పాక్ ఆక్రమిత కశ్మీర్‌లో రాజకీయ భూకంపం.. PPP నేత రజా ఫైసల్ ముంతాజ్ రాథోర్ కొత్త ప్రధానిగా ఎన్నిక!

పాకిస్తాన్ ఆక్రమిత కశ్మీర్ (PoK)లో రాజకీయ పరిణామాలు తీవ్ర ఉద్ధృతికి చేరాయి. ఇమ్రాన్ ఖాన్ పార్టీ PTIకి చెందిన ప్రస్తుత ప్రధాని చౌధరీ అన్వరుల్ హక్‌పై అవిశ్వాస తీర్మానం సఫలమవడంతో కొత్త నాయకత్వం కోసం అసెంబ్లీలో ఓటింగ్ జరిగింది. ఈ పరిణామంలో పాకిస్తాన్ పీపుల్స్ పార్టీ (PPP) అభ్యర్థి రజా ఫైసల్ ముంతాజ్ రాథోర్ ఘన విజయం సాధించారు. ముజఫ్ఫరాబాద్‌లోని అసెంబ్లీ సమావేశంలో ఈ ఓటింగ్ నిర్వహించారు. ఇది 2021లో ఏర్పడిన ప్రస్తుత అసెంబ్లీలో నాలుగో ప్రధాని మార్పు కావడం విశేషం.
అసెంబ్లీలో మొత్తం 53 మంది సభ్యులు ఉన్నప్పటికీ, ఓటింగ్‌లో 38 మంది మాత్రమే పాల్గొన్నారు. వీరిలో 36 మంది రజా ఫైసల్ ముంతాజ్ రాథోర్‌కు అనుకూలంగా ఓటు వేయగా, కేవలం ఇద్దరు మాత్రమే వ్యతిరేకంగా ఓటేశారు. మిగతా 14 మంది సభ్యులు ఓటింగ్‌కు హాజరు కాలేదు. అవిశ్వాస తీర్మానాన్ని PPP నేతలు చౌధరీ కాసిం మజీద్, సర్దార్ జావేద్ అయూబ్ లాంటి వారు ప్రవేశపెట్టారు. ఈ తీర్మానం విజయవంతమవడంతో అన్వరుల్ హక్ పదవి కోల్పోయారు. రజా ఫైసల్ ఇప్పుడు PoKకు 16వ ప్రధానిగా అధికారం చేపట్టనున్నారు.
రజా ఫైసల్ ముంతాజ్ రాథోర్ రాజకీయ నేపథ్యం బలమైనది. ఆయన తండ్రి రజా ముంతాజ్ హుస్సేన్ రాథోర్ మునుపు PoK ప్రధానిగా పనిచేశారు. రావల్పిండి, పంజాబ్ యూనివర్శిటీలో చదువుకున్న ఫైసల్ మృదుస్వభావి, రాజీ సాధింపు నైపుణ్యం ఉన్న నాయకుడిగా పేరొందారు. PPP చైర్మన్ బిలావల్ భుట్టో, ఫర్యాల్ తల్పూర్‌లకు ఆప్తుడు కావడం ఆయన ఎన్నికకు కీలకమైంది. రాజకీయ, సైనిక వర్గాల్లోనూ ఆదరణ పొందిన వ్యక్తి ఆయన. త్వరలో ఆయన ప్రమాణ స్వీకారం చేయనున్నారు.
పాకిస్తాన్ PoKకు స్వయంప్రతిపత్తి ఉందని చెప్పుకుంటుంది కానీ, అక్కడి ప్రధాని, ప్రెసిడెంట్ పదవులు పూర్తిగా ఇస్లామాబాద్ నియంత్రణలోనే ఉంటాయి. ఈ పదవులు నామమాత్రమైనవి మాత్రమే. భారత్ దృష్టిలో PoK మాత్రం తన భాగమే కానీ, పాకిస్తాన్ అక్రమంగా ఆక్రమించుకున్న ప్రాంతం. ఈ తాజా మార్పులు PoKలో అస్థిరతను మరింత బయటపెట్టాయి. 2021 అసెంబ్లీ ఏర్పడిన తర్వాత నాలుగోసారి ప్రధాని మారడం ఇక్కడి రాజకీయ అస్థిరతకు నిదర్శనం.