పాదాల వాపులు తిమ్మిర్లు ఉంటే మీ అనారోగ్యానికి సంకేతం

పాదాల వాపులు వస్తున్నాయంటే తప్పనిసరిగా జాగ్రత్తపడాల్సి ఉంటుంది. నిజానికి చాలా మంది ఈ లక్షణాలను పెద్దగా పట్టించుకోరు. వాపులు, తిమ్మిర్లు తగ్గడానికి తాత్కాలికంగా మందులు వేసుకుని అక్కడితో వదిలేస్తారు. కానీ ఈ చిన్న సమస్యలే చాలా పెద్ద ముప్పుగా మారే ప్రమాదం ఉంటుంది. అందుకే..వీలైనంత త్వరగా స్పందించాలి. మరి ఇలా పాదాల్లో జరిగే మార్పులు ఏయే రోగాలకు సంకేతాలు. ఎందుకు ఇలా జరుగుతాయి అనే వివరాలు తెలుసుకుందాం.

పాదాల్లో సమస్యలు

పాదాల ఆరోగ్యాన్ని చాలా మంది పట్టించుకోరు. నిర్లక్ష్యం చేస్తుంటారు. కానీ ఇవే క్రమంగా పెద్దవై ముప్పు తెచ్చి పెడతాయి. చర్మం రంగు మారడం నుంచి తిమ్మిర్లు ఎక్కడం వరకూ ఎన్నో రకాలుగా సమస్యలు వస్తాయి. నడిచేటప్పుడు కూడా ఈ మార్పులు స్పష్టంగా కనబడతాయి. అలాంటప్పుడే తప్పనిసరిగా వైద్యులను సంప్రదించడం మంచిది. ఏ మాత్రం ఆలస్యం చేసినా కండీషన్ సీరియస్ అయ్యే ముప్పు ఉంటుంది. నిజానికి పాదాల్లో ఇలాంటి మార్పులు వస్తున్నాయంటే ఎన్నో తీవ్ర అనారోగ్యాలకు ఇవి సంకేతాలు కావచ్చు అని పలు అధ్యయనాలు తేల్చి చెబుతున్నాయి. ముఖ్యంగా డయాబెటిస్, గుండె సంబంధిత వ్యాధుల లక్షణాలు ఇదే విధంగా ఉంటాయి. పాదాల్లో మంట, కురుపులు రావడం లాంటి లక్షణాలు రక్త సరఫరా సరిగ్గా లేనప్పుడు కనబడతాయి. ముఖ్యంగా నరాలు డ్యామేజ్ అయినప్పుడు కూడా పాదాల్లో ఇలాంటి మార్పులు కనిపించే అవకాశాలున్నాయి. ఇలాంటప్పుడు గుండె జబ్బులు వచ్చే ప్రమాదం ఎక్కువగా ఉంటుంది.

మరి కొన్ని కారణాలు

పాదాల్లో ఉష్ణోగ్రతల్లో మార్పులు వచ్చినప్పుడు కూడా రంగు మారేందుకు అవకాశం ఉంటుంది. ముఖ్యంగా వాపులను మాత్రం తప్పనిసరిగా గమనించాలి. ధమనుల్లో కొవ్వు పేరుకుపోయినప్పుడు, వీటి ఆరోగ్యం సరిగ్గా లేనప్పుడు ఇలా పాదాల్లో వాపులు వస్తాయి. సరైన సమయానికి సరైన వైద్యం అందించకపోతే తీవ్ర సమస్యలు ఎదుర్కోవాల్సి వస్తుంది. తరచూ తిమ్మిరిగా ఉండడం, దురద లాంటి లక్షణాలు కనిపించాయంటే అది డయాబెటిస్ లక్షణం కావచ్చు. లేదా నరం డ్యామేజ్ అయినప్పుడు కూడా ఇలాంటి లక్షణాలే కనిపిస్తాయి. బ్లడ్ షుగర్ లెవెల్స్ అసలు కంట్రోల్ లో లేనప్పుడు ఇలా జరుగుతుంది. నరాలు ఒత్తిడికి గురైనప్పుడు లేదా ఇంకేదైనా న్యూరో సమస్యలు తలెత్తినప్పుడు ఇలా పాదాల్లో తిమ్మిర్లు వచ్చే అవకాశం ఉంటుంది. అయితే..ఇలాంటి లక్షణాలు కనిపించినప్పుడు చాలా త్వరగా స్పందించాల్సి ఉంటుంది. లేదంటే ఈ సమస్య కాస్త తీవ్ర ఇన్ఫెక్షన్ కి దారి తీసే ప్రమాదం ఉంది.

పాదాల వాపులు

పాదాల్లో విపరీతమైన నొప్పి, వాపులు వస్తుంటాయి. పాదాలు చాలా బరువెక్కినట్టుగా అనిపిస్తాయి. ఇలాంటి లక్షణాలు కనిపించాయంటే గుండె సంబంధిత సమస్యలు ఉన్నట్టు లెక్క. దీన్నే ఎడిమా అంటారు. ముఖ్యంగా హార్ట్ ఫెయిల్యూర్ కండీషన్స్ లో ఈ సమస్య తలెత్తుతుంది. గుండె కండరాల్లో ఏమైనా ఇబ్బందులు ఉన్నా ఇలాగే పాదాల్లో వాపులు కనిపిస్తాయి. పాదాల్లో ఎక్కువగా కదలికలు వచ్చే కొద్దీ ఈ వాపులు ఎక్కువవుతుంటాయి. ఎక్కువ సమయం పాటు నిలబడినా, ఎక్కువ సేపు కూర్చున్నా వాపులు మరీ ఎక్కువవుతాయి. ఇలాంటి సమయంలో సరైన చికిత్స తీసుకోకపోతే లక్షణాలు మరీ తీవ్రమవుతాయి. పాదాలపై చర్మం పొడిగా మారడం, చర్మం రంగు మారిపోవడం లాంటి లక్షణాలు కనబడతాయి. ఏదైనా గాయం అయినప్పుడు ఎక్కువ రోజుల పాటు మానకుండా అలాగే ఉన్నా అది డయాబెటిస్ లక్షణం కావచ్చు. కొన్ని సార్లు ఈ అల్సర్స్ చాలా తీవ్రమవుతాయి. త్వరగా చికిత్స తీసుకుంటే ఇబ్బంది లేకుండా ఉంటుంది.

పాదాలు చల్లబడడం

కొన్ని సార్లు పాదాలు చాలా చల్లబడుతుంటాయి. నరాలు తేలి ఇబ్బంది పెడుతుంటాయి. ఈ నరాలు కూడా కొన్ని సార్లు ఎరుపు రంగులో..మరోసారి నీలం రంగులో కనబడతాయి. ఇలా జరుగుతోంది అంటే రక్త సరఫరా సరిగ్గా లేదు అని అర్థం. ముఖ్యంగా పెరిఫెరల్ ఆర్టరీ డిసీజ్ ఉన్నప్పుడు ఇలా జరుగుతుంది. సాధారణంగా గుండె నుంచి రక్త సరఫరా జరుగుతుంది. మళ్లీ తిరిగి అవయవాల నుంచి గుండెకి రక్తం వెళ్తుంది. ఈ ప్రక్రియ నిరంతం కొనసాగుతూ ఉంటుంది. ఎప్పుడైతే ఈ సైకిల్ బ్రేక్ పడుతుందో అప్పటి నుంచి నరాల్లో సమస్యలు మొదలవుతాయి. పాదాల్లో ఇలా నరాలు తేలడం అనేది అందుకు ఓ ఉదాహరణ. కొంత మందిలో వెరికోస్ వెయిన్స్ కూడా వస్తుంటాయి. రక్త సరఫరా సరిగ్గా లేనప్పుడు తలెత్తే సమస్య ఇది. దీనిపైన కూడా ఫోకస్ చేయాల్సిన అవసరం ఉంది.

ఫంగస్ రావడం

తరచూ ఏదో విధంగా ఇన్ఫెక్షన్స్ రావడం, ఫంగస్ కారణంగా వాపులు పుండ్లు రావడం లాంటి లక్షణాలనూ అసలు నిర్లక్ష్యం చేయకూడదు. ఆర్త్రైటిస్ లాంటి జబ్బులు వచ్చే ముందు ఇలాంటి లక్షణాలు కనబడతాయని వైద్యులు చెబుతున్నారు. వీటిని వదిలేసే కొద్దీ సమస్యలు పెరుగుతుంటాయి. ముఖ్యంగా ఆర్త్రైటిస్ వచ్చినప్పుడు చాలా అప్రమత్తంగా ఉండాలి. రెగ్యులర్ మెడికేషన్ అనేది చాలా అవసరం. లేదంటే ఈ సమస్య ముదిరి మరీ తీవ్ర రూపం దాల్చుతుంది. అప్పుడు మెడికేషన్ కూడా సరిగ్గా పని చేయకపోవచ్చు.