మొబైల్ యూజర్లకు షాక్! మళ్లీ పెరగనున్న రీఛార్జ్ ధరలు!
Andhra Pradesh Telugu | Suryaa Desk | Published : Fri, Nov 07, 2025, 09:21 PM
సంవత్సరం చివరిలో లేదా కొత్త సంవత్సరం ప్రారంభంలో మీ ఖర్చులు మరోసారి పెరగే అవకాశం ఉంది. ముఖ్యంగా మొబైల్ రీఛార్జ్లు మరింత ఖరీదవ్వబోతున్నాయి. తాజా నివేదికల ప్రకారం, టెలికాం రంగం మరోసారి టారిఫ్ల పెంపుపై దృష్టి పెట్టినట్లు తెలుస్తోంది.దేశంలోని ప్రధాన టెలికాం కంపెనీలు — రిలయన్స్ జియో, భారతీ ఎయిర్టెల్, వొడాఫోన్-ఐడియా (Vi) — రాబోయే నెలల్లో తమ మొబైల్ రీఛార్జ్ ప్లాన్ల ధరలను పెంచే యోచనలో ఉన్నట్లు సమాచారం. టారిఫ్ రేట్లు సుమారు 10 శాతం వరకు పెరగవచ్చని అంచనా.ఇప్పటివరకు అధికారిక ప్రకటన రాకపోయినా, జియో మరియు ఎయిర్టెల్ ఇప్పటికే తమ పలు ప్లాన్లలో మార్పులు చేశారు. కొన్ని ప్లాన్ల ధరలను పెంచగా, కొన్ని ప్లాన్ల చెల్లుబాటు కాలాన్ని తగ్గించారు. ఉదాహరణకు, జియోలో 1GB రోజువారీ డేటా ప్లాన్ ధర ముందుగా రూ.249 ఉండేది. ఇప్పుడు దానిని 1.5GB రోజువారీ ప్లాన్గా మార్చి రూ.299 వసూలు చేస్తున్నారు. ఎయిర్టెల్ కూడా ఇలాంటి మార్పులు చేసింది.5G నెట్వర్క్ నిర్మాణం, నిర్వహణ, ఫైబర్ విస్తరణ మరియు స్పెక్ట్రం ఖర్చులు పెరగడం వల్ల టెలికాం కంపెనీలు టారిఫ్లను పెంచే దిశగా అడుగులు వేస్తున్నాయని పరిశ్రమ వర్గాలు చెబుతున్నాయి.ఈ ఏడాది డిసెంబర్ నుంచి వచ్చే ఏడాది జూన్ మధ్య ఈ టారిఫ్ పెంపు అమల్లోకి వచ్చే అవకాశం ఉందని చెబుతున్నారు. జెపి మోర్గాన్ నివేదిక ప్రకారం, జియో తన రీఛార్జ్ ప్లాన్ల ధరలను 15 శాతం వరకు పెంచవచ్చని, ఎయిర్టెల్ మరియు Vi కూడా దీనిని అనుసరిస్తాయని అంచనా.
|
|