ఫైనల్‌కి ముందు ఫామ్‌లోకి వచ్చిన టీమిండియా మిడిలార్డర్

ఆసియా కప్ 2025 ఫైనల్‌కి ముందు టీమిండియాకు ఇది నిజంగానే గుడ్ న్యూస్ అని చెప్పొచ్చు. ఈ టోర్నీ ప్రారంభం నుంచి జట్టును పీడిస్తున్న సమస్య బ్యాటింగ్ లైనప్. దీని కోసం కోచ్ గౌతమ్ గంభీర్ వింతవింత ప్రయోగాలు చేశాడు. టాప్ ఆర్డర్ బ్యాటర్లను ఏడు, ఎనిమిది స్థానాల్లో పడేసి.. హిట్టర్లను తీసుకొచ్చి ఫస్ట్ డౌన్‌లో ఆడించాడు. లెఫ్, రైట్ కాంబినేషన్ అంటూ రచ్చ రచ్చ చేశాడు. అయితే, మొత్తానికి శ్రీలంకతో జరిగిన సూపర్ - 4 చివరి మ్యాచ్‌లో ఈ బ్యాటింగ్ ఆర్డర్ సెట్ అయింది.

 శ్రీలంకతో జరిగిన మ్యాచ్‌లో టీమిండియా మిడిలార్డర్ రాణించడం ఆనందించదగ్గ విషయం. ఓపెనర్లు అభిషేక్ శర్మ, శుభమన్ గిల్ తర్వాత ఇప్పటి వరకు ఏ ఒక్కరూ పూర్తి స్థాయిలో రాణించలేకపోయారు. కానీ.. శ్రీలంకతో జరిగిన మ్యాచ్‌లో మిడిలార్డర్ బ్యాటర్లు అద్భుతంగా ఆడారు. తిలక్ వర్మ , సంజూ శాంసన్ కాంబినేషన్‌లో మిడిల్ ఓవర్లలో పరుగులు రాబట్టారు. నిదానంగా ఆడుతూనే ఓవర్‌కి పది రన్ రేట్ మెయింటేన్ చేశారు.

ఈ మ్యాచ్‌లో 9 ఓవర్లకే టీమిండియా ఇద్దరు ఓపెనర్లతో పాటు కెప్టెన్ సూర్యకుమార్ యాదవ్ వికెట్లు కోల్పోయింది. అప్పటి నుంచి మరో వికెట్ పడకుండా తిలక్ వర్మ, సంజూ శాంసన్ జట్టును ముందుకు నడిపించారు. ఈ ఇద్దరూ కలిసి 16వ ఓవర్ వరకూ స్కోర్ బోర్డును పరుగులు పెట్టించారు. 23 బంతుల్లో ఒక ఫోర్, మూడు సిక్సర్లతో 39 పరుగులు బాదిన సంజూ శాంసన్ శానక బౌలింగ్‌లో మిస్ ఫైర్ షాట్‌కి అవుటయ్యాడు.

తిలక్ వర్మ ఆఖరి వరకూ క్రీజులోనే కొనసాగాడు. 34 బంతుల్లో నాలుగు ఫోర్లు, ఒక సిక్సర్‌తో 49 పరుగులతో నాటౌట్‌గా నిలిచాడు. సంజూ శాంసన్ - తిలక్ వర్మ నాలుగో వికెట్‌కు 66 పరుగుల భాగస్వామ్యం నెలకొల్పారు. ఇన్నాళ్లూ టీమిండియా ఇలాంటి మిడిలార్డర్ కోసమే ఎదురు చూస్తోంది. కానీ.. ప్రయోగాలతో భారత బ్యాటర్లు పెద్దగా రాణించలేకపోయారు.

ఓపెనర్లు, మిడిలార్డర్ సెట్ అయినప్పటికీ.. కీలకమైన ఫస్ట్ డౌన్‌లో కెప్టెన్ సూర్యకుమార్ యాదవ్ విఫలమవ్వడం టీమిండియాను కలవరపెడుతోంది. సూర్యకుమార్ యాదవ్ ఈ టోర్నీలో పెద్దగా రాణించలేకపోయాడు. పాకిస్తాన్‌పై గ్రూప్ స్టేజ్‌లో 47 పరుగులు మినహా.. మిగతా మ్యాచ్‌లలో సింగిల్ డిజిట్ లోపే వికెట్ కోల్పోతూ వస్తున్నాడు.

దుబాయ్ వేదికగా పాకిస్తాన్‌తో ఆదివారం జరిగే ఆసియా కప్ 2025 ఫైనల్‌లో సూర్యకుమార్ కూడా ఫామ్‌లోకి వస్తే భారత్‌కు తిరుగుండదు. ఇక హిట్టర్లు హార్దిక్, శివమ్ దుబే కూడా ఆఖర్లో బౌండరీలు బాదితే భారీ స్కోర్ ఖాయం. బౌలింగ్‌లో స్పిన్నర్లు వరుణ్ చక్రవర్తి, కుల్దీప్ యాదవ్ రాణిస్తుండగా.. అక్షర్ పటేల్ తడబడుతున్నాడు. హార్దిక్ పాండ్యా స్థిరంగా బౌలింగ్ చేస్తుండగా.. ఫైనల్‌లో బుమ్రా తన మ్యాజిక్ చూయిస్తే పాక్‌పై వన్ సైడ్‌గా గెలవొచ్చు.