కశ్మీరీ పండిట్ హత్య కేసులో కీలక పరిణామం..: 35 ఏళ్ల తర్వాత అక్కడ సోదాలు

జమ్మూ కాశ్మీర్‌లో 35 ఏళ్ల క్రితం జరిగిన ఒక దారుణమైన హత్య కేసులో ఇప్పుడు కొత్తగా దర్యాప్తు ప్రారంభమైంది. 1990లలో కశ్మీరీ పండిట్లపై జరిగిన దాడులలో భాగంగా హత్యకు గురైన నర్సు సార్లా భట్ కేసును తిరిగి విచారించేందుకు స్టేట్ ఇన్వెస్టిగేషన్ ఏజెన్సీ (SIA) రంగంలోకి దిగింది. ఇందులో భాగంగా కశ్మీర్ కేంద్రంలోని ఎనిమిది ప్రదేశాలలో ఏకకాలంలో దాడులు నిర్వహించింది. ఈ చర్యలు జమ్మూ కాశ్మీర్‌లో మళ్లీ రాజకీయ ప్రకంపనలు సృష్టిస్తున్నాయి.

అసలేం జరిగిందంటే..?

1990లో కశ్మీర్ లోయలో ఉగ్రవాదం తలెత్తినప్పుడు.. వేలాది మంది కశ్మీరీ పండితులు తమ ఇళ్లను, ఆస్తులను వదిలి పారిపోవలసి వచ్చింది. ఆ సమయంలోనే శ్రీనగర్‌లోని సౌరాలో ఉన్న ఒక ప్రభుత్వ ఆసుపత్రిలో నర్సుగా పనిచేస్తున్న సార్లా భట్ తన హాస్టల్ నుంచి అదృశ్యం అయ్యారు. ఆ తర్వాత ఆమె మృతదేహం శ్రీనగర్‌లో లభ్యమైంది. అప్పటి నుంచి ఈ కేసు విచారణ ఆలస్యం అవుతూ వచ్చింది. సరైన న్యాయం జరగలేదని బాధితుల కుటుంబాలు ఆవేదన వ్యక్తం చేశాయి. ఇప్పుడు మూడున్నర దశాబ్దాల తర్వాత.. ఈ కేసులో తిరిగి దర్యాప్తు మొదలవడం వారికి కొత్త ఆశలను కల్పిస్తోంది.

సార్లా భట్ హత్య కేసును ఇప్పుడు ఎస్‌‌ఐఏ పటిష్టంగా విచారిస్తోంది. హత్య జరిగినప్పుడు నిషేధిత ఉగ్రవాద సంస్థ అయిన జమ్మూ అండ్ కశ్మీర్ లిబరేషన్ ఫ్రంట్ తో సంబంధం ఉన్న వ్యక్తులను లక్ష్యంగా చేసుకుని ఈ దాడులు జరిగాయి. ముఖ్యంగా జెకెఎల్ఎఫ్ చీఫ్, ప్రస్తుతం జైలులో ఉన్న వేర్పాటువాద నాయకుడు యాసిన్ మాలిక్ నివాసంలో కూడా సోదాలు నిర్వహించారు. ఈ సోదాల్లో కేసును బలపరిచే కీలక ఆధారాలు లభించి ఉంటాయని ఎస్‍ఐఏ వర్గాలు భావిస్తున్నాయి. ఇదే కేసులో జెకెఎల్ఎఫ్ మాజీ నాయకుడు పీర్ నూరుల్ హక్ షా ఇంటిపై కూడా దాడులు జరిగాయి.

అసలేవరీ యాసిన్ మాలిక్..?

యాసిన్ మాలిక్ ప్రస్తుతం తీహార్ జైలులో టెర్రర్ ఫండింగ్ కేసులో జీవిత ఖైదు అనుభవిస్తున్నాడు. ఈ కేసు విచారణలో జాతీయ దర్యాప్తు సంస్థ మాలిక్‍కు మరణశిక్ష విధించాలని కోరింది. అయితే ట్రయల్ కోర్టు ఈ విజ్ఞప్తిని తోసిపుచ్చింది. మాలిక్ నేరాలు భారతదేశం గుండెలపైనే దాడి చేసినప్పటికీ.. మరణశిక్ష విధించడానికి అవి సరిపోవని కోర్టు వ్యాఖ్యానించింది. కానీ ఇప్పుడు పాత కేసులో తిరిగి విచారణ మొదలు పెట్టడం, అందులోనూ యాసిన్ మాలిక్ పేరు మళ్లీ తెరపైకి రావడం రాజకీయంగా కూడా తీవ్ర చర్చకు దారి తీస్తోంది.