'ఆమె బురఖా కూడా వేసుకోదు.. అలాంటిది': లేడీ డాక్టర్ షహీన్ మాజీ భర్త

ఢిల్లీలోని ఎర్రకోట సమీపంలో జరిగిన ఘోర పేలుడు కేసు దర్యాప్తులో డాక్టర్ షహీన్ సయీద్ అరెస్ట్‌ దేశవ్యాప్తంగా సంచలనం సృష్టిస్తోంది. ఈ కేసులో కీలక నిందితురాలిగా భావిస్తున్న లక్నోకు చెందిన ఈ మహిళా వైద్యురాలి వ్యక్తిత్వాన్ని గురించి వెలువడుతున్న వివరాలు దర్యాప్తు అధికారులతో పాటు ఆమె కుటుంబ సభ్యులను కూడా దిగ్భ్రాంతికి గురిచేస్తున్నాయి.

కుటుంబానికీ అంతుచిక్కని వైరుధ్యం..

ఫరీదాబాద్‌లో భారీగా పేలుడు పదార్థాలు పట్టుబడిన కొన్ని గంటల్లోనే షహీన్‌ను అరెస్ట్ చేశారు. దీనిపై ఆమె అన్నయ్య, మొహమ్మద్ షోయెబ్.. తీవ్ర దిగ్భ్రాంతి వ్యక్తం చేశారు. నా సోదరి ఇలాంటి చట్టవిరుద్ధ కార్యకలాపాలలో పాల్గొని ఉంటుందని మా కుటుంబం ఇప్పటికీ నమ్మలేకపోతోందని చెబుతున్నారు. ఆమె అలా చేయగలిగిందని అంగీకరించడానికి తాము చాలా కష్టపడుతున్నామని వెల్లడించారు. అలాగే షహీన్ మాజీ భర్త, డాక్టర్ హయత్ జాఫర్ కూడా ఆమె గురించి ఆసక్తికర విషయాలను వెల్లడించారు. ముఖ్యంగా ఆమె ఎప్పుడూ మతపరమైన వ్యక్తిగా నడుచుకోలేదని, ఉదారవాద ఆలోచనలు కలిగి ఉండేదని చెప్పారు.తామిద్దరం కలిసి ఉన్నప్పుడు ఆమె ఎప్పుడూ బురఖా కూడా ధరించలేదని హయత్ జాఫర్ గుర్తు చేసుకున్నారు.

అంతేకాదు షహీన్ పిల్లలు, కుటుంబంతో కలిసి ఆస్ట్రేలియా లేదా యూరప్‌లో స్థిరపడాలని కలలు కనేదని.. ఈ విషయంలో విభేదాలు రావడంతోనే తాము 2012లో విడిపోయామని ఆయన చెప్పారు. వారికి ఇద్దరు పిల్లలు ఉండగా.. ప్రస్తుతం వారిద్దరూ తన వద్దే ఉంటున్నారని స్పష్టం చేశారు. ఆమె ఇప్పుడు అలా చేసిందంటే తనకు నమ్మకమే కుదరట్లేదని చెప్పారు. నిఘా వర్గాల సమాచారం ప్రకారం.. డాక్టర్ షహీన్ సయీద్.. పాకిస్థాన్‌కు చెందిన ఉగ్రవాద సంస్థ జైషే మొహమ్మద్‌ మహిళా నియామకాల విభాగం జమాత్-ఉల్-మోమినాత్‌కు భారత దేశంలో నాయకత్వం వహిస్తోంది. లక్నోలోని దాలిగంజ్‌కు చెందిన షహీన్.. ఫరీదాబాద్‌లోని అల్-ఫలా యూనివర్సిటీలో పల్మనాలజీ ప్రొఫెసర్‌గా పనిచేసేది.

అరెస్ట్ అయిన కాశ్మీరీ డాక్టర్ ముజమ్మిల్‌తో కూడా ఆమెకు సన్నిహిత సంబంధాలు ఉన్నట్లు దర్యాప్తులో తేలింది. ముజమ్మిల్‌కు చెందిన గదుల్లోనే 2,900 కిలోలకు పైగా పేలుడు పదార్థాలు దొరికాయి. అలాగే షహీన్ పని చేసిన అల్-ఫలా యూనివర్సిటీలో ఆమె ప్రవర్తనపై గతంలోనే ఫిర్యాదులు ఉన్నట్లు ఓ ప్రొఫెసర్ తెలిపారు. "ఆమె తరచూ క్రమశిక్షణను పాటించేది కాదు. ఎవరికీ సమాచారం ఇవ్వకుండానే వెళ్లిపోయేది. కాలేజీలో ఆమెను కలవడానికి చాలా మంది వచ్చేవారు. ఆమె ప్రవర్తన వింతగా ఉండేది. దీనిపై యాజమాన్యానికి ఫిర్యాదులు కూడా అందాయి" అని ఆమె పేరు వెల్లడించడానికి ఇష్టపడని ఆ ప్రొఫెసర్ చెప్పారు. ఉదారవాదిగా యూరప్‌కు వెళ్లాలనే కలలు కన్న షహీన్.. చివరికి దేశంలో అతిపెద్ద ఉగ్ర కుట్ర మాడ్యూల్‌లో భాగం కావడం దర్యాప్తు అధికారులను కూడా ఆశ్చర్యానికి గురి చేస్తోంది. ఈ కేసులో ఎన్‌ఐఏ, ఏటీఎస్ బృందాలు లోతుగా దర్యాప్తు చేస్తున్నాయి.