మోదీ-పుతిన్ భేటీకి ముందే వణికిపోయిన అమెరికా

చైనా వేదికగా జరుగుతున్న షాంఘై కో ఆపరేషన్ సమ్మిట్ ( ఎస్‌సీఓ సదస్సు ) సందర్భంగా భారత ప్రధానమంత్రి నరేంద్ర మోదీ, చైనా అధ్యక్షుడు షీ జిన్‌పింగ్, రష్యా అధినేత వ్లాదిమిర్ పుతిన్.. ఒకే వేదికపై కనిపించడం, మాట్లాడుకోవడం.. ఇప్పుడు ప్రపంచవ్యాప్తంగా తీవ్ర చర్చనీయాంశంగా మారిన సంగతి తెలిసిందే. రష్యా నుంచి చమురు దిగుమతులు చేసుకుంటున్న భారత్‌పై డొనాల్డ్ ట్రంప్ సుంకాల మోత మోగిస్తున్న వేళ.. మోదీ-పుతిన్ భేటీ కావడం, ఆప్యాయంగా కౌగిలించుకోవడం చూసి అమెరికా తన వైఖరిని కొద్దిగా మార్చుకున్నట్లు తెలుస్తోంది. చైనా గడ్డపై మోదీ-పుతిన్‌ సమావేశం కావడానికి ముందు అమెరికా కీలక వ్యాఖ్యలు చేసింది. భారత్-అమెరికా మధ్య సంబంధాలపై ఆసక్తికర కామెంట్స్ చేసింది.

ఎస్‌సీఓ సదస్సు సందర్భంగా.. చైనా వేదికగా మోదీ-పుతిన్‌ ద్వైపాక్షికంగా సమావేశం కానున్న కొద్దిసేపటి ముందు అమెరికా విదేశాంగ మంత్రి మార్కో రూబియో ఎక్స్‌ వేదికగా స్పందించారు. ఈ సందర్భంగా భారత్‌-అమెరికా దేశాల మధ్య సంబంధాలపై ప్రశంసలు కురిపించిన మార్కో రూబియో.. వాటిని మరింత బలోపేతం చేసేందుకు చర్యలు చేపడుతున్నట్లు ప్రకటించారు. ఇప్పుడిప్పుడే అమెరికా, భారత్ మధ్య భాగస్వామ్యం కొత్త శిఖరాలకు చేరుకుంటోందని.. ఇది 21వ శతాబ్దపు నిర్వచించే సంబంధమని పేర్కొన్నారు.

ఈ సెప్టెంబర్ నెలలోనే.. భారత్, అమెరికా సంబంధాలను మరింత ముందుకు నడిపించే అంశాలపై చర్చించేందుకు దృష్టి సారిస్తున్నామని తెలిపారు. ఇన్నోవేషన్, బిజినెస్ వంటి రంగాల నుంచి రక్షణ, ద్వైపాక్షిక సంబంధాల వరకు.. రెండు దేశాల ప్రజల మధ్య శాశ్వత స్నేహమే ఈ ప్రయాణానికి ఆజ్యం పోస్తుందని పేర్కొన్నారు. ఈ నేపథ్యంలోనే #USIndiaFWDforOurPeople హ్యాష్‌ట్యాగ్‌ను మార్కో రూబియో షేర్ చేశారు. యురేషియా (ఆసియా, ఐరోపా మధ్య భాగం) లోని కీలక దేశాలైన భారత్‌, చైనా, రష్యా అధినేతలు చైనా గడ్డపై ఒకే వేదికపై కలిసిన వేళ మార్కో రూబియో చేసిన ఈ వ్యాఖ్యలు ఇప్పుడు తీవ్ర ప్రాధాన్యం సంతరించుకుంది.

అయితే మార్కో రూబియో వ్యాఖ్యలకు కొన్ని గంటల ముందే.. డొనాల్డ్ ట్రంప్‌ బిజినెస్ అడ్వైజర్ పీటర్‌ నవారో భారత్‌పై ఇష్టం ఉన్నట్లు వ్యాఖ్యానించడం గమనార్హం. భారతే.. ఉక్రెయిన్‌పై యుద్ధాన్ని చేస్తోందని పేర్కొన్నారు. మరోవైపు.. పలు దేశాలపై అడ్డగోలుగా ట్రంప్‌ వేసిన టారిఫ్‌లు చాలావరకు చట్టవిరుద్ధమని అమెరికా ఫెడరల్‌ అప్పీల్స్‌ కోర్టు ఇచ్చిన తీర్పు సంచలనంగా మారింది. తన అధికారాలను దాటి మరీ ట్రంప్‌ అధిక సుంకాలు విధించినట్లు పేర్కొంది.