మా నగరంలో ఏ ఖాన్‌ను మేయర్ కానివ్వం.. బీజేపీ నేత అమీత్ సతం

అమెరిరాలోని న్యూయార్క్ నగర మేయర్‌గా భారత సంతతికి చెందిన 34 ఏళ్ల జోహ్రాన్ మందానీ న్యూయార్క్ మేయర్‌గా విజయం సాధించారు. స్వయంగా అమెరికా అధ్యక్షుడు రంగంలోకి దిగి వ్యతిరేకంగా ప్రచారం చేసినా.. సంచలనం సృష్టించారు. దిగ్గజాలను ఓడించి.. మందానీ ఈ చారిత్రక స్థానాన్ని దక్కించుకున్నారు. అయితే న్యూయార్క్ పరిస్థితి తమ నగరానికి రానివ్వమని బీజేపీ నేత సంచల వ్యాఖ్యలు చేశారు. ముంబయిలో ఏ ఖాన్‌ను మేయర్ కానివ్వం అని.. ముంబై బీజేపీ అధ్యక్షుడు అమీత్ సతం అన్నారు. కాగా, త్వరలో ముంబై మున్సిపల్ ఎన్నికలు జరగనున్న నేపథ్యంలో అమీత్ వ్యాఖ్యలు దుమారం రేపుతున్నాయి.

జోహ్రాన్ మందానీ న్యూయార్క్ మేయర్‌గా విజయం సాధించిన నేపథ్యంలో అంధేరి వెస్ట్ బీజేపీ ఎమ్మెల్యే అమీత్ సతం సోషల్ మీడియాలో స్పందించారు. ఈ మేరకు పెట్టిన పోస్టులో తాము ఏ ఖాన్‌ను ముంబయి మేయర్ కానివ్వబోమన్నారు. అలాంటి దాన్ని ఓట్ జిహాద్‌గా అభివర్ణించారు. న్యూయార్క్‌లో చేసిన రాజకీయాలే.. ముంబైలోనూ చేయాలని ప్రయత్నాలు జరుగుతున్నాయని ఆరోపించారు. కొంత మంది అధికారం కొనసాగించడం కోసం బుజ్జిగింపు రాజకీయాలు చేస్తున్నారన్నారు. అలాంటి శక్తుల నుంచి ముంబైని కాపాడుకోవాలని పిలుపునిచ్చారు. సమాజంలో విభజన సృష్టించడానికి ఇలాంటి శక్తులు ఇంతకుముందు కూడా ప్రయత్నించాయన్నారు. అయితే తాను మత సామరస్యాన్ని నమ్ముతానని.. కానీ దేశ వ్యతిరేక వాదం ఎంచుకున్న వారిని మాత్రం కచ్చితంగా అడ్డుకుంటామని హెచ్చరించారు.

జోహ్రాన్ మందానీ న్యూయార్క్ నగరానికి మొట్ట మొదటి ముస్లిం మేయర్‌గా.. తొలి దక్షిణాసియా మూలాలు ఉన్న వ్యక్తిగా కావడం గమనార్హం. 1991వ అక్టోబరు 18న ఉగాండాలోని కంపాలోలో జోహ్రాన్ మందానీ జన్మించారు. అయితే ఉగాండా పండితుడు మహమూద్ మందానీ, ప్రముఖ భారతీయ చలనచిత్ర నిర్మాత మీరా నాయర్ దంపతుల కుమారుడే ఈ జోహ్రాన్ మందానీ. ఉగాండా నుంచి దక్షిణాఫ్రికాకు, అక్కడి నుంచి న్యూయార్క్ సిటీకి చేరుకుంది ఈయన కుటుంబం. అనంతరం అక్కడే స్థిరపడిపోయారు. ప్రతిష్టాత్మక బ్రాంక్స్ హైస్కూల్ ఆఫ్ సైన్స్‌లో విద్యనభ్యసించిన జోహ్రాన్.. ఆఫ్రికానా స్టడీస్‌లో బోడోయిన్ కాలేజీ నుంచి పట్టా పొందారు. అయితే తన నైపుణ్యం, శక్తివంతమైన ప్రచారంతో.. డెమొక్రాటిక్ పార్టీలో తనదైన ముద్ర వేసుకున్నారు మందానీ.

కాగా, అధికార రిపబ్లికన్లు.. ముఖ్యంగా డొనాల్డ్ ట్రంప్ నుంచి కమ్యూనిస్ట్ ముద్ర వేయించుకున్నప్పటికీ, మందానీ తనదైన పద్ధతిలో ప్రచారం చేశారు. ముఖ్యంగా ప్రజలను ఆకర్షించేందుకు.. నగరంలో జీవన వ్యయాన్ని తగ్గించడంపై దృష్టి సారించారు. అందులో భాగంగా సౌతిండియా పాపులర్ హామీతో.. న్యూయార్క్ ప్రజల నమ్మకాన్ని గెలుచుకున్నారు.