డ్వాక్రా మహిళల రుణాల మంజూరుకు నిబంధనల సడలింపు

మహిళా సాధికారత లక్ష్యంగా ప్రభుత్వాలు అనేక చర్యలు, కార్యక్రమాలు చేపడుతున్నాయి. ముఖ్యంగా మహిళలు ఆర్థిక స్వయం సమృద్ధి సాధించేలా, వారి కాళ్ల మీద వాళ్లు నిలబడేలా చేసేందుకు ప్రభుత్వాలు డ్వాక్రా సంఘాలను ఏర్పాటు చేశాయి. డ్వాక్రా సంఘాల ద్వారా మహిళలకు పావలా వడ్డీకే రుణాలు అందిస్తూ, వివిధ కార్యక్రమాల్లో వారికి భాగస్వామ్యం కల్పిస్తూ ఏపీ ప్రభుత్వం మహిళల ఆర్థికాభివృద్ధికి చర్యలు చేపడుతోంది. అయితే కొంతమంది కారణంగా క్షేత్రస్థాయిలో డ్వాక్రా సంఘాల ద్వారా పూర్తి ఫలితాలు రావటం లేదు. డ్వాక్రా సంఘాలకు బ్యాంకులు రుణాలు మంజూరు చేసే సంగతి తెలిసిందే. ఆ రుణాన్ని డ్వాక్రా సంఘాలలోని మహిళలు వాయిదాల రూపంలో బ్యాంకులకు తిరిగి చెల్లిస్తుంటారు. ఈ రుణాలను తక్కువ వడ్డీకే అందిస్తూ మహిళలకు ఆర్థికంగా అండగా నిలుస్తున్నాయి ప్రభుత్వం, బ్యాంకులు.

అయితే డ్వాక్రా సంఘాలలోని ఒకరో, ఇద్దరో మహిళలు రుణవాయిదాలు చెల్లించకపోతే.. ఆ సంఘం మొత్తం ఇబ్బందులు పడాల్సి వస్తోంది. కొంతమంది సభ్యుల తీరు కారణంగా మొండి బకాయిలు పేరుకుపోతే.. అలాంటి డ్వాక్రా సంఘాలకు మరోసారి రుణం ఇచ్చేందుకు బ్యాంకులు నిరాకరిస్తున్న పరిస్థితి. దీంతో డ్వాక్రా సంఘాలలోని ఇతర మహిళలు ఇబ్బందులు పడుతున్నారు. అలాగే ఇలాంటి డ్వాక్రా సంఘాలు ఎక్కువగా ఉన్న మండలాలను నాన్ పర్ఫామింగ్ అసెట్ కింద చేర్చుతున్నారు. అలాంటి మండలాలకు స్త్రీనిధి రుణాలు మంజూరు నిలిచిపోతున్నాయి. దీంతో ఆయా మండలాలలోని డ్వాక్రా సంఘాల మహిళలు ఇబ్బందులు పడుతున్నారు. ఈ క్రమంలోనే ఇటీవల స్త్రీనిధి రుణాల మంజూరు నిబంధనల్లో మార్పులు చేశారు. దీంతో డ్వాక్రా సంఘాలలోని మహిళలకు రుణాలు దక్కే అవకాశాలు ఉన్నాయి.

మరోవైపు మండల సమాఖ్యలకు సంబంధించి ఎన్‌పీఏ పరిమితి గతంలో రూ.20 లక్షలుగా ఉండేది. దీనిని రూ.35 లక్షలకు పెంచారు. దీంతో కొన్ని మండలాలు ఎన్‌పీఏ జాబితా నుంచి బయటపడనున్నాయి. అలాగే స్వయం సహాయక సంఘాల రుణ పరిమితిని కూడా రూ.5 లక్షల నుంచి రూ.8 లక్షల రూపాయలకు పెంచారు.

ఎన్‌పీఏ పరిమితి పెంచడంతో ఇప్పటికే ఆ జాబితాలో ఉన్న సంఘాలు.. అందులో నుంచి బయటపడే అవకాశాలు ఉన్నాయి. అలాంటి సంఘాలకు స్త్రీనిధి రుణాలు మంజూరు కానున్నాయి. మరోవైపు డ్వాక్రా సంఘాల రుణ వాయిదాల చెల్లింపులో ఇబ్బందులు లేకుండా చేసేందుకు ప్రభుత్వం మన డబ్బులు.. మన లెక్కలు అనే యాప్ కూడా తీసుకువచ్చింది. నేరుగా సభ్యులే రుణవాయిదాలు చెల్లించేలా ప్రత్యేక యాప్‌ తీసుకొస్తోంది.