డబ్బుల్లాగే సమయాన్నీ దాచేయొచ్చు,,,,దేశంలో మొట్టమొదటి 'టైమ్ బ్యాంకు

ఇప్పటి వరకు మనం డబ్బులు దాచుకునే బ్యాంకులను మాత్రమే చూశాం. ఎక్కువగా ఉన్నప్పుడు బ్యాంకులో దాచుకుని.. అవసరం ఉన్నప్పుడల్లా వాటిని తీసుకుని వాడుకుంటాం. ఇదంతా అందరికీ తెలిసిందే కాగా.. ఇప్పుడు కొత్తగా టైమ్ బ్యాంకులు కూడా వచ్చేస్తున్నాయి. దేశంలో తొలిసారిగా కేరళ ఈ టైమ్ బ్యాంకును ఏర్పాటు చేసింది. అయితే సాధారణ బ్యాంకుల్లో డబ్బులు దాచుకుంటే ఈ బ్యాంకులో మాత్రం సమయాన్ని దాచుకోవచ్చు. అవసరం ఉన్నప్పుడు ఆ సయమాన్ని తిరిగి తీసుకునే వెసులుబాటును కూడా కల్పించింది. మరి ఇదెలా సాధ్యం అవుతుందో మనం ఇప్పుడు తెలుసుకుందాం పదండి.

సామాజిక సేవా రంగంలో కేరళ రాష్ట్రం మరోసారి వినూత్న ముందడుగు వేసింది. దేశంలోనే తొలిసారిగా కొట్టాయం జిల్లాలోని ఎలికుళం పంచాయితీ అంతర్జాతీయంగా ప్రశంసలు పొందిన 'టైమ్ బ్యాంక్'ను ఏర్పాటు చేసింది. అయితే ఈ వినూత్న ప్రాజెక్టును పంచాయితీలోని అన్ని వార్డులలో వృద్ధులను ఏకం చేసే 'నిరవు @ 60 ప్లస్' అనే సమూహం ద్వారా అమలు చేస్తున్నారు. ఈ బృందం ఎలికుళం పంచాయితీలో ఉన్న 7,652 మంది సీనియర్ సిటిజన్‌ల వివరాలను ఇప్పటికే సేకరించింది. అయితే ఈ బ్యాంకు ముఖ్య ఉద్దేశం.. వృద్ధుల్లో ఒంటరితనాన్ని పోగొట్టడం. అలాగే వారికి అవసరమైన ఆరోగ్య సంరక్షణ, రోజువారీ సహాయం అందించడం.

ఒక యువ వాలంటీర్ వృద్ధుడికి ఒక గంట సేవ చేస్తే.. అంటే అవసరం ఉన్న వృద్ధులకు మందులు కొనివ్వడం, బిల్లులు చెల్లించడం, మాట్లాడటానికి సమయం ఇవ్వడం వంటివి చేస్తే ఆ సయమాన్ని అతడి పేరిట డిపాజిట్ చేస్తారు. ముఖ్యంగా 'టైమ్ బ్యాంక్' ఖాతాలో ఒక గంట క్రెడిట్‌గా జమ చేస్తారు. ఈ వాలంటీర్‌కు భవిష్యత్తులో అంటే 60 ఏళ్లు దాటిన తర్వాత సేవ అవసరమైనప్పుడు.. వారు తమ ఖాతాలో ఉన్న క్రెడిట్‌ను ఉపయోగించి మరొక వాలంటీర్ నుంచి సేవలను పొందవచ్చు. ఆశా కార్యకర్తలు, పంచాయితీ సిబ్బంది క్రమంతప్పకుండా సర్వేలు నిర్వహించి.. వృద్ధుల అవసరాలు, వాలంటీర్ల సేవలను పర్యవేక్షిస్తారు.

ఈ వినూత్న ప్రయత్నం కేవలం వృద్ధులకు సేవ చేయడానికే కాకుండా.. యువతలో సామాజిక బాధ్యతను పెంచడానికి, అలాగే తరం మధ్య అంతరాన్ని తగ్గించడానికి దోహదపడుతుందని పంచాయితీ అధికారులు తెలిపారు. ఈ పథకం ద్వారా ఎలికుళం పంచాయితీ తన వినూత్నతకు గుర్తింపు పొందింది. వృద్ధాప్య జనాభా పెరుగుతున్న నేపథ్యంలో.. దేశంలోని ఇతర ప్రాంతాలు కూడా ఈ 'టైమ్ బ్యాంక్' మోడల్‌ను అనుసరించే అవకాశం ఉందని సామాజిక నిపుణులు అభిప్రాయపడుతున్నారు.