పనికిరాని పేపర్లని చెత్తబుట్టలో పడేశారు.. కట్ చేస్తే రూ.2.5 కోట్లు

ఒక సామాన్య కుటుంబానికి రాత్రికి రాత్రే అదృష్టం తలుపు తట్టింది. గుజరాత్‌లో దొరికిన రూ. 2.5 కోట్ల విలువైన షేర్ సర్టిఫికేట్లు ఆ కుటుంబానికి తీపి కబురు అందించినా.. అదే ఆస్తి ఇప్పుడు ఆ ఇంట్లో అంతర్గత కలహాలకు దారితీసింది. గుజరాత్‌లోని ఊనా గ్రామానికి చెందిన ఒక వ్యక్తి.. తన తాత సవ్జీ పటేల్ మరణానంతరం గ్రామంలోని ఇంటిని శుభ్రం చేయడానికి వచ్చాడు. ఆ సమయంలో ఇంట్లోని చెత్తబుట్టలో కొన్ని పాత పత్రాలు, వాటితో పాటు కొన్ని షేర్ సర్టిఫికేట్లు దొరికాయి.

ఇక ఆ షేర్లకు సంబంధించి ప్రస్తుతం మార్కెట్ విలువను పరిశీలించగా.. అది చూసి ఆ వ్యక్తి ఆశ్చర్యపోయాడు. వాటి విలువ అక్షరాలా రూ. 2.5 కోట్లు ఉన్నట్లు వెల్లడైంది. ఒక్కసారిగా కోటీశ్వరుడిని చేసిన ఈ అదృష్టం.. వెంటనే వారసత్వ వివాదంగా మారింది. ఆ సర్టిఫికెట్లపై తానే యజమానినని కొడుకు (సవ్జీ పటేల్ కుమారుడు), మనవడు ఇద్దరూ వాగ్వాదానికి దిగడంతో ఆ కుటుంబంలో విభేదాలు తలెత్తాయి.

ఆ ఆస్తిపై హక్కు తమదే అంటూ.. ఆ తండ్రికొడుకులు ఇప్పుడు ఎవరి వాదన వారు చేస్తు్నారు. మరణానికి ముందే తన తాత సవ్జీ పటేల్ ఊనాలోని ఆస్తికి వారసుడిగా తన మనవడిని నామినీగా ప్రకటించారు. ఈ సర్టిఫికేట్లు ఆ వారసత్వంగా తనకు దక్కిన ఇంట్లోనే దొరికాయి.. కాబట్టి వాటిపై తనకే హక్కు ఉంటుందని మనవడు వాదిస్తున్నాడు. అయితే సవ్జీ పటేల్‌కు ప్రత్యక్షంగా చట్టబద్ధమైన వారసుడిని తానే అని.. అందుకే ఆ ఇల్లు, ఆస్తులు షేర్ సర్టిఫికేట్లపై పూర్తి హక్కు తనకే ఉందని కొడుకు పేర్కొంటున్నాడు.

సవ్జీ పటేల్ దియులోని ఒక హోటల్‌లో వెయిటర్‌గా పనిచేసేవారు. ఆయన కొడుకు, మనవడు కూడా దియులోనే పనిచేసేవారు. ప్రస్తుతం అనుభవిస్తున్న పేదరికం నుంచి బయటికి వచ్చేందుకు ఆ షేర్లను వదులుకోవడానికి ఆ మనవడు నిరాకరించాడు. దీంతో ఈ వారసత్వ హక్కు వివాదాన్ని తేల్చడానికి వారిద్దరూ ఇప్పుడు గుజరాత్ హైకోర్టు ను ఆశ్రయించారు. నవంబర్ 3వ తేదీన ఈ కేసును గుజరాత్ హైకోర్టు విచారించనుంది. కౌన్ బనేగా కరోడ్‌పతి ఎవరు అనే ప్రశ్నకు కోర్టే సమాధానం చెప్పాల్సి ఉంది.