అన్న భార్యను వివాహం చేసుకున్న యువకుడు.. అతడి నిర్ణయంపై ప్రశంసలు

విధి ఆమెను చిన్నచూపు చూసింది. పెళ్లైన కొన్నాళ్లకే ఊహించని విధంగా ఆమె జీవితంలో చీకట్లు అలుముకున్నాయి. ప్రమాదంలో భర్తను కోల్పోయి వితంతువుగా మారింది. కానీ, భర్త తమ్ముడు ఆమెను వివాహం చేసుకుని కొత్త జీవితం ఇచ్చాడు. సమాజం ఏమనుకుంటుందోనని అతడు ఆలోచించకుండా, కుటుంబం అంగీకారంతో ఆమె మెడలో మూడుముళ్లు వేశాడు. ప్రమాదంలో భర్తను కోల్పోయి, చిన్నతనంలో వైధవ్యం అనుభవిస్తోన్న ఆన్న భార్యను యువకుడు పెళ్లి చేసుకుని, ఆదర్శంగా నిలిచిన ఈ ఘటన ఉత్తరప్రదేశ్‌లోని బదౌన్ జిల్లాలో చోటుచేసుకుంది.

స్థానిక మీడియా ప్రకారం.. బదౌన్ జిల్లాకు చెందిన రాజేశ్ సింగ్ అనే యువకుడి.. అన్నయ్యకు కొన్నాళ్ల కిందట వివాహమైంది. ఆ జంట కాపురం ఎంతో అన్యోన్యంగా సాగుతోన్న సమయంలో విధికి కన్నుకుట్టింది. ఓ ప్రమాదం ఆ కుటుంబంలో తీవ్ర విషాదం నింపింది. ఈ దుర్ఘటనలో రాజేశ్ అన్నయ్య మృతిచెందడంతో.. అతడి భార్య చిన్న వయసులోనే భర్తను పోగొట్టుకుని వైధవ్యం పొంది. ఆమె జీవితాంతం అలాగే ఉండిపోకూడదని, కొత్త జీవితం ఇవ్వాలని రాజేశ్ నిర్ణయించుకున్నాడు. వదినను వివాహం చేసుకోవాలనే నిర్ణయానికి వచ్చాడు.

తన అభిప్రాయం గురించి కుటుంబ సభ్యులకు చెప్పడంతో వారు కూడా సరేనన్నారు. తర్వాత ఈ నిర్ణయం గురించి వదినకు తెలియజేశాడు. కుటుంబం ఇందుకు సహకరించింది. ఆమె కూడా అంగీకరించడంతో పెద్దలు, బంధువుల సమక్షంలో వివాహం చేసుకున్నాడు. ప్రస్తుతం ఈ పెళ్లి విషయం తెలిసి రాజేశ్ సింగ్ తీసుకున్న నిర్ణయాన్ని చాలామంది ప్రశంసిస్తున్నారు.

ఉత్తర్ ప్రదేశ్, రాజస్థాన్, హర్యానా, బీహార్ వంటి ఉత్తరాది రాష్ట్రాల్లో ఇటువంటి సంప్రదాయం ఉందని, మహిళ అంగీకారం ఉంటే ఇందులో తప్పులేదని కొందరు అంటున్నారు.. అయితే, కొందరు మాత్రం సమాజం వారిని ఎలా స్వీకరిస్తుందోనని ఆందోళన వ్యక్తం చేస్తున్నారు. కాగా, వాస్తవానికి ఒకప్పుడు భారతీయ సమాజంలో భర్త మరణిస్తే.. భార్య కూడా అతడి చితిలో దూకి ప్రాణార్పణ చేసే దురాచారం ఉండేది. కానీ, కందుకూరి వీరేశలింగం, రాజరామ్‌ మోహన్ రాయ్ వంటి సంఘ సంస్కర్తల కృషితో బ్రిటిష్ ఇండియాలోనే సతీసహగమనం నిషేధిస్తూ చట్టం తీసుకొచ్చారు.