కపిల్ శర్మ కెనడా కేఫ్‌పై కాల్పులు.. 'అది మీరు ఆడుకునే గ్రౌండ్ కాదంటూ' ఖలిస్థానీ ఉగ్రవాది వార్నింగ్

ప్రముఖ నటుడు, హాస్యనటుడు కపిల్ శర్మకు చెందిన కెండనాలోని కేఫ్‌పై కాల్పులు జరగడం విషయం అందరికీ తెలిసిందే. మూడ్రోజుల క్రితమే ఈ కాల్పులు జరగ్గా.. ఖలిస్థానీ ఉగ్రవాదులే ఈ దాడికి పాల్పడినట్లు ఆరోపణు ఉన్నాయి. కేఫ్ ప్రారంభించిన కొన్ని రోజుల్లోనే దాడి జరగడం.. ఇందుకు సంబంధించిన దృశ్యాలు సోషల్ మీడియాలో వైరల్ మారడంతో దేశవ్యాప్తంగా సంచలనం రేగింది. ఈ బాధ నుంచి కపిల్ శర్మ కోలుకోకముందే ఖలిస్థానీ ఉగ్రవాది, సిఖ్స్ ఫర్ జస్టిస్ వ్యవస్థాపకుడు గుర్పాత్వంత్ సింగ్ పన్నూ బెదిరింపులకు పాల్పడ్డారు. "కెనడా నీ క్రీడా మైదానం కాదు" అని కపిల్ శర్మను హెచ్చరించారు.

'క్యాప్స్ కేఫ్'పై కాల్పులు..

బ్రిటిష్ కొలంబియాలోని సర్రేలో కపిల్ శర్మ కొత్తగా ప్రారంభించిన ఈ రెస్టారెంట్‌పై బుధవారం రాత్రి గుర్తు తెలియని వ్యక్తులు కాల్పులు జరిపారు. ముఖ్యంగా కారులో వచ్చిన ఓ ఆగంతకుడు అక్కడి నుంచి దాడికి పాల్పడ్డాడు. అయితే ఈ దాడులు చేసింది ఖలిస్థానీ ఉగ్రవాదులేనని పెద్ద ఎత్తున ఆరోపణలు వచ్చాయి. ముఖ్యంగా 'క్యాప్స్ కేఫ్' పై జరిగిన కాల్పుల ఘటనకు నిషేధిత ఉగ్రవాద సంస్థ బాబర్ ఖల్సా ఇంటర్నేషనల్ తో సంబంధం ఉన్న హర్‌జీత్ సింగ్ లద్ధీ, తూఫాన్ సింగ్‌లు బాధ్యత వహించినట్లు పెద్ద ఎత్తున వార్తలు వచ్చాయి.

 ఇదంతా జరిగిన కొద్ది రోజులకే పన్నూ నుంచి కపిల్ శర్మకు బెదిరింపులు రావడం గమనార్హం. కెనడా గడ్డపై వ్యాపార ముసుగులో కపిల్ శర్మ హిందుత్వ భావజాలాన్ని ప్రోత్సహిస్తున్నారని పన్నూ ఆరోపించారు. ఇలాంటి ఆలోచనలు కెనడాలో వేళ్లూనుకోవడానికి తాము అనుమతించబోమని స్పష్టం చేశారు. 'క్యాప్స్ కేఫ్' కేవలం ఒక కామెడీ వేదిక మాత్రమేనా లేక హిందుత్వ ఎగుమతికి సంబంధించిన పెద్ద వ్యూహంలో భాగమా అని ఈ సందర్భంగానే కపిల్ శర్మను ప్రశ్నించారు. కపిల్ శర్మ పెట్టుబడులు కేవలం ఆర్థిక ప్రయోజనాల కోసం కాకుండా.. సైద్ధాంతిక విస్తరణకు ఒక ముసుగుగా పన్నూ పేర్కొనడం ఆందోళన కలిగిస్తోంది. ఈ ఘటన, పన్నూ బెదిరింపులు భారత్-కెనడా మధ్య సంబంధాలపై తీవ్ర ప్రభావం చూపే అవకాశం ఉందని అంతా భావిస్తున్నారు.

గుర్పాత్వంత్ సింగ్ పన్నూ 2019లో భారత ప్రభుత్వం "వ్యక్తిగత ఉగ్రవాది"గా ప్రకటించింది. ఇప్పటికే అతనిపై అనేక కేసులు నమోదై అయ్యాయి. అతను స్థాపించిన సిఖ్స్ ఫర్ జస్టిస్  సంస్థ కూడా భారత దేశంలో దేశ వ్యతిరేక కార్యకలాపాలకు పాల్పడుతున్నందుకు నిషేధించారు. కెనడాలో భారత వ్యతిరేక కార్యకలాపాలు, ఖలిస్థానీ సానుభూతిపరుల పెరుగుదలపై భారత్ ఆందోళన వ్యక్తం చేస్తున్న నేపథ్యంలో.. ఈ తాజా పరిణామాలు ఉద్రిక్తతలను మరింత పెంచుతున్నాయి.