మెడ నొప్పి తో రెండో టెస్ట్ కు కూడా శుభ్‌మన్ గిల్ మిస్.. టీమిండియాకు భారీ దెబ్బ!

టీమిండియా టెస్ట్ కెప్టెన్ శుభ్‌మన్ గిల్ తీవ్రమైన మెడ నొప్పి కారణంగా దక్షిణాఫ్రికాతో జరగబోయే రెండో టెస్ట్ మ్యాచ్‌కు దూరమయ్యారు. గత కొద్ది రోజులుగా ఈ సమస్యతో బాధపడుతున్న గిల్ ఇప్పటికే ICUలో చికిత్స అందుకున్నారు. జట్టుతో పాటు గువాహటికి చేరుకున్నప్పటికీ, పూర్తిగా కోలుకోలేకపోయారు. ఈ పరిస్థితుల్లో బుధవారం ఉదయం ఆయనకు ఫిట్‌నెస్ టెస్ట్ నిర్వహించగా, దురదృష్టవశాత్తు ఫెయిల్ అయ్యారు.
ఫిట్‌నెస్ టెస్ట్‌లో విఫలమవడంతో బీసీసీఐ వైద్య బృందం, కోచింగ్ స్టాఫ్ ఆమోదంతో గిల్‌ను జట్టు నుంచి విడుదల చేయాలని నిర్ణయించారు. దీంతో రెండో టెస్ట్‌తోపాటు మిగతా సిరిస్‌కు కూడా ఆయన అందుబాటులో ఉండే అవకాశం దాదాపు లేకుండా పోయింది. భారత జట్టుకు ఇది పెద్ద ఎదురుదెబ్బగా భావిస్తున్నారు. కెప్టెన్‌గా బాధ్యతలు చేపట్టిన కొద్ది రోజులకే గిల్‌కు ఈ గాయం ఎంతో నిరాశ కలిగించింది.
కొద్ది గంటల క్రితమే గిల్ ముంబైకి బయలుదేరి వెళ్లిపోయారు. అక్కడ ప్రముఖ వైద్య నిపుణుల పర్యవేక్షణలో తదుపరి మూడు రోజుల పాటు విశ్రాంతి, పునరావాస చికిత్స తీసుకోనున్నారు. ఈ చికిత్స తర్వాతే ఆయన తిరిగి మైదానంలోకి ఎప్పుడు దిగుతారనేది స్పష్టమవుతుందని వైద్య వర్గాలు తెలిపాయ. ఇప్పటికైతే ఆయన ఆరోగ్యమే ప్రధాన లక్ష్యమని బీసీసీఐ అధికారులు పేర్కొన్నారు.
గిల్ లేకుండా రెండో టెస్ట్‌కు భారత జట్టు ఎలా సిద్ధమవుతుందనేది ఇప్పుడు అందరి దృష్టినీ ఆకర్షిస్తోంది. కొత్త కెప్టెన్‌గా ఎవరు బాధ్యతలు తీసుకుంటారు, మిడిల్ ఆర్డర్‌లో ఆ ఖాళీని ఎవరు నింపుతారు అనే ప్రశ్నలు తలెత్తుతున్నాయి. దక్షిణాఫ్రికా సిరిస్ ఇప్పటికే భారత్‌కు కీలకం కాగా, గిల్ గైర్హాజరీతో ఒత్తిడి మరింత పెరిగినట్లు కనిపిస్తోంది.