ఆసియా కప్ ఫైనల్లో భారత ఓపెనర్ అభిషేక్ శర్మను లక్ష్యంగా చేసుకున్న పాకిస్థాన్

ఆసియా కప్ ఫైనల్‌కు ముందు పాకిస్థాన్ శిబిరంలో ఒకే ఒక్క పేరు మార్మోగిపోతోంది. ఆ పేరు అభిషేక్ శర్మ. ఈ భారత యువ ఓపెనర్‌ను ఎలాగైనా కట్టడి చేసేందుకు పాక్ మాజీ దిగ్గజ బౌలర్లు వకార్ యూనిస్, వసీం అక్రమ్, మహమ్మద్ ఆమిర్ వంటి వారు రంగంలోకి దిగారు. ఆదివారం జరగనున్న ఫైనల్లో అభిషేక్‌ను త్వరగా పెవిలియన్‌కు పంపేందుకు పాక్ జట్టుకు వారు కీలక సలహాలు ఇస్తున్నారు.ఈ టోర్నీలో అభిషేక్ అద్భుతమైన ఫామ్‌తో పరుగుల వరద పారిస్తున్నాడు. కేవలం 6 ఇన్నింగ్స్‌ల్లోనే 204.63 స్ట్రైక్ రేట్‌తో ఏకంగా 309 పరుగులు సాధించి టోర్నీ టాప్ స్కోరర్‌గా నిలిచాడు. ముఖ్యంగా పాకిస్థాన్‌పై గత రెండు మ్యాచ్‌లలోనూ విరుచుకుపడ్డాడు. సూపర్ 4 మ్యాచ్‌లో 39 బంతుల్లో 74 పరుగులు చేయగా, అంతకుముందు లీగ్ స్టేజ్‌లో 31 పరుగులతో మెరుపు ఇన్నింగ్స్ ఆడాడు. పాక్ ప్రధాన బౌలర్ షహీన్ అఫ్రిది బౌలింగ్‌ను అతను సమర్థంగా ఎదుర్కోవడం పాక్ మేనేజ్‌మెంట్‌ను కలవరపెడుతోంది.ఈ నేపథ్యంలో పాక్ మాజీలు తమ అనుభవాన్ని పంచుకుంటున్నారు. "అభిషేక్ ఒక అద్భుతమైన ప్రతిభావంతుడు. కానీ ఫైనల్ ఒత్తిడి అతనిపై ఉంటుంది. దాన్ని పాక్ బౌలర్లు ఉపయోగించుకోవాలి" అని వకార్ యూనిస్ సూచించాడు. మరో దిగ్గజం వసీం అక్రమ్ మాట్లాడుతూ, "షహీన్ అతనికి ఫుల్ లెంగ్త్ బంతులు వేస్తున్నాడు. లెంగ్త్ మార్చి, వెనక్కి లాగి బంతిని కదిలిస్తే ఫలితం ఉంటుంది" అని సలహా ఇచ్చాడు.మరో మాజీ పేసర్ మహమ్మద్ ఆమిర్ స్పందిస్తూ, "వికెట్లకు సూటిగా బౌలింగ్ చేసి, అతనికి స్వేచ్ఛగా ఆడే అవకాశం ఇవ్వకూడదు. స్వింగ్ బంతులు, పక్కాగా వేసే స్లో బాల్స్ కూడా బాగా పనిచేస్తాయి" అని తెలిపాడు. మహమ్మద్ ఆసిఫ్ మరో అడుగు ముందుకేసి, "ఒకే చోట మూడు బంతులు వేస్తే, మూడో బంతికి కచ్చితంగా ఔట్ అవుతాడు" అని అన్నారు.ఈ సలహాలతో పాటు, పాకిస్థాన్ టీమ్ మేనేజ్‌మెంట్ కూడా అభిషేక్ బలహీనతలపై ప్రత్యేకంగా దృష్టి సారించింది. అతని పాత ఔట్‌లకు సంబంధించిన వీడియోలను విశ్లేషించి బౌలర్లకు చూపిస్తున్నట్లు సమాచారం. మొత్తానికి, పాక్ దిగ్గజాల సలహాలు, జట్టు వ్యూహాలు ఫైనల్లో ఎంతవరకు ఫలిస్తాయో, వాటిని అభిషేక్ శర్మ ఎలా ఎదుర్కొంటాడో చూడాలి.