సత్య నాదెళ్లకు మస్క్ వార్నింగ్.. స్ట్రాంగ్ కౌంటర్ ఇచ్చిన మైక్రోసాఫ్ట్ బాస్

భారత్ సహా ప్రపంచ దేశాల్లో ఆర్టిఫిషియల్ ఇంటెలిజెన్స్ వినియోగం పెరిగిన సంగతి తెలిసిందే. మొదట్లో దీనిపై కాస్త వెనుకడుగు వేసిన భారత్.. భవిష్యత్తు సవాళ్లు, లక్ష్యాల కోసం దీనిని అందిపుచ్చుకునే ప్రయత్నం చేస్తోంది. అన్ని రంగాల్లోకి దీనిని తెచ్చేందుకు వీలైనంత ప్రయత్నాలు చేస్తోంది. ఇప్పటికే మన దేశంలోని చాలా కంపెనీలు ఏఐతో కొత్త కొత్త ప్రయోగాలు చేస్తున్నాయి. ముఖ్యంగా ఐటీ కంపెనీలు కూడా ప్రత్యేకంగా ఉద్యోగులకు దీని గురించి శిక్షణ ఇస్తున్నాయి. ఏఐని సమర్థవంతంగా వాడి.. మరింత ముందుకు దూసుకెళ్లేలా అన్ని కంపెనీలు.. ప్రణాళికలు సిద్ధం చేసుకుంటున్నాయి.

ఏఐ మోడల్స్ విషయానికి వస్తే.. మైక్రోసాఫ్ట్ భాగస్వామ్యంలోని ఓపెన్ ఏఐ సంస్థ నుంచి చాట్‌జీపీటీ మోడల్స్ ఉండగా.. గూగుల్ విషయానికి దీనికి జెమిని మోడల్ ఉంది. ఇక టెస్లా, స్పేస్ ఎక్స్, ఎక్స్ (ట్విట్టర్) సంస్థల అధినేత ఎలాన్ మస్క్‌కు ఎక్స్ నుంచి గ్రోక్ ఏఐ ఉంది.

ఈ విషయం కాస్త పక్కనబెడితే.. ఇప్పుడు ఓపెన్ ఏఐ ఇప్పుడు పవర్‌ఫుల్ ఏఐ మోడల్ 'చాట్‌జీపీటీ -5' ని లాంఛ్ చేసింది. ఈ క్రమంలోనే మైక్రోసాఫ్ట్ బాస్ సత్య నాదెళ్లను ఉద్దేశించి.. ఎలాన్ మస్క్ సంచలన వ్యాఖ్యలు చేసిన సంగతి తెలిసిందే. "మైక్రోసాఫ్ట్‌ను ఓపెన్ ఏఐ ఏదో ఒక రోజు తినేస్తుంది.' అని ఎక్స్ వేదికగా విమర్శించారు. అయితే దీనిపై తాజాగా నాదెళ్ల స్పందించారు. ఈయన స్పందించిన తీరు నెటిజన్లను ఆకట్టుకుంటుంది.

జీపీటీ- 5 రిలీజ్, పెర్ఫామెన్స్, కెపాసిటీ గురించి సత్య నాదెళ్ల ట్విట్టర్‌లో పోస్ట్ చేశారు. జీపీటీ -5.. మైక్రోసాఫ్ట్ 365 కో పైలట్, గిట్ హబ్, అజురే ఏఐ ఫౌండ్రీ వంటి అన్ని ప్లాట్‌ఫాంల్లో అందుబాటులోకి వస్తుందని సత్య నాదెళ్ల తెలిపారు. ఇది తమ పార్ట్‌నర్ ఓపెన్ ఏఐ నుంచి వచ్చిన అత్యంత శక్తిమంతమైన మోడల్ అని పేర్కొన్నారు. ఇది మైక్రోసాఫ్ట్ అజురెలో ట్రైన్ అయిన మోడల్ అని తెలిపారు.

>> దీంతో సత్య నాదెళ్ల పోస్ట్‌కు బదులిస్తూ.. జీపీటీ-5 ని ఉద్దేశిస్తూ మస్క్ స్పందించారు. 'ఏదో ఒక రోజు ఓపెన్ ఏఐ.. మైక్రోసాఫ్ట్‌ను తినేస్తుంది.' అని అన్నారు మస్క్. గతంలో మాదిరిగానే ఓపెన్ ఏఐ పై తన కోపాన్ని ప్రదర్శించారు. ఇక కాస్త ఆలస్యంగా మస్క్ పోస్ట్‌పై సత్య నాదెళ్ల రియాక్ట్ అయ్యారు. "దీని కోసం గత 50 సంవత్సరాలుగా చాలా మంది ట్రై చేస్తున్నారు. రోజూ కొత్తగా నేర్చుకోవడం, భాగస్వాములు కావడం, పోటీపడటం అనేది కొనసాగుతుంది.' అని కౌంటర్ ఇచ్చారు.

ఇక్కడే సత్య నాదెళ్ల రియాక్షన్‌పై నెటిజన్లు స్పందిస్తున్నారు. ఎంత లాజిక్‌తో కొట్టారని ఒకరు అంటే.. చాలా మర్యాదగా బదులిచ్చినట్లు మరొకరు అన్నారు. అందుకే మైక్రోసాఫ్ట్ ఏళ్లుగా అగ్రభాగాన కొనసాగుతుందని.. గెలుస్తోందని ఇంకొకరు అన్నారు. "ఎంత సింపుల్‌గా తిప్పికొట్టారు.. ఎంతైనా సత్య నాదెళ్ల గ్రేట్' అని ఒక నెటిజన్ ప్రశంసించారు.