100 రఫేల్ జెట్ల కొనుగోలుకు ఒప్పందం,,,రష్యాతో యుద్ధం వేళ ఉక్రెయిన్ భారీ డీల్

రష్యా, ఉక్రెయిన్ ఇరు దేశాల మధ్య పరిస్థితులు ఇంకా చక్కబడలేదు. ఈక్రమంలో రష్యాతో యుద్ధంలో పైచేయి సాధించేందుకుగాను ఉక్రెయిన్ కీలక నిర్ణయం తీసుకుంది. ఈ యుద్ధంలో విజయం కోసం ఇప్పటికే విదేశాల నుంచి అత్యాధునిక ఆయుధాలు కొనుగోలు చేస్తోన్న ఉక్రెయిన్ తాజాగా ఫ్రాన్స్‌తో భారీ డీల్ కుదుర్చుకుంది. ఒకటి కాదు రెండు కాదు ఏకంగా 100 రఫేల్ ఫైటర్ జెట్లు కొనుగోలు చేయబోతుంది. ఈమేరకు రెండు దేశాల మధ్య ఒప్పందం కుదిరింది. దీనికి సంబంధించి ఫ్రాన్స్ ‌లో రెండు దేశాల మధ్య కీలక పత్రం మీద ఇరు దేశాధానేతలు సంతకం చేసినట్లు పారిస్‌లో ఉన్న ఉక్రెయిన్ దౌత్య కార్యాలయం ప్రకటించింది. అలానే ఇదే విషయాన్ని ఫ్రాన్స్ అధ్యక్ష కార్యాలయం కూడా నిర్ధారిస్తూ ప్రకటన చేశాయి.

 100 రఫేల్ జెట్ల కొనుగోలు అగ్రిమెంట్‎ మీద ఫ్రాన్స్ అధ్యక్షుడు ఇమ్మాన్యుయేల్ మెక్రాన్‌, ఉక్రెయిన్ ప్రెసిడెంట్ వొలోదిమిర్‌ జెలెన్‌స్కీ సంతకాలు చేశారు. తాజాగా జెలెన్ స్కీ ఫ్రాన్స్‌లో పర్యటించారు. ఈక్రమంలో రెండు దేశాల మధ్య ఈ భారీ ఒప్పందం కుదిరింది. రష్యా దాడుల కొనసాగుతున్న వేళ తమ వైమానిక రక్షణ సామర్థ్యాలను మరింత బలోపేతం చేసుకోవడానికి ఉక్రెయిన్ ఈ భారీ ఒప్పందం కుదుర్చుకుంది. రష్యాతో యుద్దం మైదలైన తర్వాత జెలన్ స్కీ ఫ్రాన్స్‌లో పర్యటించడం ఇది 9వ సారి. ఫ్రాన్స్ నుంచి ఉక్రెయిన్ అత్యాధునిక ఆయుధాలు కొనుగోలు చేయాలని భావిస్తోందని.. దానిలో భాగంగానే రఫేల్ జెట్ల కొనుగోలుకు ఒప్పందం కుదుర్చుకుందని ఫ్రాన్స్ కార్యాలయం ప్రకటించింది.

అయితే.. ఈ ఒప్పంద విలువ, విమానాల డెలివరీ డేట్‎ వంటి ఇతర వివరాల గురించి రెండు దేశాలు ఎలాంటి సమాచారం వెల్లడించలేదు. ఫ్రాన్స్‎కు చెందిన డసాల్ట్ ఏవియేషన్ తయారు చేస్తోన్న రఫేల్ ఫైటర్ జెట్స్‌కు ప్రపంచ దేశాల్లో ప్రత్యేకమైన క్రేజ్ ఉంది. వీటి శక్తి సమార్ధ్యాల గురించి ప్రత్యేకంగా చెప్పాల్సిన పని లేదు. రఫేల్ రంగంలోకి దిగిందంటే.. ప్రత్యర్థులు పరార్ కావాల్సిందే. పహల్గాం ఉగ్ర దాడికి ప్రతీకారంగా.. భారత్ చేపట్టిన ఆపరేషన్ సిందూర్‌లో రఫేల్ యుద్ధ విమానాలే కీలకంగా వ్యవహరించాయి.

ఈ ఆపరేషన్‌లో భాగంగా రంగంలోకి దిగి రఫేల్ యుద్ధ విమానాలు.. పీవోకేతో పాటు పాకిస్తాన్‎లోని ఉగ్ర స్థావరాలపై బాంబులు, మిస్సైళ్ల వర్షం కురిపించి వాటిని ఎక్కడికక్కడే నేలమట్టం చేశాయి. ఈ యుద్ధ విమానాల దెబ్బకు పాక్ బెంబేలెత్తిపోయింది. ఇలాంటిది.. రష్యాతో సుదీర్ఘ కాలంగా యుద్ధం చేస్తోన్న ఉక్రెయిన్.. ఇప్పుడు ఏకంగా 100 రఫేల్ ఫైటర్ జెట్స్ కొనుగోలుకు ఒప్పందం చేసుకోవడంపై ఆసక్తికరంగా మారింది.