తేజస్ యుద్ధ విమానం కూలడానికి కారణం ఇదే,,?

దుబాయ్ ఎయిర్ షోలో దుర్ఘటన జరిగింది. ఏరియల్ డిస్‌ప్లేలో పాల్గొన్న ఎల్‌సీఏ తేజస్ యుద్ధ విమానం ప్రమాదానికి గురై కూలిపోయింది. స్థానిక కాలమానం ప్రకారం శుక్రవారం (నవంబర్ 21) మధ్యాహ్నం 2:10 గంటల ప్రాంతంలో.. గాల్లో చక్కర్లు కొడుతుండగా అకస్మాత్తుగా కూలిపోవడంతో.. భారత వైమానిక దళం పైలట్ మృతి చెందాడు. ఈ ఘటనపై స్పందించిన ఇండియన్ ఎయిర్ ఫోర్స్.. ప్రమాదానికి గల కారణాలు తెలుసుకునేందుకు దర్యాప్తు చేపట్టినట్లు వెల్లడించింది. పైలట్ మృతి పట్ల సంతాపం తెలిపింది. అయితే ఈ ప్రమాదంపై అనేక ఊహాగానాలు వినిపిస్తున్నాయి. అందులో ఒకటే G-LOC.

  ఏరోస్పేస్ ఫిజియోలజీలో అధిక గురుత్వాకర్షణ (G-force) ప్రభావం వల్ల స్పృహ కోల్పోవడాన్ని (లాస్ ఆఫ్ కాన్షియస్‌నెస్) G-LOC (G-induced Loss of Consciousness ) అని అంటారు. పైలట్లు పాజిటివ్ జీ-ఫోర్స్‌కు గురైనప్పుడు మెదడులోంచి రక్తం పూర్తిగా ఖాళీ అవుతుంది. దీని వల్ల సెరిబ్రల్ హైపోక్సియా వస్తుంది. ఈ పరిస్థితి యుద్ధ విమానాల పైలట్లను లేదా వ్యోమగాములను తీవ్రంగా ప్రభావితం చేసే అవకాశం ఉంది. తాజాగా జరిగిన ప్రమాదంలో తేజస్ పైలట్ కూడా ఈ పరిస్థితికి గురై ఉంటాడని అని కొందరు నిపుణులు అభిప్రాయపడుతున్నారు.

జీ-ఫోర్సెస్ వల్ల పైలట్లపై పడే ప్రభావం..

పాజిటివ్ జీ-ఫోర్స్ పెరుగుతున్నా కొద్దీ.. రక్తం మొదడు నుంచి కాళ్ల వైపు పయనిస్తుంది. దీంతో టన్నెల్ విజన్ అనే సమస్య వస్తుంది. అంటే.. కేవలం పైలట్లు స్ట్రెయిట్‌గానే చూడగలుగుతారు. పక్కలకు చూడలేదు. అనంతరం కలర్ విజన్ కూడా కోల్పోతారు. క్రమంగా చూపు మొత్తం కోల్పోతారు. చివరికి (స్పృహ కోల్పోయి) G-LOC స్థితికి వస్తారు. యుద్ధ విమానాలు వేగంగా ఎగురుతూ కిందికి పల్టీలు కొట్టడం, తలకిందులుగా ఉండి విన్యాసాలు చేస్తాయి. ఈ క్రమంలో స్పృహ కోల్పోతే.. సరైన సమయంలో యుద్ధ విమానాన్ని సాధారణ స్థితికి తీసుకురాలేము. దీంతో అది కంట్రోల్ తప్పి కూలిపోయే ప్రమాదం ఉంటుంది.

ఇగ నెగెటివ్ జీ-ఫోర్స్ వల్ల మొదడులోకి ఎక్కువగా రక్తం ప్రవహిస్తుంది. దీని వల్ల దృష్టి ఎర్రగా మారడం, వాపు రావడం, కళ్లలో రక్తనాళాలు పగిలిపోవడం కూడా జరుగుతుంది. ఇలాంటి పరిస్థితి నుంచి పైలట్లు 10-15 సెకన్లలో సాధారణ స్థితికి వచ్చే అవకాశం ఉంది. ఆ తర్వాత ఆయోమయంగా అనిపిస్తుంది. ఈ సమయంలోనే పైలట్లు విమానాన్ని తమ ఆధీనంలోకి తీసుకోవాలి. లేదంటే ప్రమాదం జరగొచ్చు. తక్కువ ఎత్తులో ఈ G-LOC పరిస్థితి వస్తే.. ప్రాణాంతకంగా మారుతుంది. కాగా, ఒత్తిడి వల్ల మనం సీటుకు అతుక్కుపోయిన పరిస్థితి వస్తే.. అది పాజిటివ్ జీ ఫోర్స్. నిట్ట నిలువునా విమానం పైకి వెళ్తే ఇలాంటి జీ-ఫోర్స్‌కు పైలట్లు గురవుతారు. ఇక సీటు నుంచి లాగినట్లు అయితే.. అది నెగెటివ్ జీఫోర్స్.