ఒప్పందాన్ని ఉల్లంఘించిన ఇరాన్.. గట్టిగా స్పందిస్తామంటూ ఇజ్రాయెల్ హెచ్చరిక

 పశ్చిమాసియాలో గత 12 రోజులుగా ఇజ్రాయెల్-ఇరాన్ దేశాల మధ్య రాజుకుంటున్న యుద్ధ వాతావరణం.. మంగళవారం ఉదయం కుదిరిన కాల్పుల విరమణ ఒప్పందంతో కొంత సద్దుమణిగిందని అంతా భావించారు. ఇరు దేశాలు కూడా అమెరికా అధ్యక్షుడు ట్రంప్ వల్లే ఇదంతా సాధ్యమైందని చెప్పారు. తాము కూడా కాల్పుల విరమణకు అంగీకరిస్తున్నట్లు పేర్కొన్నారు. కానీ ఆ సంతోషం ఎంతోసేపు నిలవలేదు. ఒప్పందం కుదిరిన కొన్ని గంటలకే ఇరాన్ ఆ ఒప్పందాన్ని ఉల్లంఘించి తమపై క్షిపణులతో దాడి చేసిందని ఇజ్రాయెల్ ఆరోపించింది. అలాగే ఈ దాడికి గట్టిగా బదులిస్తామని టెల్ అవీవ్ హెచ్చరించింది.

కాల్పుల విరమణ ఒప్పందం అమలులోకి వచ్చిన రెండు గంటలకే ఇరాన్ నుండి రెండు బాలిస్టిక్ క్షిపణులు తమ గగనతలంలోకి ప్రవేశించాయని ఇజ్రాయెల్ సైన్యం (IDF) ధ్రువీకరించింది. దీంతో ఉత్తర ఇజ్రాయెల్‌లోని పలు ప్రాంతాల్లో సైరన్‌లు మోగాయి. ప్రజలంతా వెంటనే వెళ్లి సురక్షిత ప్రాంతాల్లో ఆశ్రయం పొందాలని ఆదేశాలు జారీ చేశారు. ఈ అనూహ్య దాడి కాల్పుల విరమణపై తీవ్ర సందేహాలను రేకెత్తించింది.

ఇరాన్ చర్యపై ఇజ్రాయెల్ రక్షణ మంత్రి గాడి కాట్జ్ తీవ్ర ఆగ్రహం వ్యక్తం చేశారు. కాల్పుల విరమణ ఒప్పందాన్ని ఉల్లంఘించిన ఇరాన్‌పై కఠినంగా స్పందించాలని ఇజ్రాయెల్ రక్షణ దళాలను (IDF) ఆదేశించినట్లు ఆయన తెలిపారు. టెహ్రాన్‌లోని ముఖ్యమైన ప్రాంతాలపై వైమానిక దాడులు చేయాలని సూచించినట్లు కాట్జ్ వెల్లడించారు. ఇజ్రాయెల్ వైమానిక దళం, సైన్యం పూర్తి అప్రమత్తంగా ఉండాలని ఆయన హెచ్చరికలు జారీ చేశారు.

వాస్తవానికి.. అమెరికా అధ్యక్షుడు డొనాల్డ్ ట్రంప్ మొదట ఇరాన్, ఇజ్రాయెల్ మధ్య కాల్పుల విరమణ ఒప్పందం జరగనుందని ప్రకటించారు. అయితే ఈ ప్రకటనపై ఇరాన్ వైపు నుంచి గందరగోళమైన స్పందన వచ్చింది. తాము ఇంకా కాల్పుల విరమణ ఒప్పందం చేసుకోలేదని చెబుతూనే.. తమ సైనిక కార్యకలాపాలు ముగిశాయని పేర్కొంది. ఆ తర్వాత ఇరు దేశాల మధ్య దాడులు కొనసాగాయి. వెంటనే కాల్పుల విరమణ అమల్లోకి వచ్చిందని ఇరాన్ ప్రకటించిన కొద్ది సేపటికే, ఇజ్రాయెల్ కూడా ట్రంప్ ప్రతిపాదనను అంగీకరించింది.

ఇజ్రాయెల్ ప్రధానమంత్రి బెంజమిన్ నెతన్యాహు కాల్పుల విరమణను అంగీకరిస్తూ, "కాల్పుల విరమణ మాకు ఒకే.. థ్యాంక్యూ ట్రంప్" అని వ్యాఖ్యానించారు. ఈ ప్రకటన వెలువడిన కొద్దిసేపటికే ఇరాన్ దాడికి పాల్పడటం, కాల్పుల విరమణ ఒప్పందం యొక్క భవిష్యత్తుపై తీవ్ర అనిశ్చితిని నింపింది. మధ్యప్రాచ్యంలో నెలకొన్న ఉద్రిక్తతలు మళ్లీ తీవ్ర స్థాయికి చేరే ప్రమాదం ఉందని విశ్లేషకులు హెచ్చరిస్తున్నారు.