అణు పరీక్షలతో ఇరాన్‌లో భూకంపం

ఓవైపు ఇజ్రాయెల్‌తో భీకర యుద్ధం సాగుతున్న వేళ.. ఇరాన్‌లో భూకంపం సంభవించింది. సెమ్నాన్ ప్రాంతంలో సంభవించిన ఈ భూకంపం తీవ్రత రిక్టర్ స్కేలుపై 5.2గా నమోదైనట్లు స్థానిక అధికారులు వెల్లడించారు. భూకంప కేంద్రం భూమి ఉపరితలం నుంచి 10 కిలోమీటర్ల లోతులో ఉన్నట్లు తెలిపారు. అయితే ఇజ్రాయెల్‌తో ప్రస్తుతం తీవ్ర ఉద్రిక్త పరిస్థితులు నెలకొన్న సమయంలో ఇరాన్ రహస్యంగా అణు పరీక్షలు చేసి ఉండవచ్చనే అనుమానాలు ఇప్పుడు సర్వత్రా వినిపిస్తున్నాయి. ఈ భూకంపం సంభవించడానికి అదే కారణం కావచ్చని చాలా మంది భావిస్తున్నారు. ఇరాన్ అంతరిక్ష, క్షిపణి కాంప్లెక్స్‌కు దగ్గరలో భూకంపం రావడంతో ఈ అనుమానాలు మరింత బలపడుతున్నాయి.

సెమ్నాన్ ప్రావిన్స్‌లో అంతరిక్ష కేంద్రం, మిస్సైల్ కాంప్లెక్స్‌లు ఉన్నాయి. ఇవన్నీ ఇరాన్ రక్షణ శాఖ ఆధ్వర్యంలో నడుస్తున్నాయి. వీటికి దగ్గరలోనే భూకంపం సంభవించడం ఇప్పుడు చర్చకు దారి తీస్తోంది. ఈ భూకంపం ధాటికి ఉత్తర ఇరాన్‌లో చాలా ప్రాంతాల్లో ప్రకంపనలు వచ్చినట్లు స్థానికులు చెబుతున్నారు. అయితే ఈ భూకంపం వల్ల ఎలాంటి ప్రాణ నష్టం జరగలేదని.. ఆస్తి నష్టం కూడా తక్కువగానే ఉందని ఇరాన్ న్యూస్ ఏజెన్సీ ఏఆర్‌ఎన్‌ఏ తెలిపింది.

మరోవైపు.. ఇరాన్‌లో తరచుగా భూకంపాలు సంభవిస్తూ ఉంటాయి. అరేబియన్, యురేషియన్ టెక్టోనిక్ ప్లేట్లు కలిసే చోట ఉండటం వల్ల ఈ ప్రాంతంలో భూకంపాలు ఎక్కువగా వస్తుంటాయని శాస్త్రవేత్తలు పేర్కొంటున్నారు. దీన్నే ఆల్పైన్-హిమాలయన్ సెస్మిక్ బెల్ట్ అని కూడా అంటారు. ఇక్కడ ఏడాదికి దాదాపు 2 వేలకు పైగా భూకంపాలు నమోదవుతాయని చెబుతున్నారు. వాటిలో 5 కంటే ఎక్కువ భూకంప తీవ్రత ఉన్నవి 15 నుంచి 16 వరకు ఉంటాయని గణాంకాలు చెబుతున్నాయి. 2006 నుంచి 2015 మధ్య కాలంలో ఇక్కడ 96 వేల భూకంపాలు వచ్చాయని ఇరాన్ శాస్త్రవేత్తలు వెల్లడించారు.

అణ్వాయుధ పరీక్షలు చేసేటప్పుడు భూమిలో పేలుళ్లు జరుగుతాయి. దీనివల్ల భూమి కంపించినట్లు అవుతుంది. పేలుడు జరిగిన చోట టెక్టోనిక్ ప్లేట్లపై ఒత్తిడి పెరగడం వల్ల ఇలా జరుగుతుందని నిపుణులు చెబుతున్నారు. అయితే.. పేలుడు వల్ల భూకంపం వచ్చిందా లేదా సాధారణంగానే వచ్చిందా అనేది తెలుసుకోవడానికి భూకంప తరంగాలను చూడాలి.

కొందరు అణు పరీక్షల గురించి వస్తున్న వార్తలను కొట్టిపారేశారు. అయితే పది కిలోమీటర్ల లోతులో అణుపరీక్షలు నిర్వహించరని.. అలా చేయడం సాధ్యం కాదని కొందరు నిపుణులు చెప్పినట్లు ఇరాన్ మీడియా పేర్కొంది.