ప్రియుడితో ఎంజాయ్ చేస్తున్న వీడియోను భర్తకు పంపి.. భార్య టార్చర్

హర్యానా రాష్ట్రం రోహ్తక్ ప్రాంతానికి చెందిన మగన్ అలియాస్ అజయ్ అనే వ్యక్తికి అదే ప్రాంతానికి చెందిన దివ్య అనే అమ్మాయితో చాలా కాలం క్రితమే వివాహం జరిగింది. వీరికి ఓ బాబు కూడా పుట్టాడు. అయితే మొదట్లో తనతో బాగానే ఉన్న భార్య దివ్య ఈమధ్య దీపక్ అనే వ్యక్తితో ప్రేమలో పడింది. అతడో పోలీసు అధికారి కాగా ఆమె చేసే పనులకు అడ్డూ అదుపూ లేకుండా పోయింది. తొలి నాళ్లలో మగన్‌కు తెలియకుండా కాస్త చాటుమాటుగానే వ్యవహారం సాగించిన దివ్య.. ఆ తర్వాత భర్తకు తెలిసినా ఫర్వాలేదనుకుంది. ముఖ్యంగా ప్రియుడు దీపక్‌తోనే సెటిల్ అయిపోవాలనే ఉద్దేశం కల్గిన దివ్య.. తన భర్తకు ప్రియుడితో కలిసి ఎంజాయ్ చేసిన ఓ వీడియోను పంపింది.

అందులో ఆమె ప్రియుడు వీడియో తీస్తుండగా.. పొట్టి గౌను వేసుకున్న ఆమె డ్యాన్స్ చేస్తూ కనిపించింది. అయితే ఇదే వీడియోను దివ్య తన భర్త మగన్‌కు పంపింది. అది చూసి తట్టుకోలేకపోయిన అతడు కన్నీరుమున్నీరుగా విలపించాడు. తనను, తన కొడుకును మోసం చేయొద్దని వేడుకుంటూనే.. ప్రియుడిని మర్చిపోవాలని కోరాడు. కానీ దివ్య మాత్రం తనకు ప్రియుడే కావాలని తేల్చి చెప్పింది. అంతటితో ఆగకుండా.. ప్రియుడితో వెళ్లిపోవడానికి తనకు డబ్బులు కూడా కావాలని డిమాండ్ చేసింది. అయితే భర్త తన దగ్గర లేవని చెప్పగా.. మీ నాన్నను చంపేసి, ఆపై ఆస్తి అమ్మి డబ్బులు ఇవ్వాలంటూ వేధించడం ప్రారంభించింది. ప్రతిరోజూ ఇలాగే టార్చర్ చేయగా.. ఇటీవలే మదన్ తన బ్రేస్‌లెట్, సాగుచేసిన ధాన్యం అమ్మగా వచ్చిన డబ్బులన్నీ కలిపి.. అంటే 3.5 లక్షల రూపాయలను భార్యకు ఇచ్చాడు.

అవన్నీ తీసుకున్న దివ్య.. ఇంకా కావాలని అడిగింది. మరో లక్షన్నర ఇస్తే తాను వెళ్లిపోతానంటూ వివరించింది. కానీ తన వద్ద డబ్బులు లేకపోవడంతో ఇవ్వలేకపోయాడు. ఆమె వేధింపులు భరించలేక విడాకుల కోసం న్యాయవాది వద్దకు వెళ్లగా.. అమ్మాయిలు ఒక్కసారి ఏడుస్తూ మాట్లాడితే అంతా ఆమెకే సపోర్ట్ చేస్తారని వివరించారు. ఈ మాటలతో తనకింక న్యాయం జరగదని భావించిన మగన్ ఆత్మహత్య చేసుకోవాలనుకున్నాడు. అయితే అంతకంటే ముందు బార్య అరాచకాలు అందరికీ తెలియాలనుకున్నాడు. అందుకోసం ఇదంతా వివరిస్తూ.. ఓ సెల్ఫీ వీడియో తీశాడు. దాన్ని సోషల్ మీడియాలో పోస్ట్ చేశాడు. అలాగే భార్య దివ్య.. ఆమె ప్రియుడు దీపక్‌తో కలిసి ఎంజాయ్ చేస్తూ పంపిన వీడియోను కూడా షేర్ చేశాడు.

తాను ఆత్మహత్య చేసుకోవాలనుకుంటున్నాని.. అయితే అందుకు కారణం భార్యేనని వీడియోలో వివరించాడు. ఆమె పంపిన వీడియో దగ్గర నుంచి తనకు చేసిన అన్యాయం, అతడి వద్ద తీసుకున్న డబ్బుల వివరాలను సైతం వెల్లడించాడు. మరిన్ని డబ్బులు కావాలని వేధిస్తున్నారని.. అయితే అవి తన వద్ద లేకపోవడం వల్లే ఆత్మహత్య చేసుకుంటున్నట్లు చెప్పుకొచ్చాడు. తన తండ్రిని చంపి డబ్బులు తేవాలని అడుగుతోందని.. కన్నతండ్రిని ఎలా చంపాలంటూ కన్నీటి పర్యంతం అయ్యాడు. అలాగే తాను చనిపోయాక తన కొడుకు.. తన తల్లిదండ్రుల వద్దే ఉండాలని కోరుతూ ఒక చెట్టుకు ఉరివేసుకొని ఆత్మహత్య చేసుకున్నాడు.

ప్రస్తుతం ఇందుకు సంబంధించిన వీడియోలు నెట్టింట తెగ వైరల్ అవుతున్నాయి. ఈ ఘటనపై పోలీసులు కేసు నమోదు చేసి దర్యాప్తు ప్రారంభించారు. మగన్ ఆరోపణలపై విచారణ జరిపి, బాధ్యులపై కఠిన చర్యలు తీసుకోవాలని ప్రజలు డిమాండ్ చేస్తున్నారు. ముఖ్యంగా భార్యల వేధింపులు తాళలేక చాలా మంది పురుషులు ప్రాణాలు తీసుకుంటున్నారని.. అలాంటి వారి కోసం ఓ ప్రత్యేక చట్టం తీసుకు రావాలంటూ డిమాండ్ చేస్తున్నారు.