన్న తమ ప్రధాన కార్యాలయాలకు  తక్షణమే మారాలని ఆదేశాలు జారీ చేసింది. ఈ మేరకు 30 రోజుల డెడ్ లైన్ కూడా జారీ చేసింది. ఈ నిర్ణయంతో వేలాది మంది ఉద్యోగుల్లో తీవ్ర ఆందోళన నెలకొంది. కృత్రిమ మేధ  కారణంగా ఉద్యోగాల కోత ఉంటుందన్న భయాలు వెన్నాడుతున్న తరుణంలో, ఈ బదిలీల ఉత్తర్వులు వారిని మరింత కలవరపాటుకు గురిచేస్తున్నాయి.బ్లూమ్‌బెర్గ్ కథనం ప్రకారం, అమెజాన్ యాజమాన్యం తమ కార్పొరేట్ ఉద్యోగుల్లో చాలా మందిని సియాటిల్, ఆర్లింగ్టన్, వాషింగ్టన్ డీసీ వంటి ప్రధాన నగరాల్లోని హబ్‌లకు మారాలని ఆదేశించింది. వివిధ విభాగాల్లో పనిచేస్తున్న ఉద్యోగులు ఈ ఆదేశాల పరిధిలోకి వస్తారని, కొందరు తమ మేనేజర్లకు సమీపంలో ఉండేందుకు దేశంలో ఒక ప్రాంతం నుంచి మరో ప్రాంతానికి వెళ్లాల్సి ఉంటుందని తెలుస్తోంది. ఈ విషయాన్ని కంపెనీ విస్తృత ప్రకటనల ద్వారా కాకుండా, వ్యక్తిగత సమావేశాలు, అంతర్గత సమాచారం ద్వారా ఉద్యోగులకు తెలియజేసినట్లు సమాచారం. దీనిపై అమెజాన్ ప్రతినిధి స్పందిస్తూ, బృంద సభ్యులు కలిసి పనిచేయడం వల్ల ఉత్సాహం పెరుగుతుందని, బదిలీ అయ్యేవారికి వ్యక్తిగత పరిస్థితులకు అనుగుణంగా మద్దతు అందిస్తామని తెలిపారు.ఈ బదిలీల విషయంలో అమెజాన్ కఠినంగా వ్యవహరిస్తున్నట్లు తెలుస్తోంది. బదిలీ కావాలా వద్దా అని నిర్ణయించుకోవడానికి ఉద్యోగులకు కేవలం 30 రోజుల సమయం మాత్రమే ఇస్తున్నారని, ఆ తర్వాత 60 రోజుల్లోగా రాజీనామా చేయడం లేదా బదిలీ ప్రక్రియను పూర్తిచేయాలని ఒత్తిడి తెస్తున్నట్లు ఉద్యోగులు వాపోతున్నారు. నిర్దేశిత గడువులోగా బదిలీకి అంగీకరించకుండా రాజీనామా చేస్తే, ఎలాంటి సెవరెన్స్ ప్యాకేజీ ఉద్యోగ విరమణ ప్రయోజనాలు అందవని కంపెనీ స్పష్టం చేసినట్లు సమాచారం. ఇది ఉద్యోగులపై తీవ్ర ఆర్థిక, మానసిక ఒత్తిడిని కలిగిస్తోందని, ముఖ్యంగా కుటుంబాలున్నవారు, స్థిరపడినవారు తీవ్ర ఇబ్బందులు ఎదుర్కొంటున్నారని ఆవేదన వ్యక్తం చేస్తున్నారు.రాబోయే సంవత్సరాల్లో కృత్రిమ మేధ  వినియోగం పెరిగి, కార్పొరేట్ ఉద్యోగుల సంఖ్య గణనీయంగా తగ్గుతుందని అమెజాన్ సీఈఓ ఆండీ జెస్సీ ఇటీవల చేసిన వ్యాఖ్యల నేపథ్యంలో ఈ బదిలీల ప్రక్రియ ప్రాధాన్యత సంతరించుకుంది. ఏఐ గురించి తెలుసుకోవాలని, నైపుణ్యాలు పెంచుకోవాలని ఆయన ఉద్యోగులకు సూచించారు. అయితే, ఈ బదిలీల ద్వారా ఉద్యోగులను స్వచ్ఛందంగా రాజీనామా చేసేలా ప్రోత్సహించి, అధికారికంగా కోతలు విధించకుండా, సెవరెన్స్ భారం తగ్గించుకోవడానికే కంపెనీ ఈ మార్గాన్ని ఎంచుకుందని విశ్లేషకులు అభిప్రాయపడుతున్నారు. కాగా, 2022 నుంచి అమెజాన్ ఇప్పటికే పలు దశల్లో 27,000 కార్పొరేట్ ఉద్యోగాలను తొలగించిన విషయం విదితమే. ఈ తాజా పరిణామం ఉద్యోగుల భవిష్యత్తుపై నీలినీడలు కమ్ముకునేలా చేస్తోంది.