విశ్వ సుందరిగా మెక్సికో బ్యూటీ ఫాతిమా బాష్

అందం, తెలివితేటలు, ఆత్మవిశ్వాసానికి నిదర్శనమైన మిస్ యూనివర్స్ 2025 కిరీటాన్ని ఈ ఏడాది.. మెక్సికో భామ ఫాతిమా బాష్ సొంతం చేసుకుంది. థాయ్‌లాండ్‌ వేదికగా అంగరంగ వైభవంగా జరిగిన ఈ అంతర్జాతీయ అందాల పోటీల్లో.. ఫాతిమా దాదాపు 120 మందికి పైగా ప్రపంచ దేశాల సుందరీమణులను వెనక్కి నెట్టి విజేతగా నిలిచింది. అయితే గతేడాది మిస్ యూనివర్స్‌గా నిలిచిన డెన్మార్క్‌కు చెందిన విక్టోరియా కెజార్ హెల్విగ్.. నూతన విశ్వసుందరి ఫాతిమాకు కిరీటాన్ని అలంకరించారు. పోటీల్లో పాల్గొన్న తొలి ప్రయత్నంలోనే ఫాతిమా విజేతగా నిలవడం అందరినీ ఆశ్చర్యానికి గురి చేసింది.

ఈ పోటీల్లో ఫాతిమా బాష్ విజేతగా నిలవగా.. తొలి రన్నరప్‌గా థాయ్‌లాండ్‌కు చెందిన ప్రవీనర్‌ సింగ్‌ నిలిచింది. రెండో రన్నరప్‌గా వెనెజువెలాకు చెందిన స్టిఫానీ అబాసలీ స్థానం దక్కించుకుంది. అయితే విజేతగా నిలిచిన 25 ఏళ్ల ఫాతిమా బాష్.. మెక్సికోలోని శాంటియాగో డి తెపా ప్రాంతానికి చెందినవారు. ఫ్యాషన్‌ డిజైనింగ్‌ కోర్సు పూర్తి చేసిన ఆమె.. తొలిసారి మిస్ యూనివర్స్ పోటీల్లో పాల్గొన్నారు. విజయం అనంతరం ఫాతిమా తన చిన్ననాటి జ్ఞాపకాలను పంచుకున్నారు. తాను స్కూల్‌లో చదువుతున్నప్పుడు డిస్లెక్సియా, హైపర్‌యాక్టివిటీ డిజార్డర్‌ వంటి సమస్యలతో బాధపడినట్లు తెలిపారు.

మిస్ యూనివర్స్ 2025 పోటీల్లో భారత్‌కు ఈ ఏడాది తీవ్ర నిరాశ ఎదురైంది. రాజస్థాన్‌కు చెందిన మణికా విశ్వకర్మ భారత్ తరఫున ప్రాతినిధ్యం వహించారు. జైపుర్‌లో ఆగస్టులో జరిగిన మిస్ యూనివర్స్ ఇండియా కిరీటాన్ని సొంతం చేసుకున్న మణిక.. అంతర్జాతీయ వేదికపై ఎంతో ఉత్సాహంగా పోటీ పడ్డారు. మొదట స్విమ్‌సూట్‌ రౌండ్‌తో సహా వివిధ విభాగాలలో ఆకట్టుకున్న మణిక.. టాప్‌ 30 వరకు చేరుకోగలిగింది. అయితే కీలకమైన టాప్‌ 12లో స్థానం సంపాదించడంలో విఫలం అయింది. న్యాయ నిర్ణేతలను ఆకట్టుకోవడంలో విఫలం కావడంతో ఈ ఏడాది భారత్‌కు అందాల కిరీటం చేజారింది. ఈ ఏడాది పోటీలకు సంబంధించిన మరో విశేషం ఏమిటంటే.. భారత బ్యాడ్మింటన్‌ స్టార్ సైనా నెహ్వాల్ న్యాయనిర్ణేఒకరిగా వ్యవహరించడం. సైనా నెహ్వాల్ వంటి అంతర్జాతీయ క్రీడా ప్రముఖురాలు న్యాయనిర్ణేతగా ఉండటం ఈ పోటీలకు అదనపు ఆకర్షణగా నిలిచింది.