గురువుల గౌరవానికి మారిన రూపం.. డిజిటల్ యుగంలో టీచర్స్‌ డే

టీచర్ అంటే పాఠాలు చెప్పేవాడే కాదు, జీవితం ఎలా ఉండాలో చూపించే మార్గదర్శకుడు కూడా. ఇటీవల ఒక ప్రముఖ కోటేషన్‌ సోషల్‌ మీడియాల్లో తెగ ట్రెండ్ అవుతోంది – “టీచర్‌ అంటే పాఠాలు చెప్పేవాడు కాదు, జీవితం ఎలా ఉండాలో చూపించే దారిదీపం.” ఈ ఒక్క కోటేషన్‌ చూస్తేనే, టీచర్ల పాత్ర ఎలా మారిందో తెలుస్తోంది. వాట్సాప్ స్టేటస్‌లు, ఇన్‌స్టాగ్రామ్ రీల్స్, యూట్యూబ్ షార్ట్ వీడియోలు... ఇవన్నీ ఈ తరం టీచర్స్‌ డే సెలబ్రేషన్స్‌లో భాగమయ్యాయి.
ఒకప్పటి టీచర్స్‌ డే వేడుకలు వేరేలా ఉండేవి. విద్యార్థుల చేతులా సొంతంగా తయారయ్యే గ్రీటింగ్ కార్డులు, పేరెంట్స్‌ను అడిగిన చిన్న మొత్తంతో కొనుగోలు చేసిన గిఫ్టులు, టీచర్ల కోసం తెచ్చిన గులాబీ పువ్వులు, బొకేలు, శాలువాలు – ఇవన్నీ వారి గురుపూజలో భాగం. ఆ రోజు స్కూల్లో పిల్లలే టీచర్ల వేషం వేసి క్లాస్‌లను తీసుకుంటూ, వారి పాత్రను అనుసరించి మరింత గౌరవాన్ని కలిగించేవారు.
ఇప్పటి తరం మాత్రం ఈ వేడుకలను డిజిటల్ దిశగా మార్చేసింది. సెల్ఫీలు, వీడియో మేసేజ్‌లు, డిజిటల్ గ్రీటింగ్స్‌, సోషల్ మీడియా పోస్టులే ప్రధానంగా మారాయి. ఫిజికల్ బొకేలు కాదు, డిజిటల్ స్టిక్కర్స్ పంపించడమే ప్రేమగా భావిస్తున్నా... అసలైన అనుభూతిని మిస్ అవుతున్నట్టు అనిపించకమానదు. మరీ ముఖ్యంగా, టీచర్‌తో నేరుగా మాట్లాడే భావనే తగ్గిపోతుంది.
కాలం మారినా.. నిజమైన టీచర్‌కు ఇవ్వాల్సిన గౌరవం మాత్రం మారకూడదు. తమ జ్ఞానంతో విద్యార్థుల జీవితాన్ని వెలిగించే ఆ గురువులకు ఒక్క రోజు ప్రత్యేకం కాదు, ప్రతి రోజు కృతజ్ఞతలు తెలిపే రోజుగా మారాలి. టీచర్స్‌ డే అనేది ఒక వేడుక మాత్రమే కాదు, ఒక గుర్తింపు, ఒక సంస్కృతి. మనం ఎలా జరుపుకుంటున్నామంటే కన్నా, ఎందుకు జరుపుకుంటున్నామన్న దానికే ఎక్కువ విలువ ఇవ్వాలి.