172 పరుగులకే కుప్పకూలిన ఇంగ్లండ్,,,,యాషెస్ తొలి టెస్టులో మిచెల్ స్టార్క్ తుఫాన్ బౌలింగ్
sports | Suryaa Desk | Published : Fri, Nov 21, 2025, 10:29 PM
ఆస్ట్రేలియా - ఇంగ్లండ్ మధ్య మొదలైన యాషెస్ సిరీస్ తొలి టెస్టు రసవత్తరంగా సాగుతోంది. సీనియర్ బౌలర్లు లేకపోయినా జట్టు బాధ్యత మొత్తాన్ని తన భుజాలపై వేసుకున్న మిచెల్ స్టార్క్ ఇంగ్లండ్ బ్యాటింగ్ లైనప్ను కుప్పకూల్చాడు. ఒకటి కాదు రెండు కాదు ఏకంగా ఏడు వికెట్లు తీసి ఇంగ్లండ్ బాజ్ బాల్ను కట్టడి చేశాడు. స్టార్క్ బౌలింగ్ దెబ్బకి ఇంగ్లండ్ మొదటి రోజు రెండో సెషన్కే ఆలౌట్ అయింది.
పెర్త్ వేదికగా జరుగుతున్న మొదటి టెస్టులో ఇంగ్లండ్ జట్టు కెప్టెన్ బెన్ స్టోక్స్ టాస్ గెలిచి బ్యాటింగ్ ఎంచుకున్నాడు. ఆరంభం నుంచి దూకుడు ప్రదర్శించాలనుకున్న ఇంగ్లిష్ బ్యాటర్లకు స్టార్క్ కళ్లెం వేశాడు. తొలి ఓవర్లోనే ఓపెనర్ జాక్ క్రాలీ వికెట్ తీసిన స్టార్క్, ఆ తర్వాత మరో ఓపెనర్ బెన్ డకెట్ను కూడా పెవిలియన్కు పంపాడు. లంచ్ బ్రేక్ ముందు మూడు వికెట్లు తీసుకున్న స్టార్క్, ఆ తర్వాత రెండో సెషన్లో ఏకంగా నాలుగు వికెట్లు పడగొట్టాడు.
జాక్ క్రాలీ, బెన్ డకెట్, జో రూట్, బెన్ స్టోక్స్, జెమీ స్మిత్, గస్ అట్కిన్సన్, మార్క్ వుడ్ అందరూ స్టార్క్ బౌలింగ్లోనే పెవిలియన్ బాట పట్టారు. ఈ క్రమంలోనే మిచెల్ స్టార్క్ పలు రికార్డులు కూడా నమోదు చేశాడు. యాషెస్ సిరీస్లో వంద వికెట్లు తీసుకున్న స్టార్క్, ఈ ఘనత సాధించిన తొలి లెఫ్ట్ ఆర్మ్ బౌలర్గా నిలిచాడు.
ఇంగ్లండ్ బ్యాటర్లలో హ్యారీ బ్రూక్ హాఫ్ సెంచరీతో పోరాడి 61 బంతుల్లో 5 ఫోర్లు, ఒక సిక్సర్తో 52 పరుగులు చేసి అవుటయ్యాడు. ఓలీ పోప్ 58 బంతుల్లో నాలుగు ఫోర్లతో 46 పరుగులు చేయగా, జెమీ స్మిత్ 22 బంతుల్లో 6 ఫోర్లతో 33 పరుగులు చేశాడు. ఆ తర్వాత బెన్ డకెట్ 20 బంతుల్లో 21 పరుగులు చేయగా.. మిగతా అందరూ సింగిల్ డిజిట్కే పెవిలియన్ బాట పట్టారు. జాక్ క్రాలీ, జో రూట్, మార్క్ వుడ్ డకౌట్ అయ్యారు.
మొదటి ఇన్నింగ్స్లో 32.5 ఓవర్లు ఆడిన ఇంగ్లండ్ జట్టు 172 పరుగులకు ఆలౌట్ అయింది. ఆస్ట్రేలియా బౌలర్లలో మిచెల్ స్టార్క్ 12.5 ఓవర్లు బౌలింగ్ చేసి 58 పరుగులు ఇచ్చి ఏడు వికెట్లు తీసుకున్నాడు. బ్రెండన్ డగెట్ ఏడు ఓవర్లు వేసి రెండు వికెట్లు తీయగా, కామెరూన్ గ్రీన్ ఒక వికెట్ దక్కించుకున్నాడు.
|
|