రెండో పెళ్లి ఊహాగానాలకు తెరదించిన రషీద్ ఖాన్

ఆఫ్ఘనిస్థాన్ క్రికెట్ జట్టు కెప్టెన్, స్టార్ స్పిన్నర్ రషీద్ ఖాన్ తన రెండో పెళ్లిపై వస్తున్న ఊహాగానాలకు ఫుల్‌స్టాప్ పెట్టాడు. ఇటీవల సోషల్ మీడియాలో ఒక మహిళతో కలిసి ఉన్న ఫొటోలు, వీడియోలు వైరల్ కావడంతో అతడు రెండో వివాహం చేసుకున్నాడనే ప్రచారం జోరుగా సాగింది. ఈ నేపథ్యంలో, ఆ వార్తలు నిజమేనని రషీద్ ఖాన్ అధికారికంగా ధృవీకరించాడు. ఆ ఫొటోల్లో తన పక్కన ఉన్నది తన భార్యేనని స్పష్టం చేశాడు.ఈ ఏడాది ఆగస్టు 2న తన జీవితంలో ఒక కొత్త అధ్యాయం ప్రారంభమైందని రషీద్ ఖాన్ తన ఇన్‌స్టాగ్రామ్ పోస్టులో తెలిపాడు.నేను ఎప్పుడూ ఆశించిన ప్రేమ, శాంతి, భాగస్వామ్యానికి ప్రతిరూపమైన మహిళను వివాహం చేసుకున్నాను. ఇటీవల నేను నా భార్యతో కలిసి ఒక చారిటీ కార్యక్రమానికి హాజరయ్యాను. ఇంత చిన్న విషయంపై అనవసరమైన అపోహలు సృష్టించడం దురదృష్టకరం. ఇందులో దాచడానికి ఏమీ లేదు, ఆమె నా భార్య. మాకు మద్దతుగా నిలిచిన ప్రతి ఒక్కరికీ ధన్యవాదాలు" అని పేర్కొన్నాడు.నెదర్లాండ్స్‌లో తన 'రషీద్ ఖాన్ ఛారిటీ ఫౌండేషన్' ప్రారంభోత్సవం సందర్భంగా ఈ ఫొటోలు తీసినట్లు తెలిసింది. ఆఫ్ఘన్ ప్రజలకు విద్య, వైద్యం, స్వచ్ఛమైన నీరు అందించే లక్ష్యంతో ఈ ఫౌండేషన్‌ను రషీద్ ఖాన్ ప్రారంభించాడు.కాగా, రషీద్ ఖాన్‌కు 2024 అక్టోబర్‌లో కాబూల్‌లో మొదటి వివాహం జరిగింది. ఆ వేడుకలో రషీద్ ఖాన్ తో పాటు అతడి ముగ్గురు సోదరులు అమీర్ ఖలీల్, జకీవుల్లా, రజా ఖాన్ కూడా ఒకే రాత్రి వివాహ బంధంలోకి అడుగుపెట్టడం విశేషం.ఇక క్రికెట్ విషయానికొస్తే, టీ20 ఫార్మాట్‌లో రషీద్ ఖాన్ అత్యంత విజయవంతమైన బౌలర్లలో ఒకరు. అంతర్జాతీయ టీ20ల్లో 108 మ్యాచ్‌లు ఆడి 182 వికెట్లతో అత్యధిక వికెట్లు తీసిన బౌలర్‌గా కొనసాగుతున్నాడు. ఇటీవల జరిగిన ఆసియా కప్‌లో ఆఫ్ఘన్ జట్టుకు నాయకత్వం వహించినా, జట్టు సెమీఫైనల్స్‌కు అర్హత సాధించలేకపోయింది.