నవంబర్ 2న సీఎంఎస్-03 ఉపగ్రహ ప్రయోగానికి ఇస్రో సన్నాహాలు

భారత అంతరిక్ష పరిశోధనా సంస్థ  మరో ప్రతిష్ఠాత్మక ప్రయోగానికి సిద్ధమైంది. దేశంలోనే అత్యంత బరువైన కమ్యూనికేషన్ ఉపగ్రహం సీఎంఎస్-03 ను నవంబర్ 2న నింగిలోకి పంపేందుకు సన్నాహాలు పూర్తి చేసింది. భారత నౌకాదళం కోసం ప్రత్యేకంగా రూపొందించిన ఈ శాటిలైట్‌ను ఆంధ్రప్రదేశ్‌లోని శ్రీహరికోట సతీశ్ ధావన్ స్పేస్ సెంటర్ నుంచి ప్రయోగించనున్నారు. దేశంలోనే అత్యంత శక్తిమంతమైన లాంచ్ వెహికల్ మార్క్ 3  రాకెట్ ఈ ఉపగ్రహాన్ని కక్ష్యలోకి మోసుకెళ్లనుంది.సీఎంఎస్-03 ఉపగ్రహాన్ని జీశాట్-7ఆర్  అని కూడా పిలుస్తారు. ఇది పూర్తిగా సైనిక అవసరాల కోసం ఉద్దేశించిన మల్టీ-బ్యాండ్ కమ్యూనికేషన్ ఉపగ్రహం. దీని బరువు సుమారు 4,400 కిలోలు. భారత భూభాగం నుంచి భూస్థిర బదిలీ కక్ష్య లోకి ప్రయోగించనున్న అత్యంత బరువైన కమ్యూనికేషన్ శాటిలైట్ ఇదే కావడం విశేషం. "భారత భూభాగంతో పాటు విస్తారమైన సముద్ర జలాల్లో ఈ ఉపగ్రహం సేవలు అందిస్తుంది" అని ఇస్రో ఒక ప్రకటనలో పేర్కొంది.2013లో ప్రయోగించిన జీశాట్-7 రుక్మిణి ఉపగ్రహం స్థానంలో జీశాట్-7ఆర్ సేవలు అందించనుంది. అత్యాధునిక పేలోడ్స్‌తో రూపొందించిన ఈ ఉపగ్రహం.. హిందూ మహాసముద్రంతో పాటు ఇతర కీలక సముద్ర ప్రాంతాల్లో నౌకాదళ కార్యకలాపాల సామర్థ్యాన్ని గణనీయంగా పెంచనుంది. దీని ద్వారా వాయిస్, డేటా, వీడియో లింక్‌ల కోసం సి, ఎక్స్‌టెండెడ్ సి, క్యూ-బ్యాండ్లలో సురక్షితమైన కమ్యూనికేషన్ సేవలు అందుబాటులోకి వస్తాయి. ఇది సైనిక అవసరాలతో పాటు మారుమూల ప్రాంతాల్లోని పౌర ఏజెన్సీలకు కూడా మెరుగైన డిజిటల్ సేవలు అందించడంలో సహాయపడుతుంది.ఇప్పటికే ఉపగ్రహాన్ని రాకెట్‌తో అనుసంధానం చేసి అక్టోబర్ 26న ప్రయోగ వేదికపైకి తరలించినట్లు ఇస్రో వెల్లడించింది. చంద్రయాన్-3 మిషన్‌ను విజయవంతంగా మోసుకెళ్లిన ఎల్వీఎం3 రాకెట్‌కు ఇది ఐదో కార్యాచరణ ప్రయోగం  కానుంది.ఇదే క్రమంలో ఈ ఏడాది చివరి నాటికి మరో భారీ విదేశీ ఉపగ్రహాన్ని ప్రయోగించనున్నట్లు ఇస్రో చైర్మన్ డాక్టర్ వి. నారాయణన్ గత వారం ప్రకటించారు. అమెరికాకు చెందిన ఏఎస్‌టీ స్పేస్‌మొబైల్ అభివృద్ధి చేసిన 6.5 టన్నుల బరువున్న బ్లూబర్డ్-6 ఉపగ్రహాన్ని కూడా ఎల్వీఎం3 రాకెట్ ద్వారానే శ్రీహరికోట నుంచి ప్రయోగించనున్నట్లు ఆయన తెలిపారు. "బ్లూబర్డ్ శాటిలైట్‌ను ప్రయోగించేందుకు పనులు వేగంగా జరుగుతున్నాయి. సరైన సమయంలో ప్రధాని దీని తేదీని ప్రకటిస్తారు" అని నారాయణన్ ఓ మీడియా సమావేశంలో వెల్లడించారు.