భారీగా తగ్గిన గోల్డ్ రేట్లు.. తనిష్క్, లలితా, జోయాలుక్కాస్ గ్రాము బంగారం ధర ఎంత?

భారత్‌లో బంగారానికి డిమాండ్ ఫుల్‌గా ఉంటుందని చెప్పొచ్చు. చాలా వరకు మహిళలు.. పండగ ఉన్నా.. పెళ్లి ఉన్నా.. ఇతర శుభకార్యం ఏదైనా ఉన్న సమయంలో.. బంగారు ఆభరణాలు కొనుగోలు చేసి ధరించేందుకు ఆసక్తి చూపిస్తుంటారు. ఇప్పుడు దేశంలో అతిపెద్ద పండగ సీజన్ వచ్చేసింది. ధన్‌తేరాస్, దీపావళి వేళ.. బంగారానికి డిమాండ్ ఇంకా ఎక్కువే ఉంటుంది. ఇంకా.. ధన త్రయోదశి వేళ.. బంగారం, వెండి సహా ఇతర విలువైన లోహాలు కొనుగోలు చేస్తే శుభప్రదమని.. మంచి జరుగుతుందని విశ్వసిస్తుంటారు. అందుకే.. బంగారం ధరలు భారీగా పెరుగుతున్నా.. స్థోమతకు తగ్గట్లుగా ఎంతో కొంత కొనుగోలు చేయాలని చూస్తుంటారు.

ఈ సమయాల్లో జువెల్లరీలు కూడా కిటకిటలాడుతుంటాయి. జనం తాకిడి ఎక్కువగా ఉంటుందని చెప్పొచ్చు. ఇక ఇటీవలి కాలంలో.. బంగారం రేట్లు విపరీతంగా పెరగ్గా.. ఎట్టకేలకు ఇవాళ (అక్టోబర్ 18) తగ్గుముఖం పట్టాయి. ఇంటర్నేషనల్ మార్కెట్లో పడిపోగా.. దానికి అనుగుణంగానే దేశీయంగా కూడా రేట్లు పతనం అయ్యాయి. చాలా రోజుల తర్వాత రేట్లు తగ్గడం గమనార్హం.

ఇక ధన్‌తేరాస్ వేళ.. ఉదయం 8.50- 10.33 మధ్య అమృత కాలం ఉందని చెబుతున్నారు. ఈవినింగ్ ముహూరత్ (లాభ) సాయంత్రం 5.48 గంటల నుంచి 7.23 మధ్య ఉంది. రాత్రి ముహూరత్ (శుభ, అమృత, ఛార) అక్టోబర్ 18 రాత్రి 8.57- 1.41 AM గా ఉంది. ఎర్లీ మార్నింగ్ ముహూరత్ (లాభ)- అక్టోబర్ 19 ఉదయం 4.50 గంటల నుంచి 6.24 గంటలుగా ఉంది.

బంగారం రేట్లు తగ్గిన వేళ.. ఏ జువెల్లరీలో ధర ఎంత ఉందో చూద్దాం. ఇక్కడ తనిష్క్‌లో గ్రాము బంగారం ధర 22 క్యారెట్లపై రూ. 12,210 గా ఉంది. మలబార్ గోల్డ్ అండ్ డైమండ్స్, జోయాలుక్కాస్, ఖజానా, లలితా జువెల్లర్స్, కల్యాణ్ జువెల్లర్స్ అన్నింట్లో గోల్డ్ రేటు గ్రాముకు 11,995 గా ఉంది. అన్ని జువెల్లరీల్లో ఇవే రేట్లు ఉండగా.. ఇతర మేకింగ్ ఛార్జీలు వంటివి వేర్వేరుగా ఉంటాయి. అన్ని షాపుల్లో ఇది ఒకే రకంగా ఉండదు. స్థానిక పన్ను రేట్లు, ఇతర అంశాల్ని బట్టి ధరల్లో తేడా ఉంటుంది.

ఇంకా బంగారం కొనుగోలు చేసే ముందు స్వచ్ఛతను చెక్ చేసుకోవాలి. ఇందుకోసం హాల్ మార్కింగ్ చేసిన బంగారు ఆభరణాలనే కొనుగోలు చేసేందుకు చూడాలి. ఇక్కడ బీఐఎస్ లోగో సహా.. ఆరెంకెల హెచ్‌యూఐడీ ఉంటుంది. దీనిని బీఐఎస్ కేర్ యాప్ ద్వారా కూడా చెక్ చేసుకోవచ్చు. ఇటీవలి కాలంలో.. 22 క్యారెట్ల ధర పెరిగిన నేపథ్యంలో.. కాస్త తక్కువ స్వచ్ఛత ఉన్నటువంటి.. 20, 18, 14 క్యారెట్ల బంగారు ఆభరణాలపైనా ఆసక్తి చూపిస్తున్నారు.