ఇండిగో 'ఇండిపెండెన్స్ డే' సేల్ షురూ.. రూ.1508కే విమాన ప్రయాణం

మీరు ఏదైనా టూర్ ప్లాన్ చేస్తున్నారా? మీ ఊరికి విమానంలో వెళ్లాలనుకుంటున్నారా? మీరు ఒక్కసారైనా విమానం ఎక్కాలని కలలుగంటున్నారా? అయితే మీలాంటి వారి కోసమే దేశీయ దిగ్గజ విమానయాన సంస్థల్లో ఒకటైన ఇండిగో ఎయిర్‌లైన్స్ బంపర్ ఆఫర్ తీసుకొచ్చింది. కేవలం బస్ టికెట్ ధరకే విమాన ప్రయాణం కల్పిస్తోంది. దేశ స్వాతంత్య్ర దినోత్సవం సందర్భంగా ఆగస్టు 15వ తేదీని సూచిస్తూ కేవలం రూ.1508కే ఫ్లైట్ జర్నీ కల్పిస్తోంది. ఎంపిక చేసిన దేశీయ మార్గాల్లో ఈ టికెట్ రేట్లు వర్తిస్తాయి. మరి ఈ ఆఫర్ వివరాలు ఇప్పుడే మనం తెలుసుకుందాం.

ఇంటర్ గ్లోబ్ ఏవియేషన్ లిమిటెడ్ తమ కస్టమర్లకు ప్రత్యేక ఆఫర్ తీసుకొచ్చింది. దేశీయ, అంతర్జాతీయ మార్గాల్లో వన్-వే ఫేర్స్ ఆఫర్ అందిస్తోంది. ఇండిగో వెబ్‌సైట్, ఇండిగో మొబైల్ యాప్ లేదా ఇండిగో 6ESkai లేదా ఇండిగో వాట్సాప్ నంబర్ 7065145858 ద్వారా టికెట్లు బుకింగ్ చేసుకోవచ్చు. ఆగస్టు 15, 2025 నుంచి ఆగస్టు 18, 2025 అర్ధరాత్రి వరకు ఈ ఆఫర్ అందుబాటులో ఉంటుంది. అయితే, టికెట్ బుకింగ్‌కి ప్రయాణానికి కనీసం ఏడురోజుల వ్యవధి ఉండాలి. అంటే మీరు ఆగస్టు 22, 2025 నుంచి మార్చి 31, 2026 వరకు ఎప్పుడైనా ప్రయాణం చేయవచ్చు.

ఈ ఆఫర్ సమయంలో వన్-వే టికెట్ ధరలు రూ. 1508 నుంచి ప్రారంభమవుతున్నాయి. అంతర్జాతీయ మార్గాల్లో రూ. 4608 నుంచి టికెట్ ధరలు మొదలవుతున్నాయి. బిజినెస్ క్లాస్ టికెట్ ధరలు రూ. 10,008 నుంచి మొదలవుతున్నాయి. దేశీయ మార్గాల్లో ముంబై- ఛత్రపతి శంభాజీ నగర్, అమృత్ సర్ - శ్రీనగర్, పుణె- సూరత్, అహ్మదాబాద్- డియూ, కడపా- హైదరాబాద్, డియూ- అహ్మదాబాద్, డియూ- సూరత్, సూరత్- డియూ, ఛండీగఢ్- ధర్మశాల, గొండియా- హైదరాబాద్, మైసూర్- చెన్నై, కడపా- చెన్నై, కడపా- విజయవాడ మధ్య రూ. 1508కే టికెట్లు కల్పిస్తున్నారు. ఇక ఢిల్లీ- ఢాకా, ఢిల్లీ- కాఠ్మాండు, హైదరాబాద్- ఢాకా మధ్య టికెట్ ధరలు రూ. 4608 నుంచి మొదలవుతున్నాయి.

అదనపు బెనిఫిట్స్..

ప్రీ పెయిడ్ అదనపు బ్యాగెజ్‌పైన 15 శాతం తగ్గింపు ఆఫర్ ఇస్తోంది. అలాగే ఇంటర్నేషనల్ సెక్టార్‌లో 15 కిలోలు, 20 కిలోలు, 30 కిలోలపై తగ్గింపు లభిస్తుంది. ఇక ప్రీ బుక్ మీల్స్‌పై 15 శాతం ఆఫర్ ఇస్తోంది. స్టాండర్డ్ సీట్ ఎంపికపై 15 శాతం తగ్గింపు ఇస్తోంది. ఇంటర్నేషనల్ మార్గాల్లో రూ.999తో జీరో క్యాన్సలేషన్ ప్లాన్ అందిస్తోంది. పూర్తి వివరాలకు ఇండిగో అధికారిక వెబ్‌సైట్ చూడవచ్చు.