నడిరోడ్డుపైనే దేశాధ్యక్షురాలిపై లైంగిక వేధింపులు.... వీడియో వైరల్

సాక్షాత్తు దేశాధ్యక్షురాలే నడిరొడ్డుపై లైంగిక వేధింపులు ఎదుర్కొన్నారు. ఓ బహిరంగ కార్యక్రమంలో పాల్గొన్న ఆమెపై వెనుక నుంచి వచ్చిన ఓ వ్యక్తి చేతులు వేస్తూ ముద్దుపెట్టుకునే ప్రయత్నం చేశాడు. ఈ షాకింగ్ అనుభవం మెక్సికో అధ్యక్షురాలికి ఎదురయ్యింది. ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది. ఇంతకీ ఏం జరిగిందంటే? మెక్సికో అధ్యక్షురాలు క్లాడియా షీన్‌బామ్‌.. మెక్సికో నగరంలో మంగళవారం జరిగిన ఓ కార్యక్రమానికి హాజరయ్యారు. అక్కడ ఆమె ప్రజలతో కరచాలం చేస్తూ.. మాట్లాడుతూ ముందుకెళ్తున్నారు. ఈ సమయంలో వెనుక నుంచి వచ్చిన ఓ యువకుడు అధ్యక్షురాలిపై చేయి వేసి అసభ్యకరంగా తాకాడు. అనంతరం.ఆమెను ముద్దు పెట్టుకోబోయాడు.

దీంతో అమె వ్యక్తిగత భద్రతా సిబ్బంది అప్రమత్తమై అతడ్ని పక్కకు నెట్టేశారు. అయినా కానీ వాడు మాత్రం వేధింపులు ఆపలేదు. అధ్యక్షురాలి ఒంటిపై ఎక్కడెక్కడో చేతులు వేసి అసభ్యంగా తాకుతుండటంతో ఆమె ఇబ్బంది పడ్డారు. ఆ వ్యక్తి చేతిని ఆమె పక్కకు నెట్టేస్తున్న దృశ్యాలు వీడియోలో రికార్డయ్యాయి. ఈ ఘటనకు సంబంధించిన వీడియో ప్రస్తుతం సోషల్‌ మీడియాలో వైరల్‌ అవుతోంది. దీనిపై నెటిజన్లు తీవ్ర ఆగ్రహం వ్యక్తం చేస్తున్నారు. దేశాధినేతకే భద్రత లేకపోతే సాధారణ మహిళల పరిస్థితేంటి? అని ప్రశ్నిస్తున్నారు.

కామాంధుడిపై కఠిన చర్యలు తీసుకోవాలని నెటిజన్లు డిమాండ్‌ చేస్తున్నారు. ఇది భద్రతా వైఫల్యమేనని.. ఆ వ్యక్తి అంత సమీపంగా వచ్చే వరకు సెక్యూరిటీ చేస్తున్నారని పలువురు ప్రశ్నించారు. అంతేకాదు, సెక్యూరిటీ స్పందించిన తీరుపై కూడా నిలదీస్తున్నారు. నిందితుడు అధ్యక్షురాలిపై చేతులు వేసి ముద్దుపెట్టే ప్రయత్నం చేస్తుంటే.. చోద్యం చూస్తున్నారని మండిపడుతున్నారు. కాగా, ఈ విషయంపై మెక్సికో అధ్యక్ష కార్యాలయం ఇప్పటి వరకూ ఎటువంటి ప్రకటన చేయలేదు. లైంగిక వేధింపులకు పాల్పడిన సదరు వ్యక్తి మద్యం మత్తులో ఉన్నట్లు అధికారులు పేర్కొన్నారు.

మిచోకాన్ రాష్ట్రంలో హింసను అరికట్టేందుకు ఆమె కొత్త భద్రతా వ్యూహాన్ని ప్రకటించిన రోజే ఈ ఘటన జరగడం గమనార్హం. మిచోకాన్‌లో గత మూడేళ్లలో ఏడుగురు మేయర్లు హత్యకు గురికావడంతో ప్రజాగ్రహం పెరిగింది. నవంబరు 1న యూరుఆపాన్ మేయర్ కార్లోస్ అల్బెర్టో మాంజోపై డ్రగ్స్ ముఠాలు దాడికి పాల్పడ్డాయి. దీంతో ప్రభుత్వ భద్రతా విధానంపై తీవ్ర విమర్శలు వెల్లువెత్తుతున్నాయి. దీనికి నిరసనగా ప్రజలు వీధుల్లోకి వచ్చి ఆందోళనలు చేపట్టారు.