ముంబై ఇండియన్స్ కొత్త ప్లాన్.. పాత స్పిన్ జంటను తిరిగి తీసుకురానుందా?

ముంబై ఇండియన్స్ మేనేజ్‌మెంట్ వచ్చే ఐపీఎల్ వేలానికి ముందు జట్టులోని స్పిన్ విభాగాన్ని బలపర్చే దిశగా ఆలోచనలో ఉంది. గత సీజన్‌లో స్పిన్నర్ల ప్రదర్శన ఆశించినంత స్థాయిలో లేకపోవడంతో, కొత్త సీజన్ కోసం అనుభవజ్ఞులైన ఆటగాళ్లను రీక్రూట్ చేయాలనే వ్యూహం ముంబై సిద్ధం చేసుకుంటోంది. ఈ నేపథ్యంలో పాత ముంబై ఆటగాళ్లే మళ్లీ రాడార్‌లోకి వచ్చారని సమాచారం.
సమాచారం ప్రకారం, ముంబై ఇండియన్స్ కోల్‌కతా నైట్‌రైడర్స్‌కు చెందిన మయాంక్ మార్కండే, సన్‌రైజర్స్ హైదరాబాద్ తరఫున ఆడుతున్న రాహుల్ చాహర్‌లను తిరిగి జట్టులోకి తీసుకోవాలనే యోచనలో ఉంది. వీరిద్దరూ గతంలో ముంబై తరఫున మంచి ప్రదర్శనలతో గుర్తింపు తెచ్చుకున్నారు. ముఖ్యంగా మయాంక్ తన కచ్చితమైన లెగ్‌స్పిన్‌తో కీలక వికెట్లు తీయగా, రాహుల్ చాహర్ మిడిల్ ఓవర్లలో రన్‌రేట్‌ను కట్టడి చేయడంలో నిపుణుడిగా నిలిచాడు.
మయాంక్ మార్కండే ఇప్పటివరకు 37 మ్యాచ్‌ల్లో 37 వికెట్లు తీయగా, రాహుల్ చాహర్ 78 మ్యాచ్‌ల్లో 75 వికెట్లు సాధించాడు. ఈ గణాంకాలు వీరిద్దరి స్థిరమైన ప్రదర్శనను చూపిస్తున్నాయి. ఐపీఎల్ అనుభవం కలిగిన ఈ ఇద్దరు తిరిగి ముంబై బ్లూ జెర్సీ ధరించే అవకాశం దక్కితే, జట్టుకు స్పిన్ విభాగంలో కొత్త ఊపును తీసుకురావడం ఖాయం అని నిపుణులు భావిస్తున్నారు.
ఇక రోహిత్ శర్మ నాయకత్వంలో ముంబై జట్టు ఎప్పుడూ యువ ప్రతిభకు అవకాశమిస్తూనే ఉంటుంది. అయితే ఈసారి వ్యూహం కొంచెం భిన్నంగా ఉండబోతోంది. అనుభవం కలిగిన స్పిన్నర్లను జట్టులో చేర్చి బ్యాలెన్స్ మెరుగుపర్చడమే ముంబై లక్ష్యంగా పెట్టుకున్నట్లు తెలుస్తోంది. వేలంలో ఈ ఇద్దరిపై బిడ్డింగ్ వార్ జరగే అవకాశమూ లేకపోలేదని క్రికెట్ వర్గాలు అంచనా వేస్తున్నాయి.