యూకేలో శాశ్వత నివాస అనుమతి గడువు రెట్టింపు

యూకే ప్రభుత్వం అంతర్జాతీయ వలసదారుల విధానంలో అత్యంత కీలకమైన, కఠినమైన మార్పును తీసుకురావడానికి సిద్ధమైంది. ఇందులో భాగంగా భారత్‌తో సహా వివిధ దేశాల నుంచి వచ్చిన వలసదారులు శాశ్వత నివాస అనుమతి కోసం దరఖాస్తు చేసుకునేందుకు ఉండే గడువును రెట్టింపు చేస్తూ ప్రతిపాదనను సిద్ధం చేసింది. ఈ ప్రతిపాదనను గురువారం యూకే పార్లమెంటులో హోం మంత్రి షబానా మహమూద్ ప్రవేశపెట్టారు.

కొత్తగా తీసుకురానున్న ‘ఎర్న్‌డ్ సెటిల్‌మెంట్‌’ మోడల్‌లో భాగంగా ఈ మార్పులు అమలులోకి రానున్నాయి. ఇప్పటి వరకు వలసదారులకు ఐదేళ్ల నివాసం తర్వాత ఆటోమేటిక్‌గా లభిస్తున్న ఐఎల్‌ఆర్ (ఐఎల్ఆర్) విధానాన్ని రద్దు చేసి, ఈ గడువును కనీసం పదేళ్లకు పెంచుతున్నట్లు హోం మంత్రి షబానా ధ్రువీకరించారు. ఈ నిర్ణయం బ్రిటన్‌లో పని చేస్తున్న లక్షలాది మంది భారతీయ నిపుణులపై, విద్యార్థుల భవిష్యత్తుపై తీవ్ర ప్రభావాన్ని చూపనుంది.

 ఈ కొత్త ప్రతిపాదనలు వలసదారులను వారి ఆదాయం, వృత్తి ఆధారంగా వివిధ వర్గాలుగా విభజిస్తున్నాయి. నిరీక్షణ సమయాన్ని అమాంతం పెంచాయి. తక్కువ వేతనం ఉన్న ఉద్యోగులు శాశ్వత నివాసం పొందాలంటే 15 ఏళ్ల సుదీర్ఘ కాలం వేచి ఉండాల్సి ఉంటుంది. అలాగే ప్రభుత్వ ప్రయోజనాలు పొందుతున్న వలసదారులు ఏకంగా 20 ఏళ్ల పాటు నివాస అనుమతి కోసం నిరీక్షించాల్సి ఉంటుంది. ఇక సాధారణ నిపుణులకు ఆటోమేటిక్ గడువు ఐదేళ్ల నుంచి పదేళ్ల వరకు పెరిగే అవకాశం ఉంది.

అయితే యూకే ఆర్థిక వ్యవస్థకు, ప్రజా ఆరోగ్యానికి కీలకమైన రంగాల్లో పనిచేస్తున్న నిపుణులకు ఈ కొత్త నిబంధనల్లో మినహాయింపులు లభించనున్నాయి. నేషనల్ హెల్త్ సర్వీస్ వంటి కీలక రంగాల్లో పనిచేసే నిపుణులు, అలాగే ఎక్కువ సంపాదన ఉన్న వ్యాపారవేత్తలకు ఈ కఠినమైన నిబంధనలు వర్తించవు. వీరు ఐదేళ్లు లేదా అంతకంటే తక్కువ సమయంలోనే శాశ్వత నివాస అనుమతి పొందేందుకు మార్గం అందుబాటులో ఉంటుంది.

యూకేలో వలసల సంఖ్యను తగ్గించడం, దేశానికి అత్యధిక ఆర్థిక విలువను అందించే నిపుణులను మాత్రమే ఆకర్షించడం ఈ కొత్త విధానం యొక్క ప్రధాన లక్ష్యంగా కనిపిస్తోంది. వలసదారుల సంఖ్యను అదుపు చేయాలనే ఓటర్ల ఒత్తిడి, రాజకీయ పార్టీల వాగ్దానాల నేపథ్యంలోనే యూకే ప్రభుత్వం ఈ చారిత్రక మార్పును తీసుకొచ్చింది. ఈ కఠిన నిబంధనలు ఆమోదం పొందితే.. యూకేలో తమ భవిష్యత్తు గురించి ఆశలు పెట్టుకున్న వేలాది మంది భారతీయులు తమ ప్రణాళికలను పునఃపరిశీలించుకోవాల్సిన అవసరం ఏర్పడుతుంది.