రాఖీ సంబరాల్లో దేశవ్యాప్తంగా రూ.17,000 కోట్ల వ్యాపారం.. చైనీస్ రాఖీలకు గుడ్‌బై!

పేరెంట్స్, సోదరీమణుల ఆనందానికి కేంద్రంగా రాఖీ పండుగ
రాఖీ పండుగ దగ్గరపడుతుండటంతో దేశవ్యాప్తంగా మార్కెట్లు కోలాహలంగా మారాయి. అన్నదమ్ములు, తోబుట్టువుల మధ్య ప్రేమను ప్రతిబింబించే ఈ పర్వదినం కోసం రాఖీలు, గిఫ్ట్‌ల కొనుగోళ్లతో షాపింగ్ సెంటర్లు సందడిగా కనిపిస్తున్నాయి. ముఖ్యంగా మహిళలు పెద్ద సంఖ్యలో షాపింగ్‌కు వస్తూ రాఖీలు, దుస్తులు, బ్యూటీ ప్రొడక్ట్స్ వంటి వస్తువులను కొనుగోలు చేస్తున్నారు.
రూ. 17,000 కోట్లను దాటి రిటైల్ వ్యాపారం
ఈ సంవత్సరం రాఖీ సందర్భంగా దేశ వ్యాప్తంగా దాదాపు రూ.17,000 కోట్లకు పైగా వ్యాపారం జరిగే అవకాశం ఉందని కాన్ఫెడరేషన్ ఆఫ్ ఆల్ ఇండియా ట్రేడర్స్ (CAIT) అంచనా వేసింది. పండుగ సందర్భాల్లో సాంప్రదాయ ఉత్పత్తులకు డిమాండ్ పెరగడం, ఆన్‌లైన్, ఆఫ్‌లైన్ వ్యాపారాల వృద్ధి కారణంగా ఈసారి రిటైల్ రంగం మరింత బలపడినట్లు సమాచారం.
చైనీస్ వస్తువులకు బై చెప్పిన భారతీయులు
ఈసారి మార్కెట్లలో చైనీస్ రాఖీలు, ఇతర చైనా వస్తువులు కనిపించడం లేదని CAIT సెక్రటరీ జనరల్ & చాందినీ చౌక్ ఎంపీ ప్రవీణ్ ఖండేల్వాల్ తెలిపారు. స్థానికంగా తయారైన ఉత్పత్తులకు ప్రాధాన్యం పెరుగుతూ, 'వోకల్ ఫర్ లోకల్' మంత్రాన్ని అనుసరిస్తున్న మన దేశ ప్రజలు చైనీస్ ఉత్పత్తులపై బహిష్కరణకు శ్రీకారం చుట్టారని ఆయన తెలిపారు.
స్థానిక ఉత్పత్తులకు ఊపు – ఉపాధికి ఊతం
దేశీయంగా తయారైన రాఖీలు, హస్తకళ ఉత్పత్తులు, స్వదేశీ గిఫ్ట్ ఐటెమ్స్‌కు డిమాండ్ పెరుగుతుండటంతో చిన్న వ్యాపారులు, హస్తకారులకు ఉపాధి అవకాశాలు పెరిగాయి. పండుగ సందర్భంగా ఇలా దేశీయ మార్కెట్ పటిష్టంగా మారడమే కాకుండా, స్థానిక ఆర్ధిక వ్యవస్థకు కూడా బలాన్నిస్తోంది.