24 ఏళ్లలో తేజస్ ఫైటర్ జెట్ రెండో ప్రమాదం

దుబాయ్ ఎయిర్‌ షోలో అపశ్రుతి చోటుచేసుకుంది. ఏరియల్ డిస్‌ప్లేలో పాల్గొన్న లైట్ కంబాట్ ఎయిర్‌క్రాఫ్ట్ (LCA) తేజస్ ఫైటర్ జెట్ ఒక్కసారిగా నేలను ఢీకొంది. ఈ ప్రమాదంలో పైలట్ మృతి చెందాడు. అయితే గత 24 ఏళ్లలో తేజస్ యుద్ధ విమానం ఇలా ప్రమాదానికి గురవడం ఇది రెండోసారి మాత్రమే. ప్రపంచ స్థాయి విమానమైన తేజస్‌.. ప్రమాదాలకు గురికాడవం అత్యంత అరుదు. మిగ్‌-21 విమానాల స్థానంలో భర్తీ చేసేందుకు వీటిని రూపొందించారు. అత్యాధునిక ఏవియానిక్స్, శక్తిమంతమైన ఆయుధాలతో ఈ విమానం భారత వైమానిక దళానికి బలంగా మారింది. తేజస్ విషేషాలివే..

భారత ప్రభుత్వ సంస్థ అయిన హిందుస్థాన్‌ ఏరోనాటిక్స్‌ లిమిటెడ్‌ (హెచ్‌ఏఎల్‌).. ఈ తేజస్ యుద్ధవిమానాలను తయారు చేస్తోంది. 1980ల్లో ఈ లైట్ కంబాట్ ఎయిర్‌క్రాఫ్ట్ తయారీ కోసం అడుగులు పడ్డాయి. మధ్యలో అనేక అడ్డంకుల తర్వాత, తేజస్ ప్రోటోటైప్ అయిన.. టెక్నాలజీ డెమాన్‌స్ట్రేటర్-1 (TD-1) మొదటి పరీక్ష 2001 జరిగింది. ఆ తర్వాత ఇనిషియల్ ఆపరేషనల్ క్లియరెన్స్ (IOC) కాన్ఫిగరేషన్.. సెకండ్ సిరీస్ ప్రొడక్షన్ (SP2) తేజస్ విమానం పరీక్ష 2016లో జరిగింది.

మొదటగా ఈ తేజస్ యుద్ధ విమానాన్ని.. భారతీయ వాయుసేనకు చెందిన ఫ్లైయింగ్ డ్రాగర్స్ స్క్వాడ్రన్ 2016లో చేర్చుకుంది. లైట్ కంబాట్ యుద్ధ విమానాల్లోకెల్లా తేజస్ చిన్నది. అత్యాధుక ఫీచర్లు ఉన్న 83 తేజస్‌ (ఎమ్‌కే-1ఏ) విమానాల కోసం రూ. 48,000 కోట్ల ఒప్పందాన్ని.. 2021 ఫిబ్రవరిలో హెచ్‌ఏఎల్‌తో రక్షణ శాఖ కుదుర్చుకుంది. అనంతరం ఈ ఏడాది ఆగస్టులో రూ. 62,000 కోట్లతో మరో 97 తేజస్‌ ఫైటర్ జెట్లకు ఆర్డర్ ఇచ్చింది.

వేరియంట్లు..

మొదటగా తేజస్ Mk-1 వేరియంట్‌ యుద్ధ విమానం వాయుసేనలో చేరింది. అనంతరం దానికి కొన్ని మార్పులు చేశారు. స్వదేశీ రాడార్లతో తేజస్‌ Mk-1Aను శక్తిమంతంగా తయారు చేశారు. అంతేకాకుండా ట్విన్-ఇంజిన్‌తో ఎల్ఏసీ నేవీ వేరియంట్‌ను కూడా తయారు చేశారు. వీటన్నిటికంటే శక్తిమంతమైనది తేజస్ Mk-2 వేరియంట్. కాలం చెల్లిన మిరాజ్ 2000, మిగ్-29, జాగ్వార్ యుద్ధ విమానాల స్థానంలో వీటిని ప్రవేశపెట్టేందుకు ప్రభుత్వం ప్రణాళికలు రచిస్తోంది.

తేజస్ ఫైటర్ జెట్ ఫీచర్లు..

తేజస్ యుద్ధ విమానం గరిష్ఠంగా 4000 కిలోల పేలోడ్‌ను మోసుకెళ్లగలదు. సింగిల్ ఇంజిన్, సింగిల్ సీట్ వేరియంట్‌ను.. 13000 కేజీలో టేకాఫ్ బరువుతో ఆపరేట్ చేయొచ్చు. 4.5 జనరేషన్‌కు చెందిన ఈ ఎల్‌సీఏ తేజస్ మల్టీరోల్ ఎయిర్‌క్రాఫ్ట్.. అఫెన్సివ్, కంబాట్ ఆపరేషన్లలో కీలకంగా మారుతుంది. ఆకాశంలోనే రీఫ్యుయెలింగ్ చేసుకునే సామర్థ్యం దీని సొంతం. ఇందులో అత్యాధునిక ఎలక్ట్రానిక్ వార్‌ఫేర్ సూట్, AESA రాడార్ వ్యవస్థ ఉంది.