ఐపీఎల్ 2026కి ముందు కెప్టెన్‌ను ప్రకటించిన ఢిల్లీ క్యాపిటల్స్..మరోసారి అక్షర్ పటేల్‌కే సారథ్య బాధ్యతలు

ఐపీఎల్ 2026 మినీ వేలం కోసం ఫ్రాంఛైజీలు సిద్ధం అవుతున్నాయి. మరో నాలుగు వారాల్లో అంటే డిసెంబర్ 16వ తేదీన వేలం జరగనుంది. ఇప్పటికే ఫ్రాంఛైజీలు తమ రిటెన్షన్, రిలీజ్డ్ ప్లేయర్ల లిస్ట్‌ను ప్రకటించాయి. ఇందులో భాగంగా రాజస్థాన్ రాయల్స్ జట్టు తమ కెప్టెన్ సంజూ శాంసన్‌ను సైతం వదిలేసింది. సంజూని.. సీఎస్కేతో ట్రేడ్ చేసుకుంది. దీంతో రాజస్థాన్ రాయల్స్‌కు కొత్త కెప్టెన్ ఎంపిక అనివార్యమైంది. మరోవైపు సీఎస్కే మాత్రం రుతురాజ్ గైక్వాడ్‌నే కెప్టెన్‌గా కొనసాగించనున్నట్లు ప్రకటించింది. తాజాగా మరో ఐపీఎల్ టీమ్ తమ కెప్టెన్‌ను ప్రకటించింది.

ఐపీఎల్ 2026లో ఢిల్లీ క్యాపిటల్స్‌ను అక్షర్ పటేల్ నడిపించనున్నట్లు ఆ ఫ్రాంఛైజీ మంగళవారం అనౌన్స్ చేసింది. ఈ మేరకు సోషల్ మీడియా వేదికగా వెల్లడించింది. ఐపీఎల్ 2025 మెగా వేలానికి ముందు రూ.16.50 కోట్లతో అక్షర్‌ను రిటైన్ చేసుకుంది. ఆ తర్వాత జట్టులోకి కేఎల్ రాహుల్ వచ్చినా.. కెప్టెన్‌గా మాత్రం అక్షర్‌నే ఎంపిక చేసింది. సీజన్ ఆరంభంలో వరుసగా విజయాలు సాధించిన ఢిల్లీ ఆ తర్వాత అనూహ్యంగా తడబడి ప్లే ఆఫ్స్‌కు దూరమైంది. అయినప్పటికీ అతడిపై ఫ్రాంఛైజీ మరోసారి నమ్మకం ఉంచింది. వరుసగా రెండో సీజన్‌లో సారథ్య బాధ్యతలు అప్పగించింది.

ఐపీఎల్ 2025లో అక్షర్ పటేల్ కెప్టెన్సీలో ఢిల్లీ క్యాపిటల్స్ 14 మ్యాచ్‌లలో ఏడింట్లో గెలిచింది. కానీ నెట్‌రన్‌ రేట్‌ తక్కువగా ఉండటంతో ఐదో స్థానంలో నిలిచి ప్లే ఆఫ్స్‌కు దూరమైంది. ఇక ఐపీఎల్ 2026 వేలానికి ముందు ఢిల్లీ క్యాపిటల్స్ తమ రిటెన్షన్ లిస్ట్‌ను ప్రకటించింది. వైస్ కెప్టెన్ ఫాప్ డుప్లెసిస్ సహా.. ఏడుగురిని రిలీజ్ చేసింది. ప్రస్తుతం ఆ జట్టు పర్స్‌లో రూ.21.8 కోట్లు ఉన్నాయి. డిసెంబర్ 16న ఐపీఎల్ మినీ వేలం అబుదాబిలో జరగనుంది.

ఢిల్లీ క్యాపిటల్స్ అట్టిపెట్టుకున్న ఆటగాళ్లు వీళ్లే..

అక్సర్ పటేల్ (కెప్టెన్‌), కేఎల్ రాహుల్, కరుణ్ నాయర్, అభిషేక్ పోరెల్, ట్రిస్టన్ స్టబ్స్, సమీర్ రిజ్వీ, అశుతోష్ శర్మ, విప్రజ్ నిగమ్, అజయ్ మండల్, త్రిపురాన విజయ్, మాధవ్ తివారీ, మిచెల్ స్టార్క్, టి.నటరాజన్, ముఖేష్ కుమార్, దుష్మంత చమీర, కుల్దీప్ యాదవ్, నితీశ్ రాణా.